Goethe-Institut Myanmar

၂၀၂၆ ခုနှစ် နှစ်သစ်ကို ကြိုဆိုခြင်းနှင့်အတူ မိတ်ဆွေနဲ့တကွ မိသားစုဝင်များအားလုံးကို နွေးထွေးတဲ့ ဆုမွန်ကောင်းတွေ ပို့သလိုက်ပါတယ်။
 
ပြီးခဲ့တဲ့တစ်နှစ်တာကာလအတွင်း မိတ်ဆွေတို့ရဲ့ ယုံကြည်မှု၊ ကူညီပံ့ပိုးမှုနဲ့ မိတ်ဖက်ဆောင်ရွက်မှုများအတွက် အထူးပင် ကျေးဇူးတင်ရှိပါတယ်။ 
 
နှစ်သစ်မှာ ကျန်းမာရွှင်လန်းပြီး စိတ်ချမ်းသာမှုနဲ့ စိတ်အားတက်ဖွယ် အခိုက်အတန့်များစွာကို ပိုင်ဆိုင်နိုင်ပါစေကြောင်း ဆုမွန်ကောင်းတောင်းလိုက်ပါတယ်။ 
 
လာမယ့် ၂၀၂၆ ခုနှစ်မှာလည်း ရှေ့ဆက်လက်တွဲ ပူးပေါင်းဆောင်ရွက်သွားဖို့ မျှော်လင့်နေပါတယ်။ 
 
Goethe-Institut Myanmar အဖွဲ့သားများ

ဂျာမနီသံရုံး၏ ပံ့ပိုးကူညီမှုဖြင့် Goethe-Institut Myanmar မှစတင်ဆောင်ရွက်ခဲ့သည့် "ဖြစ်တည်မှုတို့ယှက်နွယ်ရာ" အစီအစဉ်သည် ၂၀၂၅ ခုနှစ်၊ အောက်တိုဘာလမှ ဒီဇင်ဘာလအတွင်း မသန်စွမ်းသူများအတွက် အရေးပါသော လူမှုကွန်ရက်များကို အောင်မြင်စွာ တည်ထောင်ပေးနိုင်ခဲ့ပါသည်။
အဆိုပါအစီအစဉ်ကို အဓိကမိတ်ဖက်အဖွဲ့အစည်း (၆) ခုဖြစ်သော — အေးမေတ္တာ မသန်စွမ်းရိပ်မြုံ၊ဧဒင် မသန်စွမ်းသက်ငယ်များပြုစုရာရိပ်မြုံ ၊ Lighthouse Learning Centre၊ မြန်မာနိုင်ငံခရစ်ယာန်မျက်မမြင်များမိတ်သဟာယ၊ Myanmar Deaf Chefs နှင့်မြန်မာဒေါင်းဆင်ဒရုန်းအသင်း — တို့နှင့် ပူးပေါင်းဆောင်ရွက်ခဲ့ပြီး၊ မသန်စွမ်းမှုဆိုင်ရာ အသိပညာပေးခြင်းနှင့် အားလုံးအကျုံးဝင်ခြင်းဆိုင်ရာခရီးစဉ်၏ လိုအပ်ချက်များကို ဖြည့်ဆည်းပေးနိုင်ခဲ့ပါသည်။
စကားဝိုင်းဆွေးနွေးပွဲများ၊ အလုပ်ရုံဆွေးနွေးပွဲများနှင့် ကွန်ရက်ချိတ်ဆက်မှုများအပြင်၊ ဤစီမံကိန်းသည် မသန်စွမ်းသူများ၏ ကိုယ်ပိုင်ဘဝဇာတ်လမ်းများကို ဖော်ထုတ်ပေးခြင်းနှင့် အများသတိမပြုမိသော ၎င်းတို့၏ စွမ်းဆောင်ရည်များကို ပြသပေးခြင်းဖြင့် မသန်စွမ်းအသိုင်းအဝိုင်းအား လူမှုနယ်ပယ်တွင် ပိုမိုထင်ရှားလာစေခဲ့ပါသည်။ မိမိကိုယ်ကိုယ် လွတ်လပ်စွာ ဖော်ပြနိုင်မည့် ဘေးကင်းလုံခြုံသော ပတ်ဝန်းကျင်များကို ဖန်တီးပေးခြင်းဖြင့် ပိုမိုအထောက်အကူပြုပြီး အားလုံးအကျုံးဝင်သော လူ့အဖွဲ့အစည်းတစ်ခုဖြစ်လာစေရန် တွန်းအားပေးနိုင်ခဲ့ပါသည်။
ကျွန်ုပ်တို့အနေဖြင့် မိတ်ဖက်အဖွဲ့အစည်းများကို အထူးပင် ကျေးဇူးတင်ရှိပြီး၊ မြန်မာနိုင်ငံတစ်ဝန်းတွင် အလုံးအကျုံးဝင်သော လူမှုပတ်ဝန်းကျင်နှင့် ရေရှည်တည်တံ့သော ကူညီပံ့ပိုးမှုကွန်ရက်များ ပေါ်ထွန်းလာစေရန် ရေရှည်ကတိကဝတ်ပြုလျက် ဆက်လက်ကြိုးပမ်းသွားမည်ဖြစ်ပါသည်။

