Ansicht auf ein leeres Büro mit zwei gegenüberstehenden Schreibtischen © Goethe-Institut

လုပ်ဖော်ကိုင်ဖက်များ

အလုပ်စဝင်သည့် ပထမရက်များတွင် သင်သည် လုပ်ငန်းခွင်အသစ်၊ လုပ်ဖော်ကိုင်ဖက်များနှင့် အလုပ်၏ သဘော၊ သဘာဝတို့ကို နားလည်လာပါလိမ့်မည်။ ရက်အနည်းငယ်ကြာပြီးနောက် သင်၏ လုပ်ဖော်ကိုင်ဖက်များကို ရင်းရင်းနှီးနှီးဖြင့် ဂျာမန်လို “du“ နာမ်စားဖြင့် ပြောဆိုခေါ်ဝေါ် ဆက်ဆံနိုင်ပါသည်။ သို့သော် အထက်လူကြီးများ တစ်နည်းအားဖြင့် အလုပ်ရှင်နှင့် ပြောဆိုဆက်ဆံရာတွင်မူ အမြဲတမ်းနီးပါး လေးလေးစားစား ခေါ်ဝေါ်သည့် အခေါ်အဝေါ်  ဂျာမန်လို “Sie” နာမ်စားဖြင့် ခေါ်ဆိုသုံးနှုန်းရပါမည်။ သို့သော် ဤစည်းမျဥ်းစည်းကမ်းများသည် ကုမ္ပဏီတစ်ခုနှင့်တစ်ခု ကွာခြားနိုင်ပါသည်။ လုပ်ငန်းခွင်သုံး ဂျာမန်ဘာသာစကားကို Goethe-Institut ၏ ဝက်ဘ်ဆိုက်ဒ်တွင် လေ့ကျင့်နိုင်ပါသည်။

ဝန်ထမ်း အကာအကွယ်ပေးခြင်း

ဂျာမနီတွင် ဝန်ထမ်းအကာအကွယ်ပေးခြင်း မူဝါဒထားရှိပါသည်။ ကုမ္ပဏီတစ်ခုသည် ယင်း၏ ဝန်ထမ်းများအတွက် ကျန်းမာရေးနှင့် ဘေးအန္တရာယ်ကင်းရှင်းရေးတို့နှင့် ပတ်သက်သည့် သီးသန့် စည်းမျဥ်း စည်းကမ်းချက်များကို လိုက်နာရပါသည်။ ယင်းတို့တွင် ဥပမာအားဖြင့် လုပ်ငန်းခွင်တွင် လိုအပ်ပါက ဘေးအန္တရာယ် ကင်းရှင်းရေးအတွက် သတ်မှတ်ထားသော အလုပ်ဝတ်စုံ ဝတ်ဆင်ခိုင်းခြင်း၊ ပုံမှန် အလုပ်နားချိန်များ ပေးခြင်းနှင့် အလုပ်ချိန်တို့ ပါဝင်သည်။ ကုမ္ပဏီကြီးများတွင် အလုပ်ကောင်စီဟုခေါ်သည့် အလုပ်သမား ကိုယ်စားလှယ်အဖွဲ့အစည်း ထားရှိပါသည်။ အကယ်၍ အသင့်တွင် ပြဿနာ တစ်စုံတစ်ရာ ရှိပါက အလုပ်ကောင်စီကို တင်ပြ၍ ပြောဆိုဆွေးနွေးနိုင်ပါသည်။ ထိုအခါ အလုပ်ကောင်စီက သင်၏ အလုပ်ရှင်ထံသို့ ဆက်လက် တင်ပြပေးသွားမည် ဖြစ်ပါသည်။

Eine Kellnerin hat ein Tablett mit Gläsern in der Hand, im Hintergrund sind sitzende Personen zu sehen. © Goethe-Institut

