Auf einem Tisch steht eine Tüte mit dem Apotheken-Symbol. Daneben stehen verschiedene Medikamente, Handtücher und eine Wärmflasche. © Goethe-Institut

နေမကောင်းဖြစ်လျှင်ဘာလုပ်မလဲ။

အအေးမိခြင်း၊ ခေါင်းကိုက်ခြင်း စသည့် ရောဂါအသေးစားများအတွက် ဆေးဆိုင်တွင် ဆေးဝယ်နိုင်ပါသည်။ သို့သော် ဆေးအများစုကို ဆေးစာပါမှသာ ဝယ်ယူနိုင်ပါသည်။ ဆေးစာသည် ဆရာဝန်တစ်ဦးမှ ရေးသားထားခြင်း ဖြစ်ရပါမည်။ ဆေးစာကို ပြ၍ ဆေးဆိုင်တွင် ဆေးဝယ်နိုင်ပြီး ကုန်ကျစရိတ်၏ တစ်စိတ်တစ်ပိုင်းကိုသာ ပေးရပါသည်။
 
ဆေးဆိုင်များသည် ပုံမှန်အားဖြင့် တနင်္လာမှ သောကြာအထိ၊ နံနက် (၈) နာရီမှ ညနေ (၆) နာရီခွဲ (သို့) (၆) နာရီအထိဖွင့်ပါသည်။ စနေ၊ တနင်္ဂနွေနေ့ များတွင် နေ့လည် (၁) နာရီအထိဖွင့်ပါသည်။ မြို့များတွင် အချို့သောဆေးဆိုင်များသည် ည (၁၀)နာရီအထိ ဖွင့်ပါသည်။ စနေ၊ တနင်္ဂနွေနေ့များနှင့် ညဘက်များအတွက် အရေးပေါ်ဝန်ဆောင်မှု ရှိပါသည်။

Eine Person liegt krank im Bett. Auf dem Nachttisch sind Taschentücher, Nasenspray, Medikamente und eine Tasse Tee zu sehen. © Goethe-Institut

ဆရာဝန်နှင့်ပြသခြင်း

အသင် အပြင်းအထန် နေမကောင်း ဖြစ်နေပါက အထွေထွေကု ဆရာဝန် တစ်ဦးထံတွင် ရက်ချိန်း ယူသင့်ပါသည်။ သင်၏ ကလေး နေမကောင်းဖြစ်သည်ဆိုပါက ကလေးဆရာဝန်နှင့် ပြသနိုင်ပါသည်။ ဆရာဝန်နှင့်ပြသလိုပါက ပုံမှန်အားဖြင့် တနင်္လာနေ့မှ သောကြာနေ့အထိ သွားရောက် ပြသနိုင်ပါသည်။ စနေ၊ တနင်္ဂနွေနှင့် ညအချိန်များအတွက် ဆရာဝန် အသင့်ထားရှိခြင်း ဝန်ဆောင်မှုရှိပါသည်။
 
ဆရာဝန်နှင့်ပြသရာတွင် သင်၏ ကျန်းမာရေး အာမခံ ကုမ္ပဏီထံမှ ကျန်းမာရေး အာမခံ ကတ်ပြား ယူဆောင်သွားရန် လိုပါသည်။ ဆရာဝန်နှင့် ပထမဆုံးအကြိမ်ပြပါက သင်၏ ကိုယ်ရေး အချက်အလက်များနှင့် သင့်ရောဂါနှင့် ပတ်သက်သည့် အကြောင်းအရာများအကြောင်း ဖောင်ဖြည့်ရပါမည်။ ဖောင်သွင်းပြီးလျှင် သင်သည် သင်၏အမည်ကို ခေါ်သည်အထိ စောင့်ဆိုင်းခန်းတွင် စောင့်နေရပါမည်။ ယင်းမှာ မိနစ်အနည်းငယ်သာ ကြာတတ်ပါသည်။ သို့သော် တစ်ခါတစ်ရံတွင် တစ်နာရီ (သို့) ယင်းထက်မကလည်း ကြာနိုင်ပါသည်။