၂၀၂၅ ခုနှစ် ဒီဇင်ဘာလ ၇ ရက်နေ့တွင် Goethe-Institut Myanmar တွင် ယခုနှစ် ခရစ်စမတ် ဘာဇာ ကို အောင်မြင်စွာ ကျင်းပနိုင်ခဲ့ပြီး ဧည့်သည် ၁,၁၀၀ ကျော် ကို ကြိုဆိုလက်ခံခဲ့ပါသည်။ အဆိုပါနေ့တွင် စျေးရောင်းသူ ၅၈ ဦး၊ လူမှုအသိုင်းအဝိုင်း မိတ်ဖက်အဖွဲ့အစည်းများ၊ ဖျော်ဖြေရေးအဖွဲ့များနှင့် လာရောက်သူများ အားလုံး ပူးပေါင်းပါဝင်ကာ ဖန်တီးမှု၊ ပါဝင်ခွင့်နှင့် လူမှုဆက်ဆံရေးကို မြှင့်တင်နိုင်သည့် အချိန်ကာလတစ်ခု ဖြစ်ခဲ့ပါသည်။

အထူးသဖြင့် ဂျာမန်သံရုံးအဖွဲ့ နှင့် Goethe-Institut ဂျာမန်ဘာသာစကား ကျောင်းသားများ မှ ပူးပေါင်းပါဝင်ကာ ရန်ပုံငွေများ စုဆောင်းပေးခဲ့မှုအတွက် အထူးကျေးဇူးတင်ရှိပါသည်။ စုဆောင်းရရှိသော ရန်ပုံငွေများကို ပါဝင်မှုဆိုင်ရာ မိတ်ဖက်အဖွဲ့အစည်းများထံ ဖြန့်ဝေပေးသွားမည်ဖြစ်ပြီး လူမှုအသိုင်းအဝိုင်းအခြေပြု လုပ်ငန်းများကို ဆက်လက်ထောက်ပံ့ပေးသွားမည် ဖြစ်ပါသည်။

ခရစ်စမတ်ဈေးပွဲတော် ကို အနွေးထွေးမှု၊ အဓိပ္ပါယ်ရှိမှုနှင့် အောင်မြင်မှုတို့ဖြင့် ကျင်းပနိုင်ရန် ပံ့ပိုးကူညီပေးခဲ့ကြသော အားလုံးကို အထူးကျေးဇူးတင်ရှိပါသည်။

Goethe-Institut မြန်မာနှင့် School of Contemporary Art (SoCA) မှ ပူးပေါင်းပြုလုပ်သည့် Curious Academy Myanmar အစီအစဉ်သည် တက်ရောက်သူ ၁၈ ဦးကို ရွေးချယ်ပြီးနောက် ကနဦးအစီအစဉ်များကို စတင်နေပြီဖြစ်ပါသည်။
၂၀၂၅ ခုနှစ် ဒီဇင်ဘာမှ ၂၀၂၆ ခုနှစ် မတ်လအထိ ကြာမြင့်မည့် အစီအစဉ်တစ်ရပ်ဖြစ်ပြီး မြန်မာနိုင်ငံ၊ ဂျာမဏီ၊ အမေရိကန်နှင့် စက်ာပူနိုင်ငံများမှ ဦးဆောင်သူများက သင်ကြားပေးသူများပါ၀င်သွားမည်ဖြစ်ပါသည်။
online၊ in-person နှင့် Hybrid ပုံစံအသီးသီးဖြင့် ပြုလုပ်သွားမည်ပြီး နောက်ဆက်တွဲ အစီအစဉ်များကို Goethe-Institut မြန်မာ၏ အင်တာနက် စာမျက်နှာများတွင် အသိပေးသွားမည်ဖြစ်ပါသည်။