အလုပ်ချိန်နှင့် အားလပ်ရက်

တစ်ခါတစ်ရံ ညနေဆိုင်း (သို့) ညဆိုင်း အလုပ်ဆင်းရပါမည်။ သို့မဟုတ် ရုံးအလုပ်လုပ်ပါက အလုပ်ချိန် ပုံသေရှိပါမည်။ နံနက်ပိုင်းတွင် အလုပ်စတင်ပြီး တစ်ရက်လျှင် အလုပ်ချိန် စုစုပေါင်းကြာချိန် (၈) နာရီမှ (၉) နာရီအထိ လုပ်ရပါသည်။ ရုံးတွင် များသောအားဖြင့် အလုပ်ချိန် ပုံသေမထားသည်များလည်း ရှိပါသည်။ ဥပမာအားဖြင့် အသင်သည် နံနက် (၈)နာရီ (သို့) (၉)နာရီတွင် စတင်နိုင်ပြီး ညနေတွင် စောစော (သို့) နောက်ကျ၍ အိမ်ပြန်နိုင်ပါသည်။ အလုပ်တိုင်းတွင် ထမင်းစားနားချိန် မိနစ် (၃၀) သို့မဟုတ် (၁)နာရီ ပေးပါသည်။ ပုံမှန်အားဖြင့် ရက်သတ္တပတ် တစ်ပတ်လျှင် အလုပ်ချိန်စုစုပေါင်း (၃၈) နာရီမှ နာရီ (၄၀) အထိ လုပ်ရပါသည်။ အသင်သည် အချိန်ပိုင်းအလုပ် (၅၀ ရာခိုင်နှုန်း) လည်း လုပ်နိုင်ပါသည်။ အချိန်ပိုင်း အလုပ်လုပ်ပါက တစ်ပတ်လျှင် နာရီ (၂၀) ခန့် အလုပ်လုပ်ရပါသည်။ အကယ်၍ အသင့်တွင် ကလေးရှိပါက (သို့) အခြား ကိုယ်ပိုင် အလုပ်တစ်ခုရှိပါက အချိန်ပိုင်းအလုပ်က အဆင်ပြေပါသည်။
အလုပ်သမားတစ်ဦး တစ်နှစ်တွင် အားလပ်ရက် (သို့) ခွင့်ရက် မည်မျှ ခံစားခွင့် ရှိသည်ကို အတိအကျ သတ်မှတ်ထားပါသည်။ အသင်သည် အားလပ်ရက်ယူလိုပါက တင်ပြတောင်းခံရမည်ဖြစ်ပြီး အသင်၏ အထက်လူကြီးက လက်ခံ သဘောတူညီမှသာ ယူခွင့်ရှိပါသည်။ သို့သော် တစ်ခါတစ်ရံ ရုံးတွင် အလုပ် အရမ်းများနေသောကြောင့် အားလပ်ရက် မယူနိုင်သည်မျိုးလည်း ရှိတတ်ပါသည်။ သို့မဟုတ် ရုံးတစ်ခုလုံး အားလပ်ရက် ယူထားသောကြောင့် အသင်လည်း အားလပ်ရက် ယူလိုက်ရသည်မျိုးလည်း ဖြစ်တတ်ပါသည်။ အားလပ်ရက်ယူထားစဥ်အတွင်း အသင်၏ လုပ်ခလစာကို ဆက်လက် ရရှိနေမည် ဖြစ်ပါသည်။ အကယ်၍ အသင်သည် ဖျားနာ၍ အလုပ်မဆင်းနိုင်ပါက အသင့် အလုပ်ရှင်ကို ချက်ချင်း အကြောင်းကြားပြီး ဆရာဝန်နှင့် ပြသရပါမည်။ ဆရာဝန်က အသင့်ကို ဆေးခွင့် ရေးပေးပါလိမ့်မည်။ ဆေးခွင့်ကို တတ်နိုင်သမျှ အမြန်ဆုံး ရုံးသို့ ပေးပို့ရပါမည်။ မကြာခဏဆိုသလို အလုပ်ရှင်များသည် ဆေးခွင့်ကို နာမကျန်းဖြစ်ပြီး (၃) ရက်လောက်ကြာမှ တောင်းတတ်ပါသည်။ ဤကိစ္စအတွက် Gesundheit (ကျန်းမာရေးအပိုင်း) ကိုလည်းဖတ်ရှုနိုင်ပါသည်။

