German Film@Dreamer's Day

Кино хальс © Гёте-Институт

Монгол дахь Гёте-Институт нь "Алтан Хальс" холбоотой хамтран УИД-ын iCinema-д германы шилдэг киног онцлон танилцуулж байна. Киноны талаарх мэдээллийг та хөтөлбөрийн танилцуулга болон Гёте-Институтийн кино каталог-оос авна уу. German Film@Dreamers' Day кино цувралын бүх товыг манай хуудасны арга хэмжээ булангаас харах боломжтой.

Хөтөлбөр

19-р зууны эхэн үед аж төрөх хоёр залуу дэлхий ертөнцийг танин мэдэхээр судалж байлаа. Нэг нь нүдэнд харагдах зүйлд харин нөгөөх нь төсөөлөн бодох зүйлд шамдана. Язгууртан угсаа гаралтай Александр фон Хумбольдт Өмнөд Америк тивийг хэмжин, харь орны амьдралыг судлахаар аян замдаа гарна. Ядуу тарчиг амьдралыг туулсан Карл Фридрих Гаусс харин гэрийнхээ ажлын ширээн дээрээс судалгааны ажлаа хийж, алдартай математикч болно. Нэр алдарт хүрсэн хоёр герман эрдэмтэн насан өтөл хойноо уулзах ба аль аль нь тийм аз жаргалтай байсангүй. Дэлхийн олон улсад амжилттай борлогдсон Германы орчин үеийн уран зохиолыг дэлгэцнээ амилуулахад тус номын зохиогч Даниель Кельман кино зохиол дээр хамтран ажиллажээ. Дэлгэрэнгүй... 
Арван настай Жак өөрийгөө төдийгүй дүү Мануэлийг харж хандах ажээ. Хөвгүүдийн ээж ганц бие залуу бүсгүй Санна өдөр нь ажилдаа явж шөнөөр гадуур зугаацна. Хүүхдүүд ээжийгээ үгүйлэх боловч тэднийг үл хайхарна. "Жак" хэмээх кино нь бага балчир ахуйдаа хариуцлагаа ухамсарласан хүүгийн түүх бөгөөд эцэс сүүлдээ жаалхүүгийн гаргасан гэнэтийн агаад зоригтой шийдвэр үзэгчдийг өөрсдийн алдаа дутагдлаа олж харахад хүргэх болно. Дэлгэрэнгүй... 
Энэхүү кинонд нэгэн бүсгүй болон чонын хайр сэтгэлийн тухай өгүүлдэг бөгөөд хүн болон адгуус амьтны мөн чанар хаана оршдогийг аймшиггүйгээр харуулжээ. Гол дүрийн Аниа гэх бүсгүй угсармал барилгад ганцаараа амьдарна. Тэрээр IT-мэргэжилтнээр ажилладаг бөгөөд ажлын газрын дарга  Борис түүний амар заяа үзүүлнэ гэж үгүй. Нэгэн удаа Аниа ажлаасаа гэр лүүгээ явах замдаа тэнүүлч чонотой тааралдана. Тэрхүү зэрлэг адгуус Аниагийн сэтгэлийг хүчтэй татжээ. Дэлгэрэнгүй... 
Кристиан нэгэн томоохон дэлгүүрийн ундааны хэсэгт агуулахад ажилд орно. Худалдан авагчдын хувьд хаалттай тэрхүү ертөнц ажлын хамт олон болон ачаа өргөгч болон дэвших найдлага үгүйсэн бол тэсэхийн аргагүй нэгэн хэвийн байлаа. Амттаны тасгийн Марион гэх бүсгүйд Кристиан сэтгэл алдарна. Гэвч Марион хэдийн гэрлэсэн гэдгийг мэдээд түүний амьдрал сүйрэх шиг болов. Бруно хэмээх нэгэн ахимаг насны ачаа өргөгч түүний эцэг шиг хандах боловч төдий л тус болохгүй. Энэхүү бүтээл өөрчлөлт болоод эрх чөлөө гэх ойлголтын тухай нарийвчлан өгүүлжээ. Дэлгэрэнгүй... 
Бенжамин хэнд ч анзаарагддаггүй нэгэн. Макс хэмээх хүн бүхний сэтгэлийг татсан эртэй танилцсанаар энэ бүхэн гэнэтхэн өөрчлөгдөв. Гаднах төрхөөрөө огтхон ч төсгүй тэдгээр залуусыг бусдын компьютерыг хакердах гэсэн нэг л сонирхол нэгтгэнэ. Тэд галаар наадаж эхлэв. Гал харин шатаадаг нь ойлгомжтой. Илүү: 
Трэвис ор сураггүй болоод дөрвөн жил болов. Элсэн цөлийг ганцаараа явганаар туулж Мексикийн хилээр дамжин Америк руу эргэж ирсэн тэрээр дуугаа хурааж, зожиг нэгэн болж хувирчээ. Ах нь түүнийг Лос Анжелес руу авчрах бөгөөд тэнд хүүтэйгээ уулзан итгэлийг нь бага багаар олж авна. Тэд Тревисийн салсан эхнэр, Хантерын ээж болох Жейнийг хайх эрэлд хамтдаа гарна. Илүү: 