Goethe-Institut မြန်မာ၏ စာနာခြင်းတံတား အစီအစဉ်တွင် ပါ၀င်သည့် အဖွဲ့ ၁၂ ဖွဲ့သည် စာနာနားလည်ခြင်းဆိုင်ရာ အကြောင်းအရာများ၊ ခံယူချက်များ နှင့် စံနမူနာများကို မတူညီသည့် ချဉ်းကပ်မှုပုံစံများ၊ ခေါင်းစဉ်များဖြင့် နှစ်လတာ ဆွေးနွေးလာခဲ့ကြပြီးဖြစ်ပါသည်။ များမကြာခင်ကာလတွင် အဆိုပါ ဆွေးနွေးမှုများကိုပြန်လည်ထင်ဟပ်၍ အများနှင့် မျှ၀ေနိုင်မည့် စီမံကိန်းများကို အဖွဲ့အသီးသီးက အကောင်အထည်ဖော်သွားမည်ဖြစ်သည့်အတွက် နောက်ဆက်တွဲ အကြောင်းအရာများကို Goethe-Institut မြန်မာ၏ အင်တာနက် စာမျက်နှာများတွင် အသိပေးသွားမည်ဖြစ်ပါသည်။
 

Goethe-Institut မြန်မာမှ ဦးဆောင်စီစဉ်သော ခေတ်ပြိုင်အနုပညာ စီမံကိန်း၏ ရလဒ်ဖြစ်သည့်  Within & Beyond: Reimagining Art across Distances အနုပညာပြပွဲကို Goethe-Institut မြန်မာတွင် ဒီဇင်ဘာလ ၁၂ ရက်နေ့မှ ၁၈ ရက်နေ့ထိ ပြုလုပ်ခဲ့ပါသည်။
ပြပွဲတွင် မြန်မာ၊ ထိုင်း၊ ကမ္ဘောဒီးယား၊ ပြင်သစ်၊ ချက် (စ်) ရီပက်ဘလစ်၊ ပြင်သစ် နှင့် ဆွီဒင်အစရှိသည့် နိုင်ငံများတွင်ရှိနေသော မြန်မာ artist ၈ ဦးပါ၀င်ပြီး ၊ မြန်မာ ကျူရေတာ ၃ ဦးမှ စီစဉ်ခဲ့ပါသည်။ 
‘‘အကွာအဝေး နှင့် အဆက်အသွယ်ပြတ်(တောက်)ခြင်း‘‘ ဟူသည့်စကားရပ်၊ သူ၏သက်ရောက်မှု၊ ဝေးကွာမှုနှင့် အဆက်အသွယ်ပြတ်တောက်မှုများကြောင့် အသွင်သဏ္ဍာန်ပြောင်းလဲမှုအပြင်၊ အကွာအ၀ေးကြားက ချိတ်ဆက်မှု၊ ထိစပ်မှု၊ နားလည်နိုင်မှု၊ ခံစားနိုင်မှုများကို ထင်ဟပ်သည့် အနုပညာလက်ရာများကို ပြသခဲ့ပါသည်။

Academy of Care (AoC) ၏ ၂၀၂၄–၂၀၂၅ စီမံကိန်းကာလ သည် သင်ယူမှု၊ ပူးပေါင်းဆောင်ရွက်မှုနှင့် လူမှုအသိုင်းအဝိုင်းအခြေပြု သက်ရောက်မှုများကို အခိုင်အမာ တည်ဆောက်နိုင်ခဲ့သော ကာလတစ်ခုအဖြစ် အောင်မြင်စွာ အဆုံးသတ်ခဲ့ပါသည်။ ယခုနှစ်နှစ်တာကာလအတွင်း AoC သည် စနစ်တကျ လေ့ကျင့်သင်ကြားမှုများ၊ Alumni ထောက်ပံ့ရေးအစီအစဉ်များ နှင့် Peer Learning လုပ်ငန်းစဉ်များမှတစ်ဆင့် စိတ်ဒဏ်ရာကို နားလည်အလေးထားသော၊ ဖန်တီးမှုအခြေပြုနှင့် ပါဝင်ခွင့်ပါဝင်မှုကို အလေးထားသည့် စိတ်ကျန်းမာရေးနှင့် ကောင်းမွန်မှုဆိုင်ရာ လက်တွေ့ကျင့်သုံးမှုများကို ဆက်လက်ခိုင်မာစေခဲ့ပါသည်။

