အလုပ်လုပ်ခွင့်ပါမစ်
သင်သည် ဥရောပသမဂ္ဂအဖွဲ့ (EU) သို့မဟုတ် ဥရောပစီးပွားရေးဇုန်၏ ပြင်ပမှလာသူ ဖြစ်ပါက ဂျာမနီတွင် အလုပ်လုပ်လိုလျှင် အလုပ်လုပ်ခွင့် ပါမစ်ရှိရန်လိုပါသည်။ ဂျာမနီနိုင်ငံတွင် သင့်အား အလုပ်လုပ်ခွင့်ပြုသည် မပြုသည်နှင့် မည်မျှခန့် အလုပ်လုပ်ခွင့် ပြုသည်တို့ကို အသင့်၏ နေထိုင်ခွင့်ပါမစ်တွင် ဖော်ပြထားသည်။
လက်မှတ်များနှင့် ၎င်းတို့အား အသိအမှတ်ပြုမှု
အသင့်တွင် အသင့်မိခင်နိုင်ငံမှ အလုပ်သင်ယူပြီးမြောက်ခြင်းလက်မှတ်၊ တက္ကသိုလ်ဘွဲ့လက်မှတ် (သို့) အထက်တန်း သင်ယူပြီးမြောက်ခြင်းလက်မှတ် စသည်တို့ ရှိပါသလား။ ဤသို့ဆိုလျှင် သင်သည် ယင်းလက်မှတ်များနှင့် စာရွက် စာတမ်းများကို အစစ်အမှန်ဖြစ်ကြောင်း ထောက်ခံပေးသည့် သက်သေအထောက်အထား ပြုလုပ်ထားရန် လိုပါသည်။ အစစ်အမှန်ဖြစ်ကြောင်း သက်သေအထောက်အထား လုပ်ခြင်းဆိုသည်မှာ တရားဝင် အာဏာပိုင်အဖွဲ့အစည်းတစ်ခုက သင်၏ စာရွက်စာတမ်းများကို စစ်ဆေးပြီး စစ်မှန်ကြောင်း အတည်ပြု ထောက်ခံပေးခြင်း ဖြစ်ပါသည်။ ယင်းသို့ ပြုလုပ်ရန်အတွက် သင့်မိခင်နိုင်ငံရှိ အာဏာပိုင် အဖွဲ့အစည်းတစ်ခု (နိုတြီဆိုင်များ) တွင် အစစ်ဆေးခံမှု၊ တစ်နည်းအားဖြင့် ဘာသာပြန်မှု ပြုလုပ်၍ တရားသူကြီး လက်မှတ်ရေးထိုးရပါသည်။ တစ်ခါတစ်ရံတွင် သင်၏ အရည်အချင်းလက်မှတ်သည် ဂျာမနီနိုင်ငံတွင် တရားမဝင်ဘဲ ဖြစ်နေတတ်ပါသည်။ သင်သည် သင့်နိုင်ငံတွင် ရှိနေစဉ်ကတည်းကပင် အသင်၏ လက်မှတ်များ ဂျာမနီတွင် တရားဝင်ခြင်း ရှိမရှိ စစ်ဆေးနိုင်ပါသည်။
ဤကိစ္စအတွက် “Recognition in Germany“ ဝက်ဘ်ဆိုက်ဒ်တွင် ဝင်ရောက်ကြည့်ရှုနိုင်ပါသည်။ ကျွန်ုပ်တို့၏ သတင်းအချက်အလက်ပြ ဂရပ်ဖစ်များကိုလည်း ကြည့်နိုင်ပါသည်။
လစ်လပ်နေသော အလုပ်နေရာများ
သင့်တွင် အလုပ်လုပ်ခွင့် ပါမစ်ရှိပါသလား။ ရှိပါက အလုပ်တစ်ခု ရှာနိုင်ပါသည်။ ရှာရန်အတွက် နည်းလမ်းများစွာ ရှိပါသည်။ သင်သည် အင်တာနက်၊ သတင်းစာ (သို့) အလုပ်အေဂျင်စီ/ဌာနများတွင် ကြော်ငြာထားသော အလုပ်များကို ရှာဖွေနိုင်ပါသည်။ သတင်းစာတွင် များသောအားဖြင့် ထိုနယ်ပယ် ဒေသအတွင်းရှိ အလုပ်များကိုသာ ကြော်ငြာထည့်လေ့ရှိပါသည်။ သို့သော် ထိုကြော်ငြာများသည် လက်ရှိခေါ်နေသော အလုပ်များဖြစ်ပါသည်။ အင်တာနက်တွင်မူ ကြော်ငြာ အမြောက်အများ တွေ့ရှိနိုင်သော်လည်း မကြာခဏဆိုသလို ကြော်ငြာအဟောင်းများ ဖြစ်နေတတ်ပါသည်။ အလုပ်အေဂျင်စီ/ ဌာနများက သင့်အား အကြံဥာဏ်များ ပေးနိုင်ပြီး သင့်အတွက် သင့်တော်သော အလုပ်များကို ရှာဖွေပေးနိုင်ပါသည်။ သင်သည် ကုမ္ပဏီများသို့ တိုက်ရိုက်လည်း ဆက်သွယ်မေးမြန်းနိုင်ပါသည်။ တစ်ခါတစ်ရံတွင် ကုမ္ပဏီများသည် လစ်လပ်နေသော အလုပ်နေရာများရှိသော်လည်း ယင်းတို့ကို အင်တာနက် (သို့) သတင်းစာတွင် မကြော်ငြာထားသည်များ ရှိတတ်ပါသည်။ တစ်ခါတစ်ရံ ကုမ္ပဏီ၏ ဝက်ဘ်ဆိုက်ဒ်တွင်လည်း အလုပ်ကြော်ငြာများ တွေ့နိုင်ပါသည်။
အလုပ်အကိုင်ခန့်ထားရေးအေဂျင်စီ၏ BIZ (အလုပ်အကိုင် သတင်းအချက်အလက်ပေးဌာန) ရှိပါသည်။ ယင်းတွင် အလုပ်ကြော်ငြာများအပြင် အလုပ်အကိုင်နှင့် ပတ်သက်သည့် သတင်းအချက်အလက် အများအပြားကိုလည်း ရရှိနိုင်ပါသည်။ သင်သည် သင်၏ ကိုယ်ရေးရာဇဝင်ကို အင်တာနက်မှတစ်ဆင့် BIZ တွင် (သို့) အလုပ်အေဂျင်စီတွင် ကြော်ငြာအနေဖြင့် တင်ထားနိုင်ပါသည်။ အကယ်၍ အသင် မည်သည့် အလုပ်ကို လုပ်နိုင်သည် (သို့) လုပ်လိုသည်ကို သေချာစွာမသိသေးပါက BIZ ဌာနတွင် အလုပ်အကိုင် အကြံပေး ဝန်ဆောင်မှုကို ရယူနိုင်ပါသည်။
အလုပ်တစ်ခုတွင် (Praktikum) ဟုခေါ်သည့် ရက်သတ္တပတ်အချို့ (သို့) လအနည်းငယ်ခန့် လက်တွေ့ဆင်း၍ ထိုအလုပ်ကို စမ်းကြည့်ခြင်းကလည်း သင့်အတွက် အထောက်အကူပြုနိုင်ပါသည်။ ဤနည်းအားဖြင့် အသင်သည် ထိုအလုပ်ကို သိကျွမ်းလာမည်ဖြစ်ပြီး အဆက်အသွယ်များလည်း ရရှိလာမည်ဖြစ်သည်။
အလုပ်လျှောက်ခြင်း
အလုပ်လျှောက်ထားခြင်းဖြင့် အသင်သည် အလုပ်အကိုင်ဈေးကွက်အတွင်းသို့ ပထမဦးဆုံး စတင် ခြေလှမ်းလှမ်းလိုက်ခြင်းပင် ဖြစ်သည်။ ထို့ကြောင့် စာရွက်စာတမ်းများကို ကောင်းမွန်သေချာစွာ ပြင်ဆင်ရန် အလွန် အရေးကြီးပါသည်။ သင်သည် ကုမ္ပဏီသို့ ပေးပို့သည့် အလုပ်လျှောက်စာနှင့် အတူ၊ ကောင်းမွန်သာဓာတ်ပုံ၊ အသင့်၏ ကိုယ်ရေးရာဇဝင်နှင့် ဘွဲ့လက်မှတ်များ၊ အခြားသော အောင်လက်မှတ်များ စသည်တို့ကို ပူးတွဲတင်ပြရပါမည်။ အလုပ်လျှောက်သည့် ဓာတ်ပုံကောင်း၊ ကိုယ်ရေးရာဇဝင်နှင့်သင်၏ အထောက်အထားလက်မှတ်များ (ဂျာမန်ဘာသာဖြင့်) လိုပါသည်။ BIZ ဌာနတွင် "ဂျာမနီတွင် အလုပ်လျှောက်ထားခြင်း" ဆိုင်ရာ ဆွေးနွေးပွဲများ ကျင်းပလေ့ရှိပါသည်။ ထိုဆွေးနွေးပွဲများတွင် အလုပ်လျှောက်စာ မည်သို့ရေးရမည်၊ အလုပ်အင်တာဗျူးအတွက် မည်သို့ ပြင်ဆင်ထားရမည် စသည်များကို လေ့လာနိုင်ပါသည်။
များစွာသော မြို့များတွင် နိုင်ငံ ရွှေ့ပြောင်းလာကြသူများအတွက် အကြံပေးဌာနများရှိပါသည်။ ထိုဌာနများတွင် အသင့်အား အလုပ်ရှာဖွေခြင်း၊ အလုပ်လျှောက်လွှာရေးခြင်း စသည့်ကိစ္စများနှင့် ပတ်သက်၍လည်း အကြံဥာဏ်များ ပေးပါသည်။ ဤကိစ္စနှင့် ပတ်သက်၍ (Federal Office for Migration and Refugees) ဝက်ဘ်ဆိုက်ဒ်ကိုလည်း ဝင်ရောက် ကြည့်ရှုပါ။ နိုင်ငံရွှေ့ပြောင်းလာကြသူများအတွက် လူငယ် အကြံပေးဝန်ဆောင်မှုများ ဌာနကလည်း အသက် (၂၇) နှစ် အထိ လူငယ်များအတွက် အထူးအကြံဥာဏ် ပေးပါသည်။
အမေးများသော မေးခွန်းများ
အခြားမေးလိုသည်များရှိပါသေးသလား။ ဤသို့ဆိုလျှင် “ဆက်သွယ်ရန်ဖောင်“ကို ဖြည့်၍ ကျွန်ုပ်တို့ထံသို့ ရေးသား အကြာင်းကြားနိုင်ပါသည်။ ကျွန်ုပ်တို့သည် အသင်၏ အမည်ကို မဖော်ပြဘဲ အသင်၏ဖောင်ကို အကြံပေးပုဂ္ဂိုလ်များနှင့် နိုင်ငံရွှေ့ပြောင်းလာသောလူငယ်များအတွက် အကြံပေးဝန်ဆောင်မှုများဌာနသို့ ဆက်လက် လွှဲပြောင်းပေးသွားမည် ဖြစ်ပါသည်။
“ဆက်သွယ်ရန်ဖောင်“ဆီသို့
