In einem offenen Geldbeutel sind Münzen, Geldscheine und Kreditkarten zu sehen. Der Geldbeutel liegt auf einer Zeitung. © Goethe-Institut

ဘဏ်အကောင့်

အကယ်၍ သင်သည် ဂျာမနီနိုင်ငံတွင် နေထိုင် အလုပ်လုပ်ပါက ဘဏ်အကောင့်ရှိရန် လိုပါသည်။ ဘဏ်အကောင့်ကို ဘဏ် (သို့) ငွေစုဘဏ် (Sparkasse) တွင် ဖွင့်နိုင်ပါသည်။ ဘဏ်နှင့် ငွေစုဘဏ်အများစုတွင် ဘဏ်ခွဲများ ရှိပါသည်။ အသင် အင်တာနက်မှ တစ်ဆင့်သာ အသုံးပြုနိုင်သည့် ဘဏ်အချို့လည်း ရှိပါသည်။ များသောအားဖြင့် ဘဏ်အကောင့် ဖွင့်ရန်အတွက် အခကြေးငွေအနည်းငယ် ပေးရတတ်ပါသည်။ ကျောင်းသားများနှင့် တက္ကသိုလ် ကျောင်းသားများအတွက်မူ အခမဲ့ဖြစ်ပါသည်။ ဘဏ်အကောင့် အမျိုးအစား အမျိုးမျိုးရှိပါသည်။ သင့် ဘဏ်အကောင့်ထဲတွင် သင်ကြိုတင် ထည့်ထားသော ငွေကိုသာ ထုတ်နိုင်သည့် အကောင့်အမျိုးအစား (Guthaben-Konto) နှင့် သင့်ဘဏ်အကောင့်ထဲတွင် ငွေလက်ကျန်မရှိတော့သည့်တိုင်အောင် ထုတ်ယူနိုင်သည့် အကောင့် (Dispo) တို့ရှိပါသည်။ ယင်းအကောင့်အတွက် ဘဏ်က သင့်ကို သတ်မှတ်ထားသော ငွေပမာဏ အတိုင်းအတာတစ်ခုအထိ ထုတ်ချေးပါသည်။ သို့ရာတွင် သင်သည် ယင်းငွေသာမက အတိုးကိုပါ ပြန်ဆပ်ရမည်ဖြစ်ပြီး အတိုးနှုန်းမှာ မြင့်မားတတ်ပါသည်။ 

ဘဏ်အကောင့်ဖွင့်ခြင်း

သင်သည် ဘဏ်အကောင့်ဖွင့်လိုပါသလား။ မည်သည့် ဘဏ်ခွဲတွင်မဆို ဖွင့်နိုင်ပါသည်။ သို့သော် ပထမဦးစွာ ဘဏ်(သို့) ငွေစုဘဏ်က အသင် မည်သူမည်ဝါဖြစ်ကြောင်း အထောက်အထားကို စစ်ဆေးမည် ဖြစ်သည်။ ထို့ကြောင့် အသင့်၏ မှတ်ပုံတင်ကတ်ပြား(သို့) နိုင်ငံကူးလက်မှတ်ကို ပြသရန်လိုပါသည်။
ဘဏ်များစွာတို့တွင် ဘဏ်အကောင့်ကို အွန်လိုင်း၊ စာတိုက်တို့မှတစ်ဆင့်လည်း ဖွင့်နိုင်ပါသည်။ ယင်းသို့ဖွင့်ရန်အတွက် သင်သည် စာတိုက် သက်သေခံ အထောက်အထား လုပ်ထုံးလုပ်နည်းအတိုင်း လုပ်နိုင်ပါသည်။ ဤအတွက် ဘဏ်က သင့်ထံ ပုံစံစာရွက်များ ပို့ပေးမည်ဖြစ်ပြီး သင်သည် ယင်းစာရွက်စာတမ်းများနှင့် သက်သေခံလက်မှတ် (သို့) နိုင်ငံကူးလက်မှတ်တို့ကိုယူ၍ စာတိုက်သို့ သွားရပါမည်။ စာတိုက်တွင် သင် မည်သူမည်ဝါဖြစ်ကြောင်း သက်သေ အထောက်အထား စစ်ဆေးပါမည်။ တစ်ခါတစ်ရံတွင် ဘဏ်အကောင့် ဖွင့်ရန်အတွက် စာရင်းသွင်းဖောင်လည်း လိုပါသည်။ 