ဤကာလအတွင်း AoC သည် Cohort သုံးခု ကို ထောက်ပံ့ပေးခဲ့ပြီး လက်တွေ့လုပ်ဆောင်သူများ၊ လေ့ကျင့်ပေးသူများနှင့် လူမှုအသိုင်းအဝိုင်းအလုပ်သမား စုစုပေါင်း ၄၃ ဦး ပါဝင်ခဲ့ပါသည်။ ပါဝင်သူများအား ကိုယ်ပိုင်ဒေသဆိုင်ရာ လိုအပ်ချက်များကို စောင့်ရှောက်မှု၊ ကျင့်ဝတ်နှင့် ဖန်တီးမှုတို့အပေါ် အခြေခံ၍ တုံ့ပြန်နိုင်သည့် လူထုအခြေပြု စီမံကိန်းများကို ဒီဇိုင်းရေးဆွဲ၍ အကောင်အထည်ဖော်နိုင်ရန် ထောက်ပံ့ပေးခဲ့ပါသည်။ Alumni များ ဦးဆောင်ဆောင်ရွက်သည့် စီမံကိန်းများ၊ ဆက်လက်ကျွမ်းကျင်မှု မြှင့်တင်သင်ကြားမှုများနှင့် ကြီးကြပ်ညွှန်ကြားမှုအာကာသများသည် လက်တွေ့ကျင့်သုံးမှုကို ဆက်လက်တည်တံ့စေရန်၊ ဝေဖန်သုံးသပ်မှုများ ပြုလုပ်နိုင်ရန်နှင့် ပညာရှင်အဖြစ် ဖွံ့ဖြိုးတိုးတက်မှုကို အထောက်အကူပြုခဲ့ပါသည်။

ဤစီမံကိန်းကာလ အဆုံးသတ်ချိန်တွင် AoC သည် ယခင်အတွေ့အကြုံများကို အခြေခံကာ Alumni ကွန်ရက်များကို ပိုမိုခိုင်မာစေရန်နှင့် ရေရှည်တည်တံ့သော လူမှုအသိုင်းအဝိုင်းအခြေပြု စောင့်ရှောက်မှုနှင့် ခံနိုင်ရည်တိုးတက်ရေး လုပ်ငန်းများကို ဆက်လက် မြှင့်တင်သွားမည်ဖြစ်ပါသည်။ ၂၀၂၄–၂၀၂၅ AoC ခရီးစဉ်ကို အဓိပ္ပါယ်ရှိပြီး သက်ရောက်မှုရှိစေရန် ပူးပေါင်းပါဝင်ပံ့ပိုးပေးခဲ့ကြသော လေ့ကျင့်ပေးသူများ၊ Alumni များ၊ မိတ်ဖက်အဖွဲ့အစည်းများနှင့် ပူးပေါင်းဆောင်ရွက်သူများအားလုံးကို အထူးကျေးဇူးတင်ရှိပါသည်။
နောက်တစ်ဆင့်အဖြစ် Academy of Care သည် ၂၀၂၆ ခုနှစ်တွင် အခန်းသစ်တစ်ခုသို့ ဝင်ရောက်သွားမည်ဖြစ်ပြီး ဆက်လက်သတင်းအချက်အလက်များကို အချိန်သင့်အခါ မျှဝေကြေညာသွားမည်ဖြစ်ပါသည်။

လာမည့် ဇန်နဝါရီလ မှာ Sundowner Musical Gatheringတစ်ဖန်ပြန်လာခဲ့ပြီဖြစ်ပါသည်။ ဇန်နဝါရီလရဲ့ ညနေခင်းတစ်ခုကို တေးဂီတများကို နားဆင်ရင်း ကုန်ဆုံးဖို့ ဖိတ်ခေါ်လိုက်ပါသည်။ ဖျော်ဖြေမည့် အနုပညာရှင်များနှင့် အသေးစိတ်အချက်အလက်များကို လူမှုကွန်ယက်စာမျက်နှာများတွင် ကြေငြာပေးသွားမည်ဖြစ်ပါသည်။

၂၀၂၆ ခုနှစ် ဇန်နဝါရီမှစ၍ Goethe-Institut Myanmar သည် ဂျာမန်ဘာသာသင်တန်းများအတွက် term စနစ်သစ်ကို စတင်မိတ်ဆက်သွားမည်ဖြစ်ပါသည်။ သင်တန်းများကို နှစ်လတစ်ကြိမ် ဖွင့်လှစ်သွားမည်ဖြစ်ပြီး ဆက်တိုက်၊ စနစ်တကျ လေ့လာသင်ယူနိုင်စေရန်နှင့် တစ်နှစ်အတွင်း B1 အဆင့် ပြီးဆုံးနိုင်စေရန် ရည်ရွယ်ထားပါသည်။