ဆေးကုခန်းတွင် ဆရာဝန်က သင့်ကို လိုအပ်သည့် မေးခွန်းများ မေးပါလိမ့်မည်။ သင်၏ ရောဂါလက္ခဏာများကို သေချာစွာ ရှင်းပြပါ၊ ဘယ်နားက နာတာလဲ၊ နာနေတာ ဘယ်လောက်ကြာပြီလဲ၊ အရင်က ဒီလိုနာဖူးလား စသည်ဖြင့် မေးမြန်းပြီးနောက် ဆရာဝန်က သင့်ကို စစ်ဆေးပါလိမ့်မည်။ ထို့နောက် ဆေးမှတ်တမ်း ရေးပေး ပါလိမ့်မည်။ ထို့နောက် သင်ဖြစ်နေသည့် ရောဂါအခြေအနေကို ပြောပြပါလိမ့်မည်။ 
 
အကယ်၍ အသင့်တွင် ကျန်းမာရေး အာမခံရှိပါက ဆရာဝန်ပြသည့်အခါ ပိုက်ဆံပေးရန်မလိုပါ။ သို့သော် မိမိရဲ့ သီးသန့် လိုအပ်ချက်များအတွက်တော့ ပေးရပါသည်။ ၎င်းကို ဆရာဝန်က ညွှန်ကြားပေးပါသည်။

ဆေးခွင့်နှင့် အထူးကုဆရာဝန်များ

ဆရာဝန်သည် စမ်းသပ်စစ်ဆေးမှုများ ပြုလုပ်ပြီးလျှင် အသင့်အား ဆေးခွင့် ရေးပေးကောင်း ရေးပေးနိုင်ပါသည်။ များသောအားဖြင့် ဆေးဝယ်ယူရန်အတွက် ဆေးစာလည်း ရေးပေးပါသည်။ နောက်တစ်ခေါက် ထပ်မံလာပြရန် အတွက်လည်း ရက်ချိန်းပေးပါသည်။ သို့မဟုတ် အထွေထွေကုဆရာဝန်က အသင့်အား အထူးကုဆရာဝန်ဆီသို့ လွှဲပေးပါလိမ့်မည်။ ဥပမာအားဖြင့် နား၊နှာခေါင်း၊ လည်ချောင်းအထူးကု၊ အရိုးအထူးကု၊ သားဖွားမီယပ်အထူးကု စသည်တို့ဖြစ်သည်။ အသင့်၏ ကျန်းမာရေး အခြေအနေကို အသင့်၏ မိသားစုဆရာဝန် သိရှိနိင်ရန်အတွက် လွှဲစာလည်း ရေးပေးပါသည်။ အထူးကု ဆရာဝန်ဆီသို့ ရောက်လျှင် အသင့်အား နောက်တစ်ကြိမ် ထပ်မံစစ်ဆေးပါလိမ့်မည်။

ကြိုတင်စစ်ဆေးမှုများ

ရောဂါများကို တတ်နိုင်သမျှ ကြိုတင်သိရှိပြီး ကာကွယ်နိုင်ရန်အတွက် ကြိုတင် စစ်ဆေးမှုများ ပြုလုပ်နိုင်ပါသည်။ အချို့သော စစ်ဆေးမှုများကို ဥပဒေအရ အခမဲ့ လုပ်ဆောင်ခွင့်ရှိပြီး အချို့ကိုမူ အခကြေးငွေ ပေးရပါသည်။ ကလေးများအတွက်လည်း ၎င်းတို့၏ ဖွံ့ဖြိုးကြီးထွားမှုကို စစ်ဆေးပေးသော ကနဦးစစ်ဆေးမှုများ ပြုလုပ်နိုင်ပါသည်။ ဝက်သက်၊ ကြက်ညှာချောင်းဆိုးနှင့် ပါးချိတ်ရောင်နာတို့အတွက် ကာကွယ်ဆေးများလည်းရှိပါသည်။
 
 
အသက် (၃၅) နှစ်မှစ၍ နှလုံး၊ ကျောက်ကပ်နှင့် သွေးလည်ပတ်မှုဆိုင်ရာ ကြိုတင်စစ်ဆေးမှုများ၊ ဆီးချိုနှင့် ကင်ဆာ ကြိုတင်စစ်ဆေးမှုများ ပြုလုပ်နိုင်ပါသည်။
အမျိုးသမီးများအတွက် ရင်သား စစ်ဆေးမှုများလည်းရှိသည်။
 