Ein Mann sitzt an einem Laptop und tätigt eine Online-Überweisung. © Goethe-Institut

ငွေလွှဲခြင်း

သင်၏ အိမ်ခန်းငှားခနှင့် လစာအတွက် သင်သည် စာရင်းရှင်ဘဏ်အကောင့် (Girokonto) ရှိရန် လိုပါသည်။ သင်၏ အလုပ်ရှင်က သင်၏လစာကို အကောင့်ထဲသို့ လွှဲပေးပါလိမ့်မည် ။ အိမ်ခန်းငှားခကိုလည်း ပုံမှန်အားဖြင့် အကောင့်မှတစ်ဆင့် လွှဲပေးရပါသည်။ သင်သည် အမြဲပြုလုပ်နေရသော (သို့) ပုံမှန်ပြုလုပ်နေရသော ငွေလွှဲမှုများအတွက် ပုံမှန်ငွေလွှဲစာရင်းတစ်ခု ဖွင့်ထားနိုင်ပါသည်။ အခြားသော ငွေလွှဲမှုများအတွက်မူ သင်သည် ဘဏ် (သို့) ငွေစုဘဏ်သို့ သွား၍ ပုံစံစာရွက်ပေါ်တွင် သင် ငွေမည်မျှ လွှဲလိုပါသနည်း၊ မည်သူ့ဆီသို့ လွှဲလိုပါသနည်း စသည်ဖြင့် ငွေလွှဲမှုနှင့် ပတ်သက်သည့် အချက်အလက်များကို ရေးသွင်း၍ ဘဏ်တွင် ပေးအပ်ရပါမည်။ အကယ်၍ အသင်သည် အင်တာနက် (သို့) အွန်လိုင်းမှတစ်ဆင့် ငွေလွှဲမှုများ ပြုလုပ်လိုပါက အကောင့် စတင် ဖွင့်ချိန်ကတည်းက Online-Banking (သို့) Home-Banking အသုံးပြုလိုကြောင်း သူတို့ကို အသိပေးပြောကြားပါ။ 
 
(၂၀၁၈) စာရင်းတမ်းကိုးကားချက်အရ (၂၀၁၄) ခုနှစ် မှစတင်၍ ဥရောပ (၃၄)နိုင်ငံတွင် SEPA ငွေပေးချေစနစ်ကို အသုံးပြုပါသည်။ ဤစနစ်ဖြင့် ယူရိုငွေကို လွယ်ကူမြန်ဆန်စွာ လွှဲနိုင်ပါသည်။ IBAN သည် အကောင့်နံပါတ်ကို ဆိုလိုပြီး BIC ကမူ ဘဏ်နံပါတ်ကို ဆိုလိုပါသည်။ IBAN နှင့် BIC နံပါတ်များကို ဥပမာအားဖြင့် EC ကတ်ပေါ်တွင် တွေ့ရှိနိုင်ပါသည်။