အလုပ်ယူနီဖောင်း

အလုပ်အချို့တွင် သတ်မှတ်ထားသော အလုပ်ဝတ်စုံကို ဝတ်ရပါသည်။ ဥပမာအားဖြင့် အသင်သည် ဆောက်လုပ်ရေး လုပ်ငန်းခွင်တွင် အလုပ်လုပ်ပါက အသင့်အား ထိခိုက်ဒဏ်ရာရမှုများ မဖြစ်စေရန်အတွက် အကာအကွယ်ဝတ်စုံကို ဝတ်ရပါမည်။ တစ်ခါတစ်ရံ အလုပ်ယူနီဖောင်း ဝတ်ရသည်မျိုးလည်း ရှိပါသည်။ ဥပမာ လေဆိပ်တွင် အလုပ်လုပ်လျှင် ဖြစ်သည်။ သို့မဟုတ် ကုမ္ပဏီ၏ အမှတ်တံဆိပ်ပါသော တီရှပ်တစ်ထည်ကို ဝတ်ဆင်ရသည်မျိုး ရှိပါသည်။ သို့မှသာ ဝယ်ယူသူက အသင့်အား ဤကုမ္ပဏီမှ ဝန်ထမ်းဖြစ်ကြောင်း သိရှိနိုင်မည်ဖြစ်သည်။

Mehrere Köche arbeiten in einer Restaurantküche. Sie tragen Kopftücher und Kochjacken. © Goethe-Institut

အလုပ်ထွက်ခြင်း

အသင်သည် အသင်အလုပ်လုပ်သော ကုမ္ပဏီတွင် ဆက်လက် အလုပ်မလုပ်နိုင်တော့ပါက (သို့) မလုပ်လိုပါက အလုပ်ထွက်ရပါမည်။ အလုပ်ထွက်လိုပါက မဖြစ်မနေ အလုပ်ထွက်စာ တင်ရပါမည်။ အလုပ်ထွက်စာတင်ရာတွင် သတ်မှတ်ထားသည့်အချိန် (၃ လ ကြိုတင်၍) တင်ရပါမည်။

မိမိ၏ အရည်အချင်း၊ အရည်အသွေးများကို မြှင့်တင်ရန်အတွက် ပညာများ ဆက်လက်သင်ယူခြင်း

အကယ်၍ အသင်သည် အလုပ်သင်တက်ပြီးပြီ (သို့) တက္ကသိုလ်ပြီးမြောက်ပြီး အချိန်ကာလ တစ်ခုတိုင်အောင် အလုပ်လည်း လုပ်ခဲ့ပြီးပြီဆိုပါက အသင့်၏ အရည်အချင်းနှင် အရည်အသွေးများကို မြှင့်တင်ရန်အတွက် ပညာများ ဆက်လက် သင်ယူနိုင်ပါသည်။ ဤနည်းအားဖြင့် အသင်သည် အသင့်၏ အသိပညာနှင့် ဗဟုသုတများကို တိုးပွားအောင် လုပ်နိုင်ပါသည်။ Volkshochschule ဟုခေါ်သည့် လူကြီးသင်တန်းကျောင်းများတွင် တက်ရောက်နိုင်သည့် သင်တန်းများစွာရှိပြီး အသိပညာများစွာ သင်ယူနိုင်ပါသည်။

Eine Frau sitzt an einem Tisch in ihrer Wohnung und telefoniert. Auf dem Tisch liegen Papiere und ein Laptop. © Goethe-Institut

အမေးများသောမေးခွန်းများ