An Tischen sitzen Schülerinnen und Schüler. © Goethe-Institut

မတက်မနေရ ကျောင်းပညာရေးစနစ်နှင့် ကုန်ကျစရိတ်များ

ဂျာမနီတွင် ကျောင်း မတက်မနေ တက်ရပါသည်။ ကလေးများသည် ကျောင်း (၉) နှစ်ကြာ တက်ရပါသည်။ အချို့သော တိုင်းနှင့်ပြည်နယ်များတွင် ကျောင်းမတက်မနေရ ပညာရေး စနစ်သည် ဂျာမနီတွင် နိုင်ငံသားခံယူထားပြီးခြင်း (သို့) နိုင်ငံသားမခံယူရသေးခြင်း စသည်ဖြင့် နေထိုင်မှုပုံစံ ရှင်းရှင်းလင်းလင်း မရှိသေးသော ကလေးများ အတွက်လည်း အကျုံးဝင်ပါသည်။ သက်ဆိုင်ရာ တိုင်းနှင့် ပြည်နယ်အပေါ် မူတည်၍ စာသင်နှစ် တစ်နှစ်သည် ဩဂုတ်လ (သို့) စက်တင်ဘာလတွင် စတင်ပြီး နောက်နှစ် ဇွန်လ (သို့) ဇူလိုင်လတွင် ပြီးဆုံးပါသည်။ ကလေးများသည် ပုံမှန်အားဖြင့် အစိုးရကျောင်းများတွင် တက်ရောက်လေ့ရှိပါသည်။ မည်သည့် အခကြေးငွေမှ ပေးရန်မလိုပါ။ အချို့သော သင်ကြားရေး စာရွက်စာတမ်းများ၊ သင်ထောက်ကူပစ္စည်းများ (သို့) ကျောင်းပျော်ပွဲစား ခရီးထွက်ခြင်းများ အတွက်သာ ငွေအနည်းငယ် ကောက်ခံတတ်ပါသည်။ ပုဂ္ဂလိက ကျောင်းများတွင်မူ သင်သည် ကျောင်းလခပေးရပါသည်။ အသင့် ကလေးသည် ဂျာမန်ဘာသာစကား အားနည်းနေပါသလား (သို့) ဘာသာစကား အကူအညီ လိုပါသလား။ ဤသို့ဆိုပါက ကျောင်းကို တိုက်ရိုက် မေးမြန်း အကြံဥာဏ်တောင်းပါ။