လိင်အမျိုးအစား၊ အသက်အရွယ်နှင့် မျိုးရိုးလိုက် နာမကျန်းဖြစ်ခြင်းများအပေါ် မူတည်၍ (သို့) ကိုယ်ဝန်ဆောင် မိခင်များအတွက် သီးသန့် စစ်ဆေးမှုများလည်းရှိပါသည်။
ခရီးသွားလိုသူများနှင့် ဂျာမနီတွင် နေထိုင်သူများအတွက် ထိုးရန် အကြံပြုထားသည့် ကြိုတင် ကာကွယ်ဆေးများလည်း ရှိပါသည်။ အသင့်၏ ဆရာဝန်နှင့် ပြောဆိုဆွေးနွေးပါ။

အရေးပေါ်အခြေအနေများအတွက် အရေးကြီးသည့် ဖုန်းနံပါတ်များ

အရေးပေါ်နံပါတ်များအားလုံးကို အခမဲ့ ခေါ်ဆိုနိုင်ပါသည်။ မည်သည့်ဖုန်းမှမဆို ဖုန်းငွေ မရှိဘဲလည်း ခေါ်ဆိုနိုင်ပါသည်။
 
ရဲ။ ။ 110
ရဲမ်ားသည္ ျပစ္မႈခင္းမ်ား၊ ျပင္းထန္ေသာ ယာဥ္မေတာ္တဆမႈမ်ား၊ ေဆးပညာဆိုင္ရာမဟုတ္ေသာ အေရးေပၚအေျခအေနမ်ားအတြက္ တာ၀န္ရွိသည္။

ခေါ်ဆိုပြီးနောက် အသင်၏နာမည်ကိုပြောပြီး
ဘယ်မှာဖြစ်တာလဲပြောပါ။
ဘာဖြစ်တာလဲပြောပါ။
ဘယ်နှစ်ယောက်ပါဝင်လဲပြောပါ။
ထိခိုက်ဒဏ်ရာရမှုများကိုပြောပါ။
တစ်ဖက်မှပြန်လည်မေးမြန်းသည်များကိုစောင့်ဆိုင်းပါ။

Nahaufnahme auf ein Polizeiauto von der Seite mit dem Schriftzug "Polizei" © Goethe-Institut
 
မီးသတ်၊ အရေးပေါ်၊ ကယ်ဆယ်ရေး။ ။ 112
အသက်အန္တရယ်ရှိသော အရေးပေါ်အခြေအနေများ၊ ဥပမာ နှလုံးဖောက်ခြင်း၊ လေဖြတ်ခြင်း၊ ပြင်းထန်သော မတော်တဆမှုများ စသည်တို့အတွက် အရေးပေါ်နံပတ် ၁၁၂ ကို ဆက်သွယ်နိုင်သည်။ အရေးပေါ်အခြေအနေတွင် ဒဏ်ရာပြင်းထန်သည် မပြင်းထန်သည်စသည်ဖြင့် သံသယထွေပြား တုံ့ဆိုင်းမနေဘဲ ကယ်ဆယ်ရေးကို လျှင်မြန်စွာ အကြောင်းကြားသင့်ပါသည်။ သို့မဟုတ်ပါက အသက် ဆုံးရှုံးနိုင်သောကြောင့် ဖြစ်ပါသည်။
 
Ansicht auf das geschlossene Tor eines Feuerwehrgebäudes, durch die Fenster ist ein Feuerwehrauto sichtbar. © Goethe-Institut