Eine Person zieht eine Kreditkarte aus einem Geldbeutel. © Goethe-Institut

EC ကတ်နှင့် အကြွေးဝယ်ကတ် (သို့) ခရက်ဒစ်ကတ်

သင်၏ စာရင်းရှင်အကောင့်အတွက် သင့်အား ဘဏ်က EC ကတ် ထုတ်ပေးမည်ဖြစ်သည်။ အကယ်၍ သင် ဆန္ဒရှိပါက အကြွေးဝယ်ကတ် (ဥပမာ MasterCard၊ Visa) ကိုလည်း ရနိုင်ပါသည်။ အကြွေးဝယ်ကတ် ပြုလုပ်ရန်အတွက် ပုံမှန်အားဖြင့် ငွေအနည်းငယ် ပေးရပါသည်။ ဘဏ်က သင့်အား EC ကတ်ကို (သို့)  အကြွေးဝယ်ကတ်ကို (သို့) နှစ်မျိုးစလုံးကို စာတိုက်မှတစ်ဆင့် ပေးပို့လေ့ရှိသည်။ သင်သည် ကတ်ပေါ်တွင် လက်မှတ် ရေးထိုးရပါမည်။ ရက် အနည်းငယ် ကြာပြီးနောက် သင်သည် သင်၏ ကတ်အတွက် လျှို့ဝှက် ကုတ်နံပါတ်ဖြစ်သည့် PIN နံပါတ်ကို စာတိုက်မှတစ်ဆင့် လက်ခံရရှိမည်ဖြစ်ပါသည်။ သင်သည် PIN နံပါတ်ကို အမြဲ မှတ်မိနေရန် လိုပါသည်။

သင်သည် EC ကတ်ဖြင့် ATM ငွေထုတ်စက်များ အားလုံးတွင် ငွေထုတ်နိုင်ပါသည်။ ယင်းသို့ထုတ်ရန် အတွက် သင်သည် PIN နံပါတ် အမြဲလိုပါသည်။ သင်သည် ဆိုင်အချို့နှင့် အင်တာနက်တို့တွင် အကြွေးဝယ်ခွင့် ကတ်ဖြင့် ငွေပေးချေနိုင်ပါသည်။ အကောင့်အတွင်းသို့ ငွေသွင်းလိုပါက သင့်ဘဏ် (သို့) ငွေစုဘဏ်၏ ဘဏ်ခွဲများတွင် သွင်းနိုင်ပါသည်။
အကယ်၍ အသင့်ရဲ့ EC ကတ် (သို့) အကြွေးဝယ်ခရက်ဒစ်ကတ် ပျောက်ဆုံးသွားပါက (သို့) အခိုးခံရပါက တတ်နိုင်သမျှ အမြန်ဆုံး ကတ်ကို ပိတ်ပင်ရန်လိုအပ်ပါသည်။ ကတ်ပိတ်ပင်ရန်အတွက် အရေးပေါ်နံပတ် (၁၁၆၁၁၆) ကို ခေါ်ဆိုပါ။

အတိုး

သင့်ဘဏ်အကောင့်ထဲရှိ ငွေပမာဏပေါ် မူတည်၍ သင်သည် အတိုး ရရှိမည် ဖြစ်ပါသည်။ (Girokonto) အကောင့်အတွက် ရရှိသော အတိုးနှုန်းမှာ နည်းပါသည်။ အကယ်၍ ငွေစုလိုပါက သင်သည် နေ့စဥ် ငွေထုတ်နိုင်သည့် အကောင့် (သို့) ငွေစုအကောင့် ဖွင့်နိုင်ပါသည်။ ထိုအခါ သင့်အား (Girokonto) အကောင့်ထက် အနည်းငယ် ပိုများသော အတိုးနှုန်းကို ပေးမည် ဖြစ်ပါသည်။

အမေးများသောမေးခွန်းများ

အခြားမေးလိုသည်များရှိပါသေးသလား။ ဤသို့ဆိုလျှင် “ဆက်သွယ်ရန်ဖောင်“ကို ဖြည့်၍ ကျွန်ုပ်တို့ထံသို့ ရေးသား အကြာင်းကြားနိုင်ပါသည်။ ကျွန်ုပ်တို့သည် အသင်၏ အမည်ကို မဖော်ပြဘဲ အသင်၏ဖောင်ကို အကြံပေးပုဂ္ဂိုလ်များနှင့် နိုင်ငံရွှေ့ပြောင်းလာသောလူငယ်များအတွက် အကြံပေးဝန်ဆောင်မှုများဌာနသို့ ဆက်လက် လွှဲပြောင်းပေးသွားမည် ဖြစ်ပါသည်။

“ဆက်သွယ်ရန်ဖောင်“ဆီသို့