Portrait einer jungen Frau mit asiatischem Hintergrund. © Goethe-Institut

ကျောင်းအမျိုးအစားများ

ကျောင်း အမျိုးမျိုး ရှိပါသည်။ ကလေးများအားလုံးသည် အသက် ၆ နှစ် (သို့) ၇ နှစ် မှစ၍ မူလတန်းကျောင်း စတင် တက်ကြပါသည်။ (၄) တန်း ပြီးမြောက်ပြီးလျှင် ဆက်လက် တက်နိုင်သည့် ကျောင်းအမျိုးမျိုး ရှိပါသည်။ မူလတန်း (၄) တန်း တက်ရောက်နေစဥ်အတွင်း ကျောင်းမှ အသင့်ကလေး (၄) တန်းပြီးလျှင် မည်သည့်ကျောင်း ဆက်လက် တက်ရောက်နိုင်သည်ကို အကြံပေးပါလိမ့်မည်။ တက်ရောက်နိုင်သည့် ကျောင်းများမှာ Hauptschule (၅ တန်းမှ ၉ တန်းအထိ) ကျောင်းတစ်မျိုးဖြစ်ပြီး ဤကျောင်းပြီးလျှင် Hauptschulabschluss (Hauptschule ပညာသင်ယူ ပြီးမြောက်ကြောင်း လက်မှတ်) သို့မဟုတ် အလုပ်သင်ယူရန် အရည်အချင်း ပြည့်မှီကြောင်း ထောက်ခံလက်မှတ် ရရှိပါမည်။ Hauptschule တွင် ကျောင်းသားများသည် လက်တွေ့ဘာသာရပ်များဖြစ်သည့် လက်မှုပညာရပ်များ၊ ဆောက်လုပ်မှု (သို့) စက်ပစ္စည်းများ၏ ပုံကြမ်းများ ရေးဆွဲခြင်း စသည်တို့ကိုလည်း သင်ယူကြရပါသည်။ နောက်ထပ် အဆင့်ပိုမြင့်သော ကျောင်းတစ်မျိုးမှာ Realschule (၅ တန်းမှ ၁၀ တန်းအထိ) ဖြစ်သည်။ ဤကျောင်းမှ Realschule သင်ယူပြီးမြောက်ခြင်း လက်မှတ်ကို ရရှိနိုင်ပါသည်။ Hauptschule (သို့) Realschule တက်ပြီးပါက အလုပ်တစ်ခုခု သင်ယူနိုင်ပါသည်။ သို့မဟုတ်ပါက Gymnasium ဟုခေါ်သည့် ၁၂ တန်းအထိရှိသော အဆင့်ပိုမြင့်သော ကျောင်းလည်း ရှိပါသည်။ ဤကျောင်းမှာမူ တက္ကသိုလ် တက်လိုသော ကျောင်းသား ကျောင်းသူများအတွက် ရည်ရွယ်ပါသည်။  ဤကျောင်းတက်ပြီး တက္ကသိုလ်ဝင်တန်း အောင်လက်မှတ် ရရှိပြီးနောက် တက္ကသိုလ် တက်ရောက်နိုင်ပါသည်။ Gymnasium တွင် အင်္ဂလိပ်၊ ပြင်သစ် စသည်ဖြင့် နိုင်ငံခြားဘာသာစကား (၂)မျိုး မှ (၃)မျိုး အထိ သင်ရပါသည်။
အချို့သောတိုင်းနှင့်ပြည်နယ်များတွင် Gesamtschule ဟုခေါ်သည့် Hautschule၊ Realschule နှင့် Gymnasium တို့ကို ကျောင်းတစ်ခုတည်းတွင် ပေါင်းစည်းထားသော ကျောင်းလည်း ရှိပါသည်။ ဤကျောင်း၏ အားသာချက်မှာ အကယ်၍ အသင့်ကလေးသည် ကျောင်းပြောင်းလိုပါက (ဥပမာ Hauptschule မှ Realschule သို့) လွယ်ကူပါသည်။ အခြားသော သီးသန့်ခွဲထားသည့် ကျောင်းများတွင်လည်း ကျောင်းပြောင်းလိုပါက ပြောင်းနိုင်ပါသည်။ သို့သော် သိပ်မလွယ်ကူလှပါ။ တိုင်းနှင့် ပြည်နယ်တိုင်းတွင် ဘာသာစကား နှစ်မျိုးဖြင့်သင်သော ကျောင်းများ၊ မသန်စွမ်းသူများအတွက် ကျောင်းများ၊ အထူးသီးသန့် ဘာသာရပ်ဆိုင်ရာ ကျောင်းများနှင့် အသက်မွေး ဝမ်းကျောင်းမှု ကျောင်းများလည်း ရှိပါသည်။ ပိုမိုတိကျစွာ သိရှိလိုပါက ကျွန်ုပ်တို့၏ သတင်းအချက်အလက်ပြ ပုံရိပ်များကို ကြည့်ရှုနိုင်ပါသည်။

ကျောင်းချိန်များ

ကျောင်းအများစုတွင် စာသင်ကြားချိန်သည် မွန်းတည့် (သို့) (မွန်းလွဲ ၂နာရီ သို့မဟုတ် ၃နာရီ) တွင် ပြီးဆုံးပါသည်။ ထို့နောက် ကလေးများသည် နေ့ကလေးထိန်း ကျောင်းသို့ သွားတက်နိုင်ပါသည်။ ယင်းကျောင်းများတွင် မွန်းလွဲပိုင်း တစ်ခုလုံး တက်နိုင်ပြီး စားစရာ တစ်ခုခုလည်း ကျွေးပါသည်။ အိမ်စာလုပ်ရာတွင်လည်း ကူညီပေးပါသည်။ သို့သော် နေ့ကလေးထိန်းကျောင်းအတွက် အခကြေးငွေ ပေးရပါသည်။ ယနေ့ခေတ်တွင် တစ်နေကုန်တက်ရသော ကျောင်းများလည်း ပိုမိုများပြားစွာ ရှိလာပါသည်။ တစ်နေကုန် ကျောင်းများတွင်မူ ကလေးများသည် ညနေ (၄) နာရီ (သို့) ၅နာရီ အထိ နေရပါသည်။

ကျောင်းတွင် သင်ကြားရသော ဘာသာရပ်များ

ကလေးများသည် ကျောင်းတွင် ဘာသာရပ်များစွာ သင်ယူရပါသည်။ အားကစားအချိန်လည်း ရှိပါသည်။ အားကစားအချိန်ကို ကျား၊မ သပ်သပ်စီ မခွဲထားဘဲ များသောအားဖြင့် ယောက်ျားလေးနှင့် မိန်းကလေးများ အတူတူတက်ရပါသည်။ မကြာခဏဆိုသလို ရေကူးလည်း သင်ရပါသည်။ ကျောင်းအများစုတွင် ခရစ်ယာန် ဘာသာရေး အချိန်လည်း ရှိပါသည်။ သို့သော် ဘာသာရေးအချိန်မှာ မတက်မနေမဟုတ်ဘဲ မိမိမတက်လိုပါက မတက်ဘဲနေနိုင်ပါသည်။ ဘာသာရေးအစား စာရိတ္တအချိန်ကို တက်နိုင်ပါသည်။ အချို့သော ကျောင်းများတွင် အခြားသော ဘာသာရေးများဖြစ်သည့် အစ္စလာမ်၊ ဂျူးဘာသာ စသည့် အတန်းများလည်း ရှိပါသည်။
အသင့်ကလေးသည် ဘာသာရပ်တစ်ခုခုတွင် အားနည်း နေပါက ကျူရှင် ထားနိုင်ပါသည်။ သီးသန့် ကျူရှင်ဆရာ၊ ဆရာမ တစ်ယောက်နှင့် ဖြစ်စေ (သို့) ကျူရှင်ကျောင်း တစ်ကျောင်းတွင်ဖြစ်စေ ထားနိုင်ပါသည်။ သီးသန့် ကျူရှင် ဆရာ၊ ဆရာမနှင့် သင်ပါက များသောအားဖြင့် ကုန်ကျစရိတ် ပို၍ သက်သာပါသည်။

