Ein Kellner steht an der Bar in einem Restaurant und trocknet Gläser ab. © Goethe-Institut

အလုပ်စဆင်းရာတွင် အရေးကြီးသော စာရွက်စာတမ်းများ

သင်သည် ဂျာမနီတွင် ရေရှည် (သို့) အမြဲတမ်း အလုပ်နေရာတစ်ခု ရရှိထားသည် ဆိုပါက ဝန်ထမ်းတစ်ယောက်အဖြစ် သတ်မှတ်ခံရပါသည်။ ဤသို့ဆိုလျှင် သင်၏ အလုပ်ရှင်အတွက် စာရွက်စာတမ်းအချို့ လိုအပ်ပါသည်။ ပထမဦးဆုံး သင်သည် ကျန်းမာရေးအာမခံ ရှိကြောင်း သက်သေပြရန်လိုပါသည်။ ယင်းသက်သေခံလက်မှတ်ကို သင်၏ ကျန်းမာရေးအာမခံ ကုမ္ပဏီထံမှ ရယူနိုင်ပါသည်။ ဂျာမနီတွင် လူတိုင်း ကျန်းမာရေးအာမခံ ထားရှိရပါသည်။ မကြာခဏဆိုသလို ရဲစခန်းမှ ပြစ်မှုကင်းရှင်းကြောင်း ထောက်ခံစာလည်း လိုတတ်ပါသည်။ ထိုထောက်ခံစာကို အသင်နေထိုင်ရာ ရပ်ကွက်ရှိ ရပ်ကွက်ရုံးတွင် ရယူနိုင်ပါသည်။

အာမခံများနှင့် အခွန်များ

အသင်သည် ဝန်ထမ်းတစ်ယောက်ဖြစ်သွားပြီဆိုပါက ပင်စင်အာမခံနှင့် အလုပ်လက်မဲ့အာမခံတို့ကိုလည်း ထားရှိရပါမည်။ သို့သော် ထိုအာမခံများအတွက် သင် ဘာမျှ လုပ်ရန်မလိုပါ။ သင့်တွင် ထို အာမခံများ အလိုအလျောက် ရရှိထားပြီး ဖြစ်ပါသည်။ အလုပ်ရှင်က သင်၏ ကျန်းမာရေးအာမခံ၊ ပင်စင်အာမခံနှင့် အလုပ်လက်မဲ့ အာမခံတို့အတွက် ငွေတစ်စိတ်တစ်ပိုင်းကို ပေးချေပေးပါသည်။ ကျန်ရှိသည့် ငွေတစ်စိတ်တစ်ပိုင်းကိုမူ အသင် ပေးရပါမည်။ ယင်းငွေအတွက် သင်၏ လုပ်ခ/လစာမှ အလိုအလျောက် ပုံမှန် နုတ်သွားပါသည်။ သင်သည် အခွန်ကုတ်နံပါတ်နှင့် အီလက်ထရောနစ် ဝင်ငွေခွန်ကတ်တို့လည်း လိုပါသည်။ ထိုအရာများကို အခွန်ရုံးတွင် ရယူနိုင်ပါသည်။ အခွန်များအတွက် အသင်ကိုယ်တိုင် ငွေလွှဲပေးရန်မလိုပါ။ အခွန်ရုံးသည် သင်၏ လုပ်ခ/လစာမှ တိုက်ရိုက် နုတ်ယူသွားမည် ဖြစ်ပါသည်။

အလုပ်ခန့်အပ်မှုစာချုပ်

ဝန်ထမ်းတိုင်းသည် အလုပ်ခန့်အပ်မှု စာချုပ် ရရှိပါသည်။ သင်နှင့် သင်၏အလုပ်ရှင်တို့က ထိုစာချုပ်ပေါ်တွင် လက်မှတ် ရေးထိုးရပါသည်။ အလုပ်ခန့်အပ်မှုစာချုပ်ကို သေချာစွာဖတ်ရှုပြီးမှ လက်မှတ်ထိုးပါ။ အသင် ကောင်းမွန်စွာ နားမလည်သည်များ ရှိပါက မေးမြန်းပါ။ အရွယ်ရောက်ပြီးသူများသည် Migrationsberatung für erwachsene Zuwanderer (အရွယ်ရောက်ပြီးသော နိုင်ငံရွှေ့ပြောင်းလာသူများအတွက် အကြံပေးဌာန MBE) နှင့် ဆွေးနွေးတိုင်ပင်နိုင်ပါသည်။ ဆယ်ကျော်သက်များနှင့်အသက် (၂၇) နှစ်အထိ လူငယ်များသည် Jugendmigrationsdienste (နိုင်ငံရွှေ့ပြောင်းလာသူများအတွက် လူငယ်အကြံပေးဌာန JMD)တွင် သတင်း အချက်အလက်များ ရယူနိုင်ပါသည်။ အလုပ်ခန့်အပ်မှု စာချုပ်တွင် လိုက်နာရမည့် စည်းကမ်းချက်များအားလုံးကို ဖော်ပြထားပါသည်။ သင်နှင့် သင်၏ အလုပ်ရှင်တို့သည် ယင်းစည်းကမ်းချက်များကို လိုက်နာရပါမည်။ အလုပ်ခန့်အပ်စာချုပ်ပေါ်တွင် ဥပမာအားဖြင့် သင်သည် တစ်လလျှင် လစာ မည်မျှ ရမည်နည်း၊ အလုပ်နားရက် မည်မျှရမည်နည်း၊ အကယ်၍ သင်ဖျားနာပါက ဘာတွေလုပ်ရမည်နည်း စသည့် အချက်အလက်များကို ဖော်ပြထားပါသည်။ သာမန်အားဖြင့် အလုပ်သစ်တွင် သင့်ကို အစမ်းခန့်ကာလ ထားရှိပါသည်။ အစမ်းခန့်ကာလ၏ ကြာမြင့်ချိန်သည် အမျိုးမျိုး ကွဲပြားတတ်ပါသည်။ တစ်ခါတစ်ရံတွင် ရက်သတ္တပတ် အနည်းငယ်သာ ကြာတတ်ပြီး တစ်ခါတစ်ရံတွင်မူ (၆) လ အထိ ကြာမြင့်တတ်ပါသည်။ အစမ်းခန့်ကာလအတောအတွင်းတွင် သင်၏ အလုပ်ရှင်က သင့်အား အနီးကပ် စောင့်ကြည့်ပါသည်။ အလုပ်ရှင်က အသင်သည် အစမ်းခန့်ကာလအပြီးတွင် ကုမ္ပဏီတွင် အလုပ်ဆက်လုပ်ရမည်၊ မလုပ်ရမည်ကို ဆုံးဖြတ်ပါသည်။ အသင်ကိုယ်တိုင်လည်း အစမ်းခန့်ကာလ ပြီးဆုံးပြီးနောက် ထိုကုမ္ပဏီတွင် ဆက်လက် အလုပ် လုပ်လိုသည်၊ မလုပ်လိုသည်ကို ဆုံးဖြတ်ရပါသည်။ အစမ်းခန့်ကာလတွင် အလုပ်ရှင်မှ အလုပ်ဖြုတ်လိုပါက (သို့)  အသင် အလုပ်ထွက်လိုပါက ပုံမှန်အားဖြင့် (၂)ပတ် သို့မဟုတ် (၃)ပတ် ကြိုတင် အကြောင်းကြားရပါသည်။ ထို့နောက် အတည် အလုပ်လုပ်ဖြစ်သွားပြီဆိုလျှင်မူ အလုပ်ဖြုတ်လို (သို့) ထွက်လိုပါက (၃) လ ကြိုတင် အကြောင်းကြားရပါသည်။ 

အသေးစား အလုပ်များ

ဂျာမနီတွင် အသေးစားအလုပ်များ (သို့) တစ်လလျှင် ယူရိုငွေ (၄၅၀) အထိ ရှာနိုင်သော အလုပ်များရှိပါသည်။ အသေးစား အလုပ်ဆိုသည်မှာ သင်သည် တစ်လလျှင် အများဆုံး ယူရိုငွေ (၄၅ဝ) အထိသာ ရနိုင်သော အလုပ်မျိုး ဖြစ်သည်။ အသေးစား အလုပ်ရှိလျှင်လည်း သင်သည် ကျန်းမာရေးအာမခံနှင့် ပင်စင်အာမခံတို့ အလိုအလျောက် ရရှိပါသည်။  ယင်းစရိတ်များ အားလုံးကို အလုပ်ရှင်က ကျခံရပြီး သင်က ဘာမျှပေးရန်မလိုပါ။ သို့သော် အသေးစား အလုပ်များတွင် အသင်သည် အလုပ်လက်မဲ့အာမခံ မရရှိပါ။

Eine Kellnerin in einem Restaurant stellt Stühle auf die Tische. © Goethe-Institut

ကိုယ်ပိုင်အလုပ်လုပ်ခြင်း

သင်သည် ကိုယ်ပိုင်အလုပ်လုပ်ပါသလား၊ တစ်နည်းအားဖြင့် အသင်သည် ဝန်ထမ်းတစ်ယောက် မဟုတ်ဘူးလား။ ဤသို့ဖြစ်လျှင်လည်း သင်သည် ကျန်းမာရေး အာမခံထားရှိရပါမည်။ သို့သော် သင်သည် ကျန်းမာရေး အာမခံအတွက် သင့်ဘာသာသင် ပေးရမည်ဖြစ်သည်။ ကိုယ်ပိုင်အလုပ် လုပ်လျှင်လည်း ပင်စင်အာမခံထားခြင်းက ကောင်းပါသည်။ လက်မှုအလုပ် တစ်ခုခုလုပ်သူများ၊ စက်ပြင်များ၊ ဝမ်းဆွဲလက်သည်အလုပ်များစသည့် အချို့သော အလုပ်များတွင် ပင်စင်အာမခံ မထားမနေရ ထားရပါသည်။ အသင်သည် အခွန်ရုံးသို့သွားပြီး အခွန်နံပါတ် လျှောက်ထားရပါမည်။ အခွန်ရုံးက သင်၏ ပျမ်းမျှ နှစ်စဉ် ဝင်ငွေအပေါ် မူတည်၍ အသင် အခွန်မည်မျှ ပေးရမည်ကို ဆုံးဖြတ်ပါသည်။ အခွန်ငွေကို အသင်၏ ဘဏ်အကောင့်မှ လွှဲပေးရပါမည်။ အကယ်၍သင်သည် ကိုယ်ပိုင် ကုမ္ပဏီထောင်လိုပါက ကုန်သွယ်မှုလိုင်စင် လိုပါသည်။ ယင်းလိုင်စင်ကို ကုန်သွယ်မှုလိုင်စင်ရုံးတွင် လျှောက်ထားနိုင်ပါသည်။ မြို့တော်ခန်းမတွင် သင်နေထိုင်ရာ မြို့ (သို့) မြို့နယ်ရှိ ကုန်သွယ်မှု လိုင်စင်ရုံး၏ တည်နေရာကို မေးမြန်းနိုင်ပါသည်။ သင်သည် ဆိုင်တစ်ဆိုင် (သို့) စားသောက်ဆိုင်တစ်ဆိုင် ဖွင့်လှစ်လိုပါကလည်း ကုန်သွယ်မှုလိုင်စင် ထားရှိရပါသည်။

Eine Frau sitzt an einem Tisch in ihrer Wohnung und arbeitet am Laptop. © Goethe-Institut

အမေးများသောမေးခွန်းများ

အခြားမေးလိုသည်များရှိပါသေးသလား။ ဤသို့ဆိုလျှင် “ဆက်သွယ်ရန်ဖောင်“ကို ဖြည့်၍ ကျွန်ုပ်တို့ထံသို့ ရေးသား အကြာင်းကြားနိုင်ပါသည်။ ကျွန်ုပ်တို့သည် အသင်၏ အမည်ကို မဖော်ပြဘဲ အသင်၏ဖောင်ကို အကြံပေးပုဂ္ဂိုလ်များနှင့် နိုင်ငံရွှေ့ပြောင်းလာသောလူငယ်များအတွက် အကြံပေးဝန်ဆောင်မှုများဌာနသို့ ဆက်လက် လွှဲပြောင်းပေးသွားမည် ဖြစ်ပါသည်။

“ဆက်သွယ်ရန်ဖောင်“ဆီသို့