ဆရာဝန် အသင့်ရှိနေခြင်း။ ။ 116117
စနေ၊ တနင်္ဂနွေတွင် အရေးပေါ်အခြေအနေ ကြုံတွေ့ပါက အရေးပေါ်ကယ်ဆယ်ရေးကို ဆက်သွယ်နိုင်ပါသည်။ ထိုအတွက် အနီးဆုံး အရေးပေါ်ဆေးခန်းသို့ သွားရောက်နိုင်ပါသည်။ များသောအားဖြင့် ဆေးရုံများတွင် အရေးပေါ်ဆေးခန်းများရှိပါသည်။ ၎င်းဆေးခန်းများသည် ည (၁၀)နာရီအထိ ဖွင့်ပြီး အားလပ်ရက်များတွင်လည်း ဖွင့်ပါသည်။ နောက်တစ်နည်းမှာ ၁၁၆၁၁၇ နံပါတ်ကို ခေါ်ဆိုနိုင်ပါသည်။ ဤနံပါတ်သည် အခမဲ့ဖြစ်ပြီး တစ်နိုင်ငံလုံးတွင် ခေါ်ဆိုနိုင်ပါသည်။ ဤနံပါတ်ကိုခေါ်လျှင် အသင့်အား အနီးဆုံးရှိဆရာဝန်ကို ညွှန်ကြားပေးပါလိမ့်မည်။ ဆရာဝန် အိမ်ပင့်ရန် လိုအပ်ပါကလည်း ဗဟိုဌာနက စီစဥ်ပေးပါသည်။
 
သွားဆရာဝန် အရေးပေါ်။ ။ 01805/986700
ဆေးခန်းများ၏ ဖုန်းနံပါတ်များရရှိနိုင်ပြီး တိုက်ရိုက် ခေါ်ဆိုနိုင်ပါသည်။

Man sieht den oberen Teil eines grauen Gebäudes mit einem Schild, das ein rotes Kreuz auf weißem Grund zeigt. © Goethe-Institut
 
ကလေးများ
ကလေးများအတွက်လည်း လူကြီးများအတွက် ခေါ်ဆိုသော ဖုန်းနံပါတ်များကို ခေါ်ဆိုနိုင်ပါသည်။ သို့သော် ကလေးများနှင့်ပတ်သက်လျှင် မည်သို့ဆောင်ရွက်ရမည်။ မြန်မြန်ဆန်ဆန် မည်သို့တုံ့ပြန်ရမည်ကို သိရန်အရေးကြီးပါသည်။ ပထမဦးစွာ ကလေးကို သက်တောင့်သက်သာ ဖြစ်အောင်ထားပြီး နှစ်သိမ့်ချော့မော့ပါ။ မိမိကိုယ်တိုင် စိတ်ကိုငြိမ်စွာထားပြီး ကလေးကို ပိုမို ထိတ်လန့်မှုမဖြစ်စေဘဲ မှန်ကန်သော အရေးပေါ်နံပါတ်သို့  မြန်မြန်ဆက်သွယ်ရန် အရေးကြီးပါသည်။ ဒဏ်ရာအနာတရများရထားပါက ဆေးကြောသန့်စင်ပြီး ပိုးမွှားသန့်စင်သော ပတ်တီးစီး၊ ပလာစတာကတ် စသည်တို့ပြုလုပ်နိုင်ရန် ကိရိယာအပြည့်အစုံပါဝင်သော ရှေးဦးသူနာပြုသေတ္တာတစ်လုံး အိမ်တွင် အမြဲဆောင်ထားသင့်ပါသည်။
 
ကလေးများနှင့် လူငယ်များအတွက် ဖုန်းလိုင်း။     ။ 0800/1110333
ကလေးသူငယ်များနှင့် ဆယ်ကျော်သက်များ၏ ပြဿနာများ၊ အင်တာနက်လုံခြုံရေးနှင့် လိင်ပိုင်ဆိုင်းရာ အကြမ်းဖက်မှုများအတွက်
 
မိဘများအတွက် ဖုန်းလိုင်း။   ။ 0800/1110550
ကလေးအုပ်ထိန်းမှုဆိုင်ရာမေးခွန်းများ၊ အင်တာနက်လုံခြုံရေး၊ လိင်အကြမ်းဖက်မှုများ စသည်ဖြင့် ကလေးများနှင့် အုပ်ထိန်းသူများ၏ ပြဿနာများအတွက် ခေါ်ဆိုနိုင်ပါသည်။
 