Eine Schulklasse steht bei einer Stadtbesichtigung um die Lehrkraft herum, die etwas zur Geschichte der Stadt erzählt. © Goethe-Institut

သင်ရိုးပြင်ပ လှုပ်ရှားမှု အစီအစဥ်များ

ကျောင်းသူ၊ ကျောင်းသားများကို ပုံမှန်အားဖြင့် တစ်နှစ်တစ်ခါ ခရီး ခေါ်သွားပါသည်။ ခရီးထွက်ရာတွင် များသောအားဖြင့် (၃) ရက်မှ (၅) ရက်အထိ ကြာမြင့်ပါသည်။ ခရီးကို အခြား မြို့တစ်မြို့ (သို့) နေရာဒေသ တစ်ခုသို့ ခေါ်သွားပါသည်။ စုပေါင်း လမ်းလျှောက်သည့် နေ့များလည်း ရှိပါသည်။ ထိုနေ့များတွင် ကလေးများ အတူတူ ပျော်ပွဲစား ထွက်ကြပါသည်။ ဤနည်းအားဖြင့် ကလေးများသည် နိုင်ငံ၏ သမိုင်းကြောင်း၊ ယဥ်ကျေးမှု၊ သဘာဝ ပတ်ဝန်းကျင်တို့နှင့် အထိအတွေ့ ဖြစ်လာပါသည်။ ကျောင်းများတွင် ပွဲတော်များလည်း ကျင်းပပါသည်။ ဥပမာအားဖြင့် ပြဇာတ်ကပွဲများ၊ တေးဂီတပွဲများ စသည်တို့ ဖြစ်သည်။

ကျောင်းသားမိဘများ

ကျောင်းတိုင်းတွင် ကျောင်းသား မိဘ ကော်မတီ ရှိပြီး မိဘများသည် ကျောင်းနှင့်အတူ ပူးပေါင်း ပါဝင်ရပါသည်။ နှစ်စဥ် ကျောင်းသားမိဘ တွေ့ဆုံပွဲများလည်း များစွာ ကျင်းပပါသည်။ ဤပွဲများတွင် ဆရာ၊ ဆရာမများသည် မိဘများအား အရေးကြီးသည်များကို မှာကြားပြီး မိဘများ အချင်းချင်းလည်း တစ်ဦးနှင့်တစ်ဦး သိကျွမ်းနိုင်ပါသည်။ အသင်ဆန္ဒရှိပါက ဆရာ၊ဆရာမများနှင့် ရက်ချိန်းယူ၍ သီးသန့် ဆွေးနွေးမှုများလည်း ပြုလုပ်နိုင်ပါသည်။ ၎င်းကို ဂျာမန်အခေါ်အဝေါ်ဖြင့် Elterngespräch ဟုခေါ်ပါသည်။ Elterngespräch ကို ကလေး ကျောင်းတွင် ပြဿနာများ ကြုံတွေ့ရပါက (သို့) မိဘများအနေဖြင့် ကလေး၏ အခြေအနေကို သိလိုပါက ပြုလုပ်လေ့ရှိပါသည်။

အမေးများသောမေးခွန်းများ

အခြားမေးလိုသည်များရှိပါသေးသလား။ ဤသို့ဆိုလျှင် “ဆက်သွယ်ရန်ဖောင်“ကို ဖြည့်၍ ကျွန်ုပ်တို့ထံသို့ ရေးသား အကြာင်းကြားနိုင်ပါသည်။ ကျွန်ုပ်တို့သည် အသင်၏ အမည်ကို မဖော်ပြဘဲ အသင်၏ဖောင်ကို အကြံပေးပုဂ္ဂိုလ်များနှင့် နိုင်ငံရွှေ့ပြောင်းလာသောလူငယ်များအတွက် အကြံပေးဝန်ဆောင်မှုများဌာနသို့ ဆက်လက် လွှဲပြောင်းပေးသွားမည် ဖြစ်ပါသည်။

“ဆက်သွယ်ရန်ဖောင်“ဆီသို့