石賈墨專訪系列#8
有志者事竟成

Interview 8
©Chiu Kit LAM

由2019年6月開始香港政治動蕩,唔少年輕香港人都打算移民。因此香港人對於去德國升學甚至工作嘅興趣亦越黎越高。
 
石賈墨10年前去德國讀學士學位,然後一直留喺德國工作。今集我地將會就住香港同德國嘅工作文化展開討論,究竟香港同德國嘅職場文化有咩分別?香港人喺德國可以有乜發展機會?香港人喺德國有咩優勢?另外石賈墨亦會比各位一啲喺德國見工同揾工嘅建議同埋技巧。

十年前你去咗德國讀書啦,畢業之後,你點樣搵到第一份工?一開始成爲「新鮮人」個情況如何?之後你嘅職場發展又係點呢

威威唔怕認,作爲一個自動化工程師,喺德國搵第一份工嘅過程,真係比我想像中容易。喺我就嚟畢業嘅時候,我就已經開始喺奧芬堡附近度搵工。好快我就已經收到兩個正面嘅回覆。呢兩間公司竟然肯喺未見到我張砂紙之前就決定請我。

我搵工咁快有回音,估計係同我自己喺讀書嘅時候已經有好多實際嘅工作經驗有關。我有喺好多間公司打過工,又要做實習,最後畢業論文都係喺一間公司度寫的。呢啲經驗對我一開始嘅發展有好大嘅幫助,例如話見工嘅時候,已經可以好實在咁講得出工作嘅細節,而到搵到工之後,要適應新工作,都唔會話完全唔知頭唔知路。

畢業之後,我轉過兩次工,直到舊年年尾,我決定辭職成爲一個自由人。而我最後一份工,對於我嚟講真係好好玩,可以參與一啲最新嘅工業自動化同機器人學嘅發展項目,真係唔係人人都有呢個機會咖!所以都真係算係一份幾夢幻嘅工。

依家我做咗自己老細,都唔能夠預計嚟緊我嘅事業會點樣發展落去。望就望我嘅計劃都可以好似一開始畢業嘅時候咁,可以順利實現啦!


Interview 8 ©Chiu Kit LAM 「Unser neuer Mitarbeiter」即係「我地嘅新同事」…2014年我啱啱畢業開始返工,當然係新人啦。呢張相,就係我剛入職嘅時候,公司幫我影嘅,釘咗喺公司嘅公告板上面。原來公告板,德文叫「Schwarzes Brett」,其實即係「黑板」咁解!

 
你觀察到咩香港同德國嘅工作文化差異呢?德國公司嘅組織同管理又有咩特別?
好多人都問過我呢條有關「工作文化差異」嘅問題。老老實實,我嘅答案係:我都唔知!須知其實我都無喺香港做過嘢(除咗細個打過少少暑期工之外)。不過我做嘢嘅時候,都感覺到有啲文化差異嘅,尤其係同其他德國同事緊密合作嘅時候,就更加察覺得到。

我諗最大嘅分別真係佢地嗰種直接嘅態度。一開始我都好難接受,好多同事一有咩唔滿意唔啱心水嘅時候,就會即刻提出,甚至唔介意直接表達不滿。之後我先慢慢意識到,其實咁樣咪仲好!不如一開始就即刻提出問題,嘗試解決,好過之後先後悔同埋怨啦。就算係直接都好,都唔代表你無禮貌,或者係唔尊重人咖,呢個都取決於你提出意見嘅方式。

至於德國公司嘅組織同管理,我諗間間公司都可以好唔同嘅,我未必可以一概而論。我自己就淨係喺啲中小企度做過,佢地通常都有比較平坦嘅公司架構,比較細嘅團隊,咁所以每個人都要「撈過界」,自己要承擔多啲責任,做得闊啲,但係咁樣工作性質反而就多啲變化,亦都可以享受到多啲自由。

 
Interview 8
©Chiu Kit LAM
爲咗生計,當時一放學期假,都要搵嘢撈。你想像下,喺一間充滿住機器嘅工廠入面,又熱又嘈,肯定好辛苦。只要一開始一做嘢,件衫就會因爲留汗而極速溼曬!而做嘢著嗰件衫,德文叫「Blaumann」,即係「藍人」,好彩依家我唔太鍾意藍色嘅時候,唔駛再著啫!雖然嗰時做嘢係幾辛苦,不過我都好開心可以有機會搵到少少錢,又可以體驗到德國人嘅工作文化。
 

好多香港人都因爲依家政治嘅情況,打算移民。你自己認爲德國嘅就業市場有啲咩機會可以畀到香港人?咩行業或者資歷係特別受歡迎呢?

