Vazifa va maqsadlarimiz

Til. Madaniyat. Germaniya.

Germaniya Federativ Respublikasining global miqyosda faol madaniyat muassasasi sifatida biz Germaniya, Yevropa va dunyo o'rtasidagi o'zaro tushunishni rivojlantirishga intilamiz. Bunga Germaniya Tashqi ishlar vazirligi bilan tuzilgan kelishuv asosdir. Biz dunyo bo'ylab Germaniya va Evropaning madaniy va ijtimoiy  xilma-xilligi haqida ma'lumot beramiz. Dunyoning 98 mamlakatlaridagi 158 ta Gyote-Institut filiallari ko'plab hamkor muassasalar bilan birgalikda bizning global tarmog'imizni tashkil qiladi. Federal Tashqi ishlar vazirligi institutsional jihatdan bizni qo'llab-quvvatlaydi.
Ro'yxatdan o'tgan notijorat tashkilot sifatida o'z harakatlarimiz uchun o‘zimiz javobgarmiz. Hech qanday siyosiy partiyalar bilan bog'liq emasmiz va huquqiy jihatdan mustaqilmiz. Byudjetimizning uchdan bir qismini o'zimiz ishlab topamiz: bu esa til kurslari va imtihonlardan olinadigan daromaddir. Bundan tashqari, bizga Yevropa Ittifoqi, boshqa federal vazirliklar, shuningdek, Germaniya va xorijdagi fondlar va tashkilotlar yordam beradi.

Filiallarimiz joylashgan mamlakatlarning ta'lim tizimida nemis tilining mavqeini mustahkamlashga hissa qo'shamiz. Dunyo bo'ylab 100000 dan ortiq maktablarga nemis tilini yuqori darajada o'qitishda, o'qituvchilarga qo'shimcha ta'lim va malaka oshirishda ko‘maklashamiz.
Gyote-Instituti bosqichma-bosqich olib boriladigan boshlang’ich va ilg’or darajadagi umumiy nemis tili kurslaridan tortib kasbga tayyorlash til kurslari va seminarlarni taklif etadi.
Seminarlar Germaniyadagi ijtimoiy va madaniy hayot bilan sizni yaqindan tanishtirishga qaratilgan.
Onlayn kurslar va mustaqil o'rganish dasturlari ham taklifimizdan joy olgan. Har yili yarim milliondan ortiq kishi Gyote-Instituti filiallarida va hamkorlarimizda nemis tili imtihonlarini topshiradi. Keng ko'lamli ta'lim va axborot imkoniyatlarini taklif qilgan holda, xorijlik talabalar va mutaxassislarni Germaniyaga borishida qo’llab-quvvatlaymiz. 

Biz xalqaro madaniy almashinuv salohiyatiga ishonamiz.
Har yili 20 000 ga yaqin madaniy tadbirlarni davlat va nodavlat tashkilotlari hamda filiallarimiz joylashgan mamlakatlarning fuqarolik tashabbuslari bilan birgalikda o'tkazamiz. Ijodiy kasb vakillarining malakasini oshiramiz, ularga maslahat beramiz va aloqalarni o'rnatishda ko‘maklashamiz. Biz madaniy va ijodiy sohalarda barqaror faoliyat tuzilmalarini shakllantirishni qo'llab-quvvatlaymiz - masalan, madaniyat sohasida malaka oshirish bo’yicha tadbirlarini o'tkazish yoki ijodiy uyushmalarning xalqaro sahnaga chiqishiga yordam berish orqali. San'at rezidentligi, hamkorlik va birgalikda loyihalar yaratish dasturlarimiz butun dunyodagi san'at namoyandalariga sheriklarni topishga yordam berish uchun mo'ljallangan.
Fuqarolik jamiyati vakillariga biz ochiq fikr almashish uchun xavfsiz va qulay joylarni taqdim etamiz. Hatto qiyinchilik davrida ham ko'p tomonlama muloqotni davom ettirish uchun harakat qilamiz. O'z ishimizda demokratik, erkin va huquqiy ijtimoiy tartib qadriyatlariga tayanamiz.

Bizning raqamli axborot va o'quv materiallarimiz 60 dan ortiq tillarga tarjima qilingan va bizning 95 ta kutubxonamiz o'qish, uchrashuv va birgalikda ijod qilish uchun maskandir. Biz innovatsion texnologiyalar va raqamlashtirish imkoniyatlaridan foydalanamiz, shu bilan birga ularning inson va jamiyatga ta'sirini tanqidiy fikr yuritamiz. Multiplikatorlar uchun ma'lumot sayohatlari, mutaxassislar o'rtasidagi kasbiy almashinuv, yoshlar almashinuvi dasturlari va xalqaro festivallar kabi turli formatlar orqali biz dunyo bo’ylab insonlarning uchrashishiga yordam beramiz.

​Gyote-Instituti O’zbekistonda

O’zbekistondagi Gyote-Institutining bosh maqsadi xalqaro madaniy hamkorlikni rivojlantisrishdan iborat. Bu borada muassasamizning madaniyat bo’limi o’zbekistonlik hamkorlar bilan birgalikda madaniyat sohasida keng ko’lamli tadbirlarni tashkillashtiradi va anjumanlar, ma’ruzalar, seminarlar, asosan, zamonaviy musiqiy konsert dasturlari hamda mahorat darslari, zamonaviy san’at, fotografiya, dizayn va arxitektura sohasida ko’rgazmalar va treninglar, yangi nemis filmlari, teatr va raqs tomoshalariga bag’ishlangan kechalar uyushtiradi.

Gyote-Institutining til sohasidagi faoliyati boshlang’ich va o’rta maktablarda, shuningdek, oliy o’quv yurtlarida hamda kattalar ta’limida olmon tilini chet tili sifatida o’rganishni targ’ib qilish chora-tadbirlaridan iborat. Biz o’qituvchilarni olmon tilini o’rgatish jarayonida qo’llab-quvvatlaymiz, ularni yangi dars metodlari, imtihonlar va til o’rganish uchun imkoniyatlardan xabardor qilib turamiz.Germaniyada hayotning barcha jabhalariga tegishli yangi ma’lumotlar bilan ta’minlagan holda Germaniyaga yo’l ochamiz. O’zbekiston, Tojikiston va Germaniyada metodika, didaktika va o’lkashunoslik sohalarida malaka oshirish kurslarini tashkillashtiramiz. Bundan tashqari, Gyote-Instituti bosqichma-bosqich olib boriladigan boshlang’ich va ilg’or darajadagi til kurslarini taklif etadi. Mazkur kurslarda nafaqat tilni o’rganish, balki Germaniyadagi ijtimoiy va madaniy hayot bilan yaqindan tanishish mumkin. Barcha darajadagi til o’rganuvchilar uchun tegishli imtihonlarni topshirish imkoniyati ham mavjud.

Axborot va kutubxona bo’limi o’zbekistonlik va germaniyalik kutubxonachilar va qaror qabul qiluvchilar o’rtashida soha bo’yicha tajriba almashishni qo’llab-quvvatlash maqsadida multiplikatorlar uchun Germaniyaga sayohatlar, Germaniya kutubxonalarida ishlashga mo’ljallangan mutaxassislar safari, shuningdek, O’zbekistonda germaniyalik kutubxona mutaxassislarining seminar va ma’ruzalarini tashkillashtiradi. Olmon tilidagi manbalarning yetishmasligi muammosini olmon tili o’quv zallari, O’zbekistondagi jamoat kutubxonalarida hamkor kutubxonalar tashkil etish yo’li bilan hal etish maqsad qilingan. Hozirga qadar Toshkent shahrida o’quv zali, Andijon va Urganch shaharlarida hamkor kutubxonalar tashkil etilgan.