အမျိုးသမီးများ အကြမ်းဖက်ခံရခြင်းအတွက် အကူအညီတောင်းဆိုခြင်း။   ။ 08000/116016
 
ဂျာမနီတစ်နိုင်ငံလုံးတွင် အကြမ်းဖက်ခံရသော အမျိုးသမီးများနှင့် ၎င်းတို့၏လူမှုပတ်ဝန်းကျင်အတွက် အခမဲ့ အကြံပေးဝန်ဆောင်မှုဖြစ်ပါသည်။ အသင့်၏ နာမည်ကိုပြောစရာမလိုဘဲ တစ်နှစ်လုံး အချိန်မရွေးခေါ်ဆိုနိုင်ပါသည်။
 
ကိုယ်ဝန်ဆောင်မိခင်များအတွက် အရေးပေါ်  (နာမည်ပြောစရာမလိုဘဲ ယုံကြည်စိတ်ချရသည်)။   ။ 0800/4040020
 
စိတ်ပိုင်းဆိုင်ရာအကူအညီပေးခြင်း။   ။ 0800/1110111
မိမိဘဝလက်တွဲဖော်နှင့် ပြဿနာများ၊ ကျောင်းနှင့်လုပ်ငန်းခွင်တွင် အနိုင်ကျင့်ခံရမှုများ၊ အလုပ်လက်မဲ့ဖြစ်ခြင်း၊ အလုပ်ရှာခြင်း၊ အထီးကျန်မှု စသည့် စိတ်ပိုင်းဆိုင်ရာ ပြဿာနာများနှင့် အခက်အခဲများအတွက်
 
တစ်စုံတစ်ခု (ဥပမာ ဘဏ်ကတ်) ပိတ်ပင်လိုပါက။ ။ 116116
အသင့်၏ EC ကတ်၊ အကြွေးဝယ်ခရက်ဒစ်ကတ်၊ မှတ်ပုံတင်ကတ်စသည်တို့ ပျောက်ဆုံး (သို့) အခိုးခံရပါက ဤနံပတ်ကိုခေါ်ဆို၍ ကတ်ကိုပိတ်ပင်နိုင်ပါသည်။

ကျန်းမာရေးအာမခံများ

လူတိုင်းသည် အန္တရာယ်များနှင့် အချိန်မရွေး ကြုံတွေ့ရနိုင်ပါသည်။ ဥပမာအားဖြင့် ဖျားနာခြင်း (သို့) အလုပ်လုပ်နိုင်စွမ်း စသည်တို့ဖြစ်သည်။ ထိုသို့သော အခြေအနေများတွင် ကုန်ကျစရိတ်များလည်း ရုတ်တရက် များတတ်ပါသည်။ ထို့ကြောင့် ထိုကုန်ကျစရိတ်များကို အသင်တစ်ဦးတည် ကုန်ကျခံစရာမလိုအောင် အာမခံ လုပ်ထားသင့်ပါသည်။ အသင်သည် အာမခံ ကုမ္ပဏီတစ်ခုတွင် အာမခံလုပ်နိုင်ပြီး နှစ်စဥ် (သို့) လစဥ် ငွေသွင်းရပါမည်။ အသင် နာမကျန်း ဖြစ်ပါက (သို့) အလုပ် မလုပ်နိုင်တော့ပါက အာမခံ ကုမ္ပဏီက သင့်အား ငွေထုတ်ပေးပါသည်။ ဂျာမနီတွင် အချို့သော အာမခံများကို မထားမနေ ထားရပါသည်။ လူတိုင်း ယင်းအာမခံများ ထားရှိရပါသည်။ အခြားသော အာမခံများကိုမူ မိမိဆန္ဒရှိပါက ထားနိုင်ပါသည်။

မထားမနေရ အာမခံများ

အရေးအကြီးဆုံး မထားမနေရ အာမခံများမှာ ကျန်းမာရေးအာမခံ၊ ပင်စင်အာမခံနှင့် အလုပ်လက်မဲ့အာမခံတို့ ဖြစ်ကြသည်။ ကျန်းမာရေးအာမခံမှာ သင်ဆရာဝန်ထံသွားပြရသည့် ကုန်ကျစရိတ်များ (သို့) သင်လိုအပ်သည့် ဆေးဝါးများအတွက် ကုန်ကျစရိတ်များကို ထုတ်ပေးသော အာမခံဖြစ်ပါသည်။ အလုပ်လက်မဲ့အာမခံမှာအကယ်၍သင်အလုပ်ပြုတ်သွားလျှင် (သို့) သင် အလုပ်အသစ် မရသေးလျှင် တစ်နှစ်အထိငွေထုတ်ပေးခြင်း ဖြစ်ပါသည်။ ပင်စင်အာမခံမှာလည်း ဝန်ထမ်းများ မထားမနေရ ဖြစ်ပါသည်။ အသင်အိုမင်း၍ အလုပ် ဆက်မလုပ်နိုင်တော့ပါက ပင်စင်အာမခံငွေ ရရှိမည်ဖြစ်ပါသည်။ အကယ်၍ အသင့်တွင် အလုပ်ရှိပါက အလုပ်ရှင်က  ကျန်းမာရေး အာမခံနှင့် လူမှုရေးအာမခံများ၏ တစ်ဝက် နီးပါးကို ပေးပေးပါသည်။ အကယ်၍သင့်တွင် ကားသို့မဟုတ် မော်တော်ဆိုင်ကယ် ရှိပါကသင်သည် ယာဉ်အာမခံ KFZ အာမခံ ထားရန်လည်းလိုပါသည်။ သင်သည် ယာဉ်မတော်တဆမှုဖြစ်ပြီး အခြားကားမှာ ပျက်စီးသွားပါက KFZ အာမခံက ပြင်ဆင်စရိတ်အားလုံး (သို့) တစ်စိတ်တစ်ပိုင်းကို ပေးပေးပါလိမ့်မည်။

Ein Auto hat in der deutliche Kratzer in der Tür. © Goethe-Institut

မိမိဆန္ဒအလျောက် ထားနိုင်သည့် အာမခံများ

အရေးအကြီးဆုံး မိမိဆန္ဒအလျောက်ထားသည့် အာမခံများမှာ တာဝန်ယူရမှု အာမခံ၊ အိမ်နှင့် အိမ်တွင်း ပစ္စည်းအာမခံနှင့် အသက်အာမခံတို့ ဖြစ်သည်။ သင့်ကြောင့် အခြားသူတစ်ဦး၏ ပစ္စည်းတစ်ခုခု ကျိုးပဲ့ (သို့) ပျက်စီး သွားဖူးပါသလား။ သို့ဖြစ်ပါက တာဝန်ယူရမှု အာမခံက ယင်းအတွက် ငွေပေးပေးပါသည်။ အကယ်၍ အိမ်တွင်းရှိ ပစ္စည်းများ ပျက်စီးသွားလျှင် ဥပမာ ရေစနစ် ပြဿနာတစ်ခုခုကြောင့် ရေထိ၍ ပစ္စည်းများ ပျက်စီးမှုဖြစ်လျှင် အိမ်နှင့် အိမ်တွင်း ပစ္စည်းအာမခံက ယင်းအတွက် ကုန်ကျငွေများ ပေးပေးပါသည်။ အသက်အာမခံကမူ အကယ်၍ သင် သေဆုံးသွားပါက ဥပမာအားဖြင့် သင့်သားသမီးများအား ငွေထုတ်ပေးခြင်းဖြစ်သည်။ 

အမေးများသော မေးခွန်းများ

အခြားမေးလိုသည်များရှိပါသေးသလား။ ဤသို့ဆိုလျှင် “ဆက်သွယ်ရန်ဖောင်“ကို ဖြည့်၍ ကျွန်ုပ်တို့ထံသို့ ရေးသား အကြာင်းကြားနိုင်ပါသည်။ ကျွန်ုပ်တို့သည် အသင်၏ အမည်ကို မဖော်ပြဘဲ အသင်၏ဖောင်ကို အကြံပေးပုဂ္ဂိုလ်များနှင့် နိုင်ငံရွှေ့ပြောင်းလာသောလူငယ်များအတွက် အကြံပေးဝန်ဆောင်မှုများဌာနသို့ ဆက်လက် လွှဲပြောင်းပေးသွားမည် ဖြစ်ပါသည်။

“ဆက်သွယ်ရန်ဖောင်“ဆီသို့