Goethe-Zertifikat စာမေးပွဲများကို term တစ်ခုနှင့် တစ်ခုအကြားတွင် ကျင်းပသွားမည်ဖြစ်ပါသည်။ သင်တန်းအချိန်ဇယားကို ပုံတွင် ကြည့်ရှုနိုင်ပြီး သင်တန်းအပ်နှံကာလများကို သင်တန်းစတင်မည့်နေ့မတိုင်မီ Goethe-Institut Myanmar ၏ လူမှုကွန်ယက်စာမျက်နှာများမှ ကြေညာပေးသွားမည်ဖြစ်ပါသည်။

Goethe သင်တန်းသားများအတွက် အထူးခံစားခွင့်များမှာ –

• စာမေးပွဲကြေး internal student စျေးနှုန်းထားများ
• တစ်နှစ်တာ အခမဲ့ စာကြည့်တိုက်အသုံးပြုခွင့်
• Leseclub၊ Lernberatung နှင့် Board Game Days ကဲ့သို့သော ဘာသာစကားစွမ်းရည် တိုးတက်စေရန် အထောက်အကူပြု အစီအစဉ်များ

ထို့အပြင် သင်တန်းသားများအတွက်သာ ရည်ရွယ်ထားသော Living and Working in Germany၊ Study in Germany အစီအစဉ်များ၊ Goethe-Zertifikat စာမေးပွဲ မိတ်ဆက်လမ်းညွှန် အစီအစဉ်များ နှင့် တစ်လတစ်ကြိမ် ပြုလုပ်မည့် Conversation Classes များကိုလည်း ပါဝင်တက်ရောက်နိုင်ပြီး ဂျာမန်စကားပြောစွမ်းရည်ကို ပိုမိုတိုးတက်စေရန် ကူညီပေးပါသည်။

နှစ်သစ်အစမှာ ဂျာမန်ဘာသာစကားကို စနစ်တကျ၊ ထိရောက်စွာ လေ့လာလိုပါက Goethe-Institut Myanmar နှင့်အတူ စတင်လေ့လာလိုက်ပါ။

နှစ်သစ်မှာ ဂျာမန်ဘာသာစကားကို စနစ်တကျလေ့လာချင်သူတွေအတွက် ၁၆ နှစ်အထက် A1, A2, B1 အတန်းများကို Goethe-Institut Myanmar မှာ ဇန်နဝါရီလအတွင်း စတင်ဖွင့်လှစ်တော့မှာ ဖြစ်ပါတယ်။ အတန်းချိန်တွေကို In-person သာမက Online နဲ့ Hybrid အတန်းတွေပါ ဖွင့်လှစ်ထားတာမို့ မိမိနဲ့ အဆင်ပြေမယ့် ပုံစံကို စိတ်ကြိုက်ရွေးချယ် တက်ရောက်နိုင်ပါတယ် 
ယခုနှစ်မှစတင်ပြီး ကျောင်းသားများအတွက် အထူးခံစားခွင့်တွေအနေနဲ့ စာကြည့်တိုက်အသင်းဝင်ကတ် တစ်နှစ်စာအခမဲ့ ရယူနိုင်မယ့်အပြင်၊ Living and Working in Germany, and Study in Germany တို့ကို ကျောင်းသားများအတွက် သီးသန့် session တစ်ခုစီစဉ်ကာ မျှဝေပေးသွားမှာဖြစ်ပြီး Goethe-Zertifikat စာမေးပွဲလမ်းညွှန် အစီအစဉ်ကိုပါ ထည့်သွင်းပေးသွားမှာဖြစ်ပါတယ်။ ဒါ့အပြင် ဂျာမန်စကားပြောတိုးတက်စေဖို့ Stammtisch အစီအစဉ်ကိုပါ ကျောင်းသားများအတွက် သီးသန့်စီစဉ်ပေးသွားဦးမှာပါ။ 
ဒါကြောင့် Goethe-Institut Myanmar မှာ ဂျာမန်စာကို အခြေခံပိုင်နိုင်စွာ သင်ယူရင်း ၂၀၂၆ ခုနှစ်မှာ ဂျာမနီအိပ်မက်ကို အကောင်အထည်ဖော်ဖို့ အခုပဲ စာရင်းပေးသွင်းလိုက်ပါ။

ကလေးတွေငယ်စဉ်ကာလမှာ ဘာသာစကားအသစ်တစ်ခုသင်ယူခြင်းက အကျိုးရှိစေတဲ့အပြင်၊ ဉာဏ်ရည်ထက်မြက်ဖို့နဲ့ ‌ယုံကြည်မှုပိုရှိပြီး ပိုသွက်လက်လာဖို့ အများကြီးအထောက်အကူပြုစေပါတယ်။

ယခုလာမယ့် ဇန်နဝါရီလမှာတော့ Goethe-Institut Myanmar ကနေ ကလေးနဲ့ ဆယ်ကျော်သက်များအတွက် ဂျာမန်စာသင်တန်းတွေကို ဖွင့်လှစ်ပေးထားပါတယ်။ အသက် ၁၁ နှစ်ကနေ ၁၅ နှစ်အတွင်း အခြေခံရှိပြီးသား သားသားမီးမီးမည်သူမဆို တက်ရောက်နိုင်တဲ့အတန်းများဖြစ်ပါတယ်။ ယခင်ကလေးတန်းမှာ တက်ရောက်ခဲ့တဲ့ သားသားမီးမီးတွေအတွက်လည်း ဂျာမန်စာကို ဒီတစ်ခေါက်အတန်းလေးမှာ ဆက်လက်သင်ယူနိုင်မှာဖြစ်ပါတယ်။
ဘာသာစကားသင်တန်းဖြစ်ပေမယ့် အသက်အရွယ်နဲ့ကိုက်ညီပြီး အတန်းတွင်းပျော်ပျော်ရွှင်ရွှင်နဲ့စာလိုက်လုပ်နိုင်မယ့် သင်ကြားမှုပုံစံမျိုးကို စီစဉ်ထားပြီး သင်တန်းကိုလာရောက်စရာမလိုဘဲ အွန်လိုင်း (Online) အတန်းနဲ့ သင်ကြားနိုင်မှာဖြစ်ပါတယ်။ (သင်တန်းအချိန်စာရင်းနဲ့ သင်တန်းကြေးများကို ပုံပါအတိုင်းကြည့်ရှုနိုင်ပါတယ်။)
ကျောင်းသားဦးရေအကန့်အသတ်ရှိတဲ့အတွက် စိတ်ပါဝင်စားသူများအနေဖြင့် သတ်မှတ်ရက်အတွင်း booking ပြုလုပ်ပြီး အစောဆုံးအပ်နှံလိုက်တော့နော်။

- သင်တန်းအပ်နှံရန်ကာလ။ ၂၀၂၆ ခုနှစ်၊ ဇန်နဝါရီလ ၁ ရက်မှ ၂၀၂၆ ခုနှစ်၊ ဇန်နဝါရီလ ၇ ရက် 

မှတ်ချက်။ Booking Confirmation ရရှိပြီး ရုံးဖွင့်ရက် ၃ ရက်အတွင်း ငွေပေးချေခြင်းမရှိပါက သင်တန်းလျှောက်လွှာအား ပယ်ဖျက်သွားမည်ဖြစ်ပါသည်။ သင်တန်းအတွက် ငွေပေးချေအပြီးတွင် ငွေလွှဲပြေစာကို အမည်၊ Customer number၊ အပ်နှံသည့်အတန်းတို့နှင့်တကွ info.language.mmr@goethe.de  သို့ အီးမေးလ်ပေးပို့ပေးရပါမည်။

၂၀၂၆ ခုနှစ်မှ စတင်၍ Goethe-Institut Myanmar သည် ဂျာမန်ဘာသာ စာမေးပွဲများကို နှစ်လတစ်ကြိမ် ပြုလုပ်မည့် စနစ် အသစ်ဖြင့် စီစဉ်သွားမည်ဖြစ်ပါသည်။ ဤစနစ်အသစ်ကြောင့် စာမေးပွဲအတွက် ပြင်ဆင်လေ့လာရန် အချိန်ပိုမိုရရှိပြီး၊ စာမေးပွဲဖြေမည့်ရက်ကို စိတ်ချစွာ စီမံနိုင်မည်ဖြစ်ပါသည်။ စာမေးပွဲနေရာအရေအတွက်ကို လျှော့ချခြင်း မရှိပါ။

သင့်အတွက် အကျိုးကျေးဇူးများ

• စာမေးပွဲများအကြား ပြင်ဆင်လေ့လာရန် အချိန်ပိုမိုရရှိခြင်း
• ကိုယ်ရွေးချယ်ထားသည့် စာမေးပွဲအတွက် ပိုမိုလွယ်ကူစွာ စီမံနိုင်ခြင်း
• စာမေးပွဲနေရာအရေအတွက် မပြောင်းလဲခြင်း

စာမေးပွဲ booking တင်ရက်များ ကို ကျွန်ုပ်တို့၏ Social Media ချန်နယ်များ မှတဆင့် ကြေညာပေးသွားမည်ဖြစ်ပါသည်။ စာမေးပွဲရက်စွဲအပြည့်အစုံကို အထက်ပါ ရုပ်ပုံဇယား တွင် ကြည့်ရှုနိုင်ပါသည်။

ပြောင်းလဲမှုများရှိပါက စာမေးပွဲဖြေဆိုသူအားလုံးအား ကြိုတင်အသိပေးသွားမည်ဖြစ်ပါသည်။

လာမယ့် ၂၀၂၆ ဇန်နဝါရီလမှာ ဖွင့်လှစ်မည့် ဂျာမန်ဘာသာစကားသင်တန်းများကို တက်ရောက်လိုသူများအတွက် သတင်းကောင်းတစ်ခုကို ကြေညာပေးချင်ပါတယ်။
၂၀၂၆ ခုနှစ်၊ ဇန်နဝါရီလ ၁ ရက်နေ့  တွင် သင်တန်းအပ်နှံသူများအတွက် နှစ်သစ်ကူးလက်ဆောင် အထူးပရိုမိုကုတ် “NEUJAHR26“ ကို ထည့်သွင်းပြီး သင်တန်းကြေး ၁၀% လျှော့ဈေးကို ရရှိမှာဖြစ်ပါတယ်။

• ပရိုမိုကုတ်အသုံးပြုနိုင်မည့်ကာလ။ ၂၀၂၆ ခုနှစ်၊ ဇန်နဝါရီလ ၁ ရက် (တစ်ရက်တည်းသာ)
• ဖြည့်သွင်းရန် ပရိုမိုကုတ်။ NEUJAHR26
• ခံစားခွင့်။ သင်တန်းကြေးမှ ၁၀% လျှော့ဈေး

ပရိုမိုကုတ်အသုံးပြုနိုင်သူတွေက? 
၂၀၂၆ ခုနှစ်၊ ဇန်နဝါရီလတွင် ဖွင့်လှစ်မည့် A1.2 နှင့်အထက် သင်တန်းများကို တက်ရောက်မည့်သူများ အကျုံးဝင်ပါသည်။ (အခြေခံသင်တန်း (Basic Class) မှ ဆက်လက်တက်ရောက်မည့် ကျောင်းသားဟောင်းများသာမက အပြင်မှ လာရောက်အပ်နှံမည့် A1.2 နှင့်အထက် ကျောင်းသားသစ်များလည်း အသုံးပြုနိုင်ပါသည်။)

ပရိုမိုကုတ်ထည့်သွင်းပုံ? 
သင်တန်းအတွက် Registration ပြုလုပ်ချိန်တွင် ပရိုမိုကုတ်ဖြည့်ရမည့်အကွက်သို့ရောက်ပါက NEUJAHR26 ကို ထည့်သွင်းရေးသားနိုင်ပါသည်။ လျှောက်လွှာတင်သွင်းမှုမပြီးဆုံးခင် ထည့်သွင်းပေးရန်လိုပါသည်။

ဂျာမန်ဘာသာစကားသင်ယူရင်း ပန်းတိုင်ကို အရောက်လှမ်းနိုင်ဖို့ ကြိုးစားနေသူတွေအတွက် ဒီအခွင့်အရေးလေးကို လက်လွတ်မခံကြဖို့ တိုက်တွန်းလိုက်ပါတယ်နော်။

အသေးစိတ်အချက်အလက်များအတွက် ကျွန်ုပ်တို့၏ကျောင်းသားရေးရာဌာန 01 937 6160 (Ext. 1) သို့ ဆက်သွယ်မေးမြန်းနိုင်ပါသည်။

မှတ်ချက်။ သင်တန်းအပ်နှံသည့်အဆင့်တွင် ပရိုမိုကုတ်ကို တစ်ပါတည်း ထည့်သွင်းရေးသားပေးမှသာ သင်တန်းကြေး ၁၀% လျှော့ဈေးကို ရရှိနိုင်မည်ဖြစ်သည့်အတွက် Registration ပြုလုပ်ရာတွင် မမေ့လျော့ဘဲ သေချာစွာထည့်သွင်းပေးရန်လိုအပ်ပါသည်။