首先我想講,考慮清楚之後,有勇氣決定離鄉別井,同自己嘅家鄉講再見,都真係唔容易。我自己叫幾好彩,依家回望返十年前嘅抉擇,可以話我當時無做到錯嘅決定。我好希望大家都可以同我一樣咁幸運。

如果講話移民德國的話,我有一個條件,係比其他人好,就係我細細個就已經想做工程師。而工程師,絕對係德國其中一個最受歡迎嘅專業。所以我都知道,當我畢業之後,我應該唔需要擔心我搵唔到工。

不過呢,喺德國除咗工程師之外,都有好多其他嘅工作機會。根據返IHK(Industrie- und Handelskammer,德國工業及貿易商會)喺2019年做嘅調查,有差不多一半嘅受訪公司都有長期無法填補嘅職位空缺。尤其係IT界,醫藥界,手工業同護理嘅專才,喺呢度都有好大嘅需求。如果你擁有高資歷(即係話有相關嘅大學學位),其實理論上都有好好嘅機會。

 
Interview 8
做到工程師,對於我嚟講係,係幾夢幻的。因爲我讀緊中學嘅時候,就已經想做工程師,呢個真係我嘅夢想嚟咖!你如果嚟到德國做呢行的話,容易搵工呢個就一定咖啦,至於好唔好玩?咁就見仁見智啦,你自己睇睇張相,咪知道我嘅答案囉!

 

你覺得,德國嘅老闆會唔會認爲嚟自香港嘅畢業生或者年輕嘅員工,會有特別可取之處?香港人如果想喺德國做嘢的話,你覺得佢地多數仲會欠缺啲咩?

我自己又係好好彩,自己嘅經歷都好正面,我覺得香港人係有非常之好嘅適應能力,有創意,而且有國際視野。所以要問嘅問題係,德國嘅老闆對呢啲香港人嘅特點有無渴求。我知道好多公司都將文化多元視爲一個優點,因爲外國嘅員工好多時候都可以爲公司注入一股新嘅能量。

所以我自己嘅睇法係,香港人無咩嘢係稱得上有「欠缺」。我自己一開始覺得好難接受嘅嘢係啲項目嘅進度,有時真係覺得點解啲嘢去得咁慢。我作爲一個香港人,好多時候都好想快啲開始,快啲做,快啲見到效果,不過呢個想法有時候真係行唔通的。喺德國做嘢,我地要有多啲耐性,做嘢要再細心一啲,尤其係德國人對於品質都係有一定追求,所以慢少少都係正常。

仲有一個永恆嘅難題:德文。德國最權威嘅《杜登辭典》,介紹自己使命嘅時候,會講「Sprache sagt alles」可以理解成「語言就係溝通嘅所有」。畀我翻譯,可以話「語言盡言語」,掌握唔到一個語言,又點樣可以拿捏好同人溝通嘅時候,自己想講嘅言語同訊息呢?要同同事無障礙溝通,就一定要學好德文。尤其係想喺德國職場努力向上的話,德文都應該要有返咁上下嘅水平。

 
Interview 8
©Chiu Kit LAM
「嚟德國做嘢,駛唔駛一定要識講德文呀?」你可以話係,亦都可以話唔係。依家德國就業市場欠缺專才嘅情況嚴重到一個地步,係啲老闆見到合適嘅人都一定要請,唔理你係咪淨係識講英文。我之前打過工嘅其中一間公司,有好多外國同事,我差不多講英文多過德文。不過咁唔代表你唔需要學德文喎!想同啲德國同事溝通,起碼你德文都要有返咁上下程度,可以表達到自己嘅諗法先啦!
 

你有咩貼士,可以畀啲想嚟德國搵工嘅香港人呢?

如果講話搵工,見工,我呢度有兩個好實在嘅貼士可以講俾大家聽,希望大家會覺得有用啦!

首先,搵工同見工,一定要夠「真」同有創意。我自己好相信,無論係喺求職信入面,定係見工嘅時候,都一定要開放坦誠咁樣展示自己真實嘅一面,要帶出自己個人嘅面貌。搵工嘅目的,唔係玩一個「贏Offer」嘅遊戲,而係幫自己搵一個適合嘅工作環境。

而如果你地想自己嘅求職申請可以突圍而出,就一定要有多少少創意。試下大膽啲,寫求職信雖然有格式,但唔一定要照範本咁寫的!你覺得自己有咩咁特別?有無咩故事可以同人講一講?不妨可以寫埋落去。

第二,我上面都有講過,德國人做嘢比較直接。我做過咁多份工,見過無數次工,無一次我係要答埋啲「你覺得自己有咩強項弱項?」或者「你對我地公司有咩認識,有咩印象?」之類嘅問題。佢地每一次都好想好清楚咁知道,你之前喺呢個範疇有咩經驗,之前份工做過啲咩,甚至讀緊書嘅時候,有無已經開始投身呢個行業。如果想表現得好,一定要準備好點樣去清楚同仔細咁講解自己做嘢嘅經驗。
最後我都祝福所有下定決心嚟德國生活嘅香港人可以成功啦!

 
Interview 8
©Chiu Kit LAM
舊年我辭咗份工,再唔係工程師,而係踏上咗「自己僱自己」嘅自僱之路。雖然我依家唔係工程師,但係之前我做嘢所學到嘅工作技巧同經驗,仍然可以幫到我依家做緊嘅嘢。尤其係啲好需要創新同創意嘅工作,真係令我成長不少。可以喺德國搵到呢啲咁好嘅機會,我好開心,亦都好希望你地可以喺德國搵到一條適合自己嘅出路啦!