Асран халамжлах гэр бүл, нийтийн байр, тусгай сургууль гээд Бенни хаана ч очсон төд удалгүй хөөгддөг. Есөн настай эрх дураараа ийм хүүхдийг “систем сүйтгэгч” гэж Хүүхэд халамжийн газар нэрлэх аж. Гэвч Беннид зөвхөн хайр халамж, нөмөр нөөлөг л дутагдах бөгөөд ээжтэйгээ хамт байхыг хүснэ. Харин Бианка яаж ч мэдэх охиноосоо айна. Бенниг хүлээж авах газар хийгээд шийдэл үл олдоход  тусгай багш Миша уур хилэн, түрэмгийллийн энэ эргүүлгээс түүнийг чөлөөлөхийг хичээнэ. Илүү: 
Сербийн дайралт, түүнээс үүдэлтэй дайн эхлээгүй байсан 1990-ээд оны Косово. Арван настай Нори, эцэг Гезимийн хамтаар хууль бусаар оруулж ирсэн тамхи зарж амь зууна. Гезим хүүгээ хамаатныдаа орхисон ч хамаагүй заавал Герман руу явна гэж зүтгэнэ. Хүү харин аавтайгаа үлдэхээр удаан хугацааны туршид хий дэмий оролдох аж. Хүү эцэст нь Германд байгаа аавыгаа хайхаар аюултай бөгөөд урт замд гарна. Аав хүү хоёр дахин уулзах мөчийг арай өөрөөр төсөөлж байлаа. Сайн сайхан ирээдүй ирэх болоогүй л байв. Илүү: 
Хэдхэн жилийн өмнө Дани, Рико, Паул, Марк нар үзэл суртал ноёрхсон Зүүн Германы энгийн л сурагчид байлаа. Харин тэдний өдөр тутмын амьдрал харьцангуй эгэл жирийн, санаа зовох зүйлгүй байв. Хоёр Герман улс нэгдсэний дараа дүрэм журам гэх зүйл үгүй болов. Залуус дур зоргоороо авирлан, Лайпциг хотод шөнөөр хэсүүчлэн, шөнийн гудамжаар хулгайлсан машинтайгаа согтуугаар давхилдан, мансууруулах бодис хэрэглэн бахтай нь аргагүй танхайрч байлаа. Тэд диско баар нээх боловч жилийн дараа гэхэд нео-нацистуудын балгаар бүтэлгүйтэв. Рикогийн боксчин болох замнал замхран, Паул порно кинотой орооцолдон, Марк амьдралаа үрэн таран хийж, Данигийн хайр сэтгэл түүнээс холдон оджээ. БИДНЭЭС АЛСАРСАН МӨРӨӨДӨЛ кинонд хоёр Герман нэгдэх үеэр өөрсдөө ч мэдэлгүй золиос нь болсон “хаягдсан үеийнхэн”-ий тухай өгүүлдэг. Илүү: 
1950-иад оны сүүл үеэрх Герман орон. “Эдийн засгийн гайхамшиг” ид өрнөж, ард иргэдийн аж амьдрал тогтуун агаад нацист дэглэмийн үеийн аймшигт үйл явдлыг мартахыг хичээнэ. Харин сэтгүүлч Томас Гниелка дуулиан шуугийн тарих нь тэр. Түүний нэг танил нь Аушвицын харгалзагчаар ажиллаж байсан хүнийг олж тогтоожээ. Дайны дараагаас Франкфурт хотноо багшлах болсон түүнийг өнөөх сэтгүүлч шүүхэд өгөхийг хүснэ. Гэвч Гниелкагийн энэхүү хүсэл биеллээ олсонгүй. Йоханн Радманн гэх залуу улсын прокурор даргынхаа үгнээс зөрөн байж энэ хэрэг дээр ажиллахад бэлэн гэдгээ илэрхийлнэ. Дарангуйлал, үгүйсгэл, гоёчлол холилдсон хэрэг явдал тун ээдрээтэй байлаа. Тухайн цаг үед Аушвицын талаар огтхон ч сонсож байгаагүй нэгэн байхад бусад нь аль болох энэ талаар хурдан мартахыг хичээж байв. Илүү:
Испаничууд эрх мэдэл, эд баялгийн төлөө улайрч басхүү жинхэнэ солиоролд хөтлөгдөн Өмнөд Америк тивийг эзлэн түрэмгийлэх болсон гэдэг. Агирре бүх өрсөлдөгчийнхөө эсрэг өөрийн гэх Элдорадог тунхаглан, өөрийгөө сүр жавхлант, хүчирхэг эзэн хаанд өргөмжилдөг. Гэвч түүний хамгийн сүүлийн үнэнч албат нар хүртэл аажим аажмаар өлсгөлөнд автан, индиан овгийнхны суманд өртөж, өвчний үүр уурхай болно. Үй олон харх бужигнах салан дээр бодолдоо төөрөлдсөн Агирре охиныхоо хамтаар шинэ хаанчлал тогтоох тухай мөрөөднө. Илүү: 
Берлиний хана нурахаас жилийн өмнө Ардчилсан Германд хүмүүс хэрхэн аж төрж байсан, цаашид яаж амьдрахыг хүсэж байгааг олж мэдэхээр нэгэн баримтат кино бүтээгч бүсгүй өмнөөс хойд зүгийг чиглэн галт тэргээр аялна. Аяллын явцад тэрээр нэг талаас өөрийн хүчээр, нөгөө талаар яах ч аргагүй тул хувийн эрх чөлөөгөө олохоор өөр өөрийн замналыг туулж буй олон эмэгтэйчүүдтэй учирч тэдний сэтгэлийн зовнил, итгэл найдварыг хуваалцах ажээ. Илүү: