Ein Mann schaut aus einem Fenster und lacht dabei. © Goethe-Institut

နိုင်ငံကူးလက်မှတ်နှင့် ဗီဇာ

ဂျာမဏီနိုင်ငံသို့ သွားရောက်လည်ပတ်ရန်အတွက် သင့်တွင် တရားဝင်နိုင်ငံကူးလက်မှတ် သို့မဟုတ် သင်မည်သူမည်ဝါ ဖြစ်ကြောင်း အထောက်အထား စာရွက်စာတမ်းလိုပါသည်။ သင်သည် နောင်တွင် အာဏာပိုင်အဖွဲ့ အစည်းတစ်ခုတွင် မှတ်ပုံတင်သောအခါတွင်လည်း နိုင်ငံကူးလက်မှတ် လိုအပ်ပါသည်။ ဥရောပသမဂ္ဂအဖွဲ့(EU) ဝင်မဟုတ်သည့် နိုင်ငံများတွင် နေထိုင်သူများသည်လည်း ဗီဇာလိုအပ်ပါသည်။ 

သင်သည် သင့်နိုင်ငံရှိ ဂျာမဏီသံရုံး(ကောင်စစ်ဝန်ရုံး)တွင် ဗီဇာလျှောက်ထားနိုင်ပါသည်။ သင်သည် ဂျာမဏီနိုင်ငံတွင် အလုပ်ခန့်ထားသည့် စာချုပ်ရှိထားပြီးဖြစ်ပါသလား သို့မဟုတ် ဂျာမဏီတွင်နေထိုင်လျက်ရှိသည့် သင်၏ မိသားစုဝင်များရှိပါသလား။ ရှိသည်ဆိုလျှင် ဗီဇာရရှိရန် ပိုမိုလွယ်ကူပါသည်။ သင်သည် ဗီဇာနှင့်ပတ်သက်သည့် အချက်အလက်များကို ပြည်ထောင်စု နိုင်ငံခြားရေး ရုံးတွင် ရှာဖွေနိုင်ပါသည်။

ဥရောပသမဂ္ဂအဖွဲ့ဝင်နိုင်ငံများသို့မဟုတ် ဥရောပစီးပွားရေးဇုန်တွင် ပါဝင်သော နိုင်ငံတစ်နိုင်ငံမှ ပြည်သူများသည် ဗီဇာမလိုပါ။

Auf einer Hauswand sieht man ein Schild, das zum Bundesamt für Migration und Flüchtlinge führt. © Goethe-Institut

နေထိုင်သူများ၏ မှတ်ပုံတင်ရုံးနှင့် နေထိုင်ခွင့်ပါမစ်  

ဂျာမဏီနိုင်ငံတွင် သင်သည် သင်နေထိုင်လျက်ရှိသည့် မြို့/မြို့နယ်ရှိ Einwohnermeldeamt (နေထိုင်သူများ၏ မှတ်ပုံတင်ရုံး)တွင် မှတ်ပုံတင်ရန် လိုပါသည်။ ထို့နောက် သင်သည် Ausländeramt (လူဝင်မှုကြီးကြပ်ရေးရုံး) သို့သွားရပါမည်။ ယင်းရုံးတွင် သင့်အား နေထိုင်ခွင့်ပါမစ် ထုတ်ပေးမည်ဖြစ်သည်။ ယင်းပါမစ်တွင် သင်၏ နေထိုင်မှု အဆင့်ကို ဖော်ပြထားသည်။ ယင်းတွင် သင့်အား ဂျာမဏီနိုင်ငံတွင် နေထိုင်ခွင့်ပေးထားသည့် ကာလအတိုင်းအတာနှင့် သင့်အား အလုပ်လုပ်ခွင့်ပေးထားသည့် နေရာတို့ကို ဖော်ပြထားသည်။ 

သင်သည် ရုံးတစ်ရုံးသို့သွားရန် လိုအပ်နေသော်လည်း ဂျာမန်စကားကို ကောင်းစွာမပြောတတ်ဘဲ ဖြစ်နေပါသလား။ ယင်းသို့ဆိုလျှင် သင်သည် စကားပြန်တစ်ယောက် တောင်းခံနိုင်ပါသည်။ စကားပြန်မှာ ဂျာမန်စကားနှင့် သင်၏ မိခင်ဘာသာစကားတို့ကို ပြောတတ်သူ၊ သင်ပြောဆိုဆက်ဆံနိုင်ရန်အတွက် သင့်အား အကူအညီပေးမည့်သူ ဖြစ်သည်။  

ပေါင်းစည်းသင်တန်း

အကယ်၍သင်သည် ဂျာမန်စကားကို ကောင်းစွာမပြောတတ်ပါက သင့်အား ပေါင်းစည်းသင်တန်း တက်ရောက်ခွင့် ပြုပါသည်။ တစ်ခါတစ်ရံတွင် သင်သည် ပေါင်းစည်းသင်တန်း တက်ရောက်ရပါသည်။ သင်သည် ယင်းသင်တန်းတွင် ပိုမိုကောင်းမွန်သော ဂျာမန်ဘာသာစကားကို သင်ယူရမည်ဖြစ်သည်။ ထို့ပြင် သင့်အားဂျာမဏီနိုင်ငံရှိ လူနေမှုဘဝနှင့်ပတ်သက်သည့် အချက်အလက်များကိုလည်း ပေးမည်ဖြစ်သည်။ လူဝင်မှုကြီးကြပ်ရေးရုံးက သင့်အား သင်တန်းဆင်းလက်မှတ် ပေးပါသည်။ ယင်းလက်မှတ်တွင် သင် သင်တန်းတက်ရောက်နိုင်သည့်နေရာကို ဖော်ပြထားပါသည်။ ယင်းနှင့်ပတ်သက်သည့် အသေးစိတ် အချက်အလက်များကို ပေါင်းစည်းသင်တန်းလင့်ခ်တွင် ဖတ်ရှုနိုင်ပါသည်။ 

Ein Kursteilnehmer lacht in die Kamera. Er befindet sich im Klassenzimmer. © Goethe-Institut

အလုပ်နှင့် သက်မွေးဝမ်းကျောင်းသင်တန်း ရှာဖွေခြင်း

နောက်တစ်ဆင့်မှာ အလုပ်ရှာဖွေခြင်းဖြစ်သည်။ သင်သည် သက်မွေးဝမ်းကျောင်းပညာကို သင့်နိုင်ငံတွင် သင်ယူပြီးဖြစ်ပါသလား သို့မဟုတ် သင်သည် တက္ကသိုလ်တက်ရောက်ပြီးသူ ဖြစ်ပါသလား။ ပြီးပြီဆိုပါကယင်းစာရွက်စာတမ်းများကို ဘာသာပြန်ဆိုရန်နှင့် ထောက်ခံချက်ရယူရန် လိုအပ်ပါသည်။ အလုပ်ခန့်ထားမှုအေဂျင်စီ၌ သင်မည်သည့်နေရာတွင် ပြုလုပ်ရမည်ကို မေးမြန်းပါ။ အလုပ်ခန့်ထားမှု အေဂျင်စီသည် သင်အလုပ်ရရှိရန်အတွက်လည်း အကူအညီပေးမည် ဖြစ်သည်။ အကယ်၍သင့်တွင် သက်မွေးဝမ်းကျောင်းပညာ မရှိ သို့မဟုတ် ပညာအရည်အချင်း မရှိပါကလည်း သင်သည် အလုပ်ခန့်ထားမှု အေဂျင်စီသို့သွားရန် လိုပါသည်။ သူတို့က သင့်အား အလုပ်အကိုင်နှင့်ပတ်သက်သည့် အကြံဥာဏ်များ ပေးမည် ဖြစ်သည်။ သင်သည် မည်သည့် အလုပ်မျိုးကို လုပ်ချင်သည် သို့မဟုတ် လုပ်လိုသည်ကို သေချာစွာမသိပါကသူတို့က သင့်အား အကူအညီပေးမည်ဖြစ်သည်။ အလုပ်ခန့်ထားမှု အေဂျင်စီသည် အလုပ်သင်အလုပ်များနှင့် သင်တန်းများနှင့်ပတ်သက်သည့် အချက်အလက်များကိုလည်း ပေးမည်ဖြစ်သည်။ ယင်းနှင့်ပတ်သက်၍ အသေးစိတ် အချက်အလက်များကို ပညာရေးသင်ယူမှုနှင့် သက်မွေးသင်တန်းစာမျက်နှာတွင် ကြည့်ရှုနိုင်ပါသည်။ 

ကလေးများနှင့် ကျောင်း

ကလေးများသည် ကျောင်းတက်ရန်လိုပါသည်။ သင့်ကလေးကို ကျောင်းတစ်ကျောင်းတွင် အပ်ပါ။ သင်နေထိုင်ရာ မြို့/မြို့နယ်ရှိThe Jugendamt (ကလေးများရုံး) က အကူအညီပေးနိုင်ပါသည်။ အသေးစိတ် အချက်အလက်များကို အောက်ပါ စာမျက်နှာများ (ကလေးငယ်ပညာရေးနှင့် ကျောင်းစနစ်)တွင် ဖတ်ရှုနိုင်ပါသည်။ 

အာမခံထားခြင်း

အာမခံထားသည့် အစီအစဉ်များအနက် အချို့ အထူးသဖြင့် ကျန်းမာရေးအာမခံ၊ ပင်စင်အာမခံနှင့် ပြုစုစောင့်ရှောက်မှုအာမခံတို့မှာ အလွန်အရေးကြီးပါသည် (ကျန်းမာရေးအာမခံများစာမျက်နှာတွင် ကြည့်ရှုပါ)။ အကယ်၍သင့်တွင် အလုပ်ရှိပါက သင့်အား ယင်းအစီအစဉ်များတွင် အလိုအလျောက် အာမခံထားပေးမည်ဖြစ်သည် (အလုပ်စတင်ခြင်း စာမျက်နှာတွင် ကြည့်ရှုပါ)။ ထို့ပြင် သင်သည် ဘဏ်တစ်ခုတွင် ငွေစာရင်းဖွင့်ထားရန်လည်း လိုအပ်ပါသည် (ဘဏ်အကောင့်နှင့် ငွေရေးကြေးရေး စာမျက်နှာတွင် ကြည့်ရှုပါ)။ 

အရေးကြီးသောလိပ်စာများ

သင်သည် ပေါင်းစည်းသင်တန်းပေးသူများ သို့မဟုတ် လူဝင်မှုကြီးကြပ်ရေးရုံးကို ရှာဖွေနေပါသလား။ အရေးကြီးသော လိပ်စာများ ခေါင်းစဉ်အောက်တွင် သင်နေထိုင်ရာ အနီးအနားရှိ ယင်းလိပ်စာများကို သင်ရှာဖွေနိုင်ပါသည်။ ယင်းသို့ ရှာဖွေပါက မြေပုံပေါ်တွင် လိပ်စာ သို့မဟုတ် တယ်လီဖုန်းနံပါတ် စသည့် အချက်အလက်များပါဝင်သည့် ရလဒ်များကို သင်တွေ့ရှိမည်ဖြစ်သည်။ 

အမေးများသော မေးခွန်းများ

အခြားမေးလိုသည်များရှိပါသေးသလား။ ဤသို့ဆိုလျှင် “ဆက်သွယ်ရန်ဖောင်“ကို ဖြည့်၍ ကျွန်ုပ်တို့ထံသို့ ရေးသား အကြာင်းကြားနိုင်ပါသည်။ ကျွန်ုပ်တို့သည် အသင်၏ အမည်ကို မဖော်ပြဘဲ အသင်၏ဖောင်ကို အကြံပေးပုဂ္ဂိုလ်များနှင့် နိုင်ငံရွှေ့ပြောင်းလာသောလူငယ်များအတွက် အကြံပေးဝန်ဆောင်မှုများဌာနသို့ ဆက်လက် လွှဲပြောင်းပေးသွားမည် ဖြစ်ပါသည်။

“ဆက်သွယ်ရန်ဖောင်“ဆီသို့