ဇန်န၀ါရီလမှာ စာကြည့်တိုက်တွင် သားသားမီးမီးလေးတွေအတွက်  သစ်လွင်တောက်ပတဲ့ ရောင်စုံစက္ကူလေးတွေကို အသုံးပြုပြီး စိတ်ကူးထဲက ပုံသဏ္ဍာန်တွေကို  ဖန်တီးနိုင်မယ့်  Paper Collage Mosaic Art session ကို ပြုလုပ်သွားမည်ဖြစ်ကြောင်း သတင်းကောင်းပါးလိုက်ပါတယ်။ 

Alma Thomas ရဲ့ အရောင်အသွေးစုံလင်တဲ့ အနုပညာဟန်ပန် ကို မှီငြမ်းထားတဲ့ ဒီ workshop လေးမှာတော့ အသက် ၆ နှစ်မှ ၁၂ နှစ် အရွယ် ကလေးများက သေးငယ်တဲ့ စက္ကူအပိုင်းအစလေးတွေကို လှပဆန်းသစ်တဲ့ dynamic mosaic collage အဖြစ် ပုံဖော်ဖန်တီးကြမှာဖြစ်ပါတယ်။ အနုပညာကို စိတ်၀င်စားတဲ့ကလေးတွေအတွက်တော့ ဒီအစီအစဥ်လေးကနေ အရောင်လေးတွေအကြောင်းစူးစမ်းလေ့လာနိုင်သလို ရိုးရှင်းတဲ့ ဒီဇိုင်းပုံစံလေးတွေကို ကိုယ်တိုင်လက်တွေ့ဖန်တီးရင်း ကိုယ့်ရဲ့  စိတ်ခံစားချက်လေးတွေကိုလည်း အမြင်ထူးခြားတဲ့ textured artworks အဖြစ် ဖော်ပြနိုင်မှာဖြစ်ပါတယ်။လက်တွေ့ဆောင်ရွက်ရတဲ့  ဒီ College Mosaic Art session  လေးက ကလေးတွေကို စိတ်ပျော်ရွင်မှုနဲ့ အနုပညာအတွေ့အကြုံအသစ်တွေကို ပေးစွမ်းနိုင်မှာအသေအချာပါပဲ။ ဒါကြောင့် ဒီအစီအစဥ်လေးမှာ ပါ၀င်ပြီး သင့်ကလေးကို အရောင်၊ ပုံသဏ္ဍာန် နှင့် အနုပညာဖော်ပြမှုတွေရဲ့ အနှစ်သာရကို စီးမြောခံစားစေလိုက်ပါနော်။

ဝင်ကြေးအခမဲ့ဖြစ်ပြီး၊ လူဦးရေကန့်သတ်ထားတာမို့ စာရင်းပေးသွင်းချင်တယ်ဆိုရင်တော့ - ♦အမည်  ♦ အသက် ♦ဖုန်းနံပါတ် တို့ကို biblio-yangon@goethe.de မှတစ်ဆင့် အီးမေးလ်ပေးပို့ပြီး စာရင်းပေးသွင်းနိုင်ပါပြီ။   

စာကြည့်တိုက်မှာ ပုံမှန်ကျင်းပလေ့ရှိတဲ့ Board Game Day လေးကို ဇန်နဝါရီလ မှာတော့ အသစ်အဆန်းအနေဖြင့် သဘာ၀ပတ်၀န်းကျင်ဆိုင်ရာဂိမ်းလေးကို ‌ရွေးချယ်ပေးထားပါတယ်။  ဒီဂိမ်းလေးမှာတော့ အမှိုက်အမျိုးအစားတွေ ဘယ်လိုခွဲခြားစွန့်ပစ်ရမလဲ၊ ပစ္စည်း‌ဟောင်းလေးတွေကို ဘယ်လိုပြန်လည်အသုံးပြုနိုင်မလဲနှင့် ကာဗွန်ထုတ်လုပ်မှုလျော့ချဖို့ ဘယ်လိုနည်းလမ်းတွေနဲ့ စွမ်းအင်တွေကိုသုံးကြမလဲဆိုတာကို ချစ်စရာမြေပုံလေးအတိုင်း အံစာတုံးခေါက်ရင်း တူတူခန့်မှန်းဖြေဆိုရမှာဖြစ်ပါတယ်။
 
ဒီ Board Game လေးမှာ ဂိမ်းကစားသူတွေ  သဘာဝပတ်ဝန်းကျင်ထိန်းသိမ်းရေးနဲ့ပတ်သက်တဲ့ အသိပညာတွေကို ပျော်ရွှင်စွာလေ့လာနိုင်အောင် စိတ်၀င်စားဖွယ် ဒီဇိုင်းဆွဲပေးထားတာဖြစ်ပါတယ်။ ဒီဂိမ်းလေးက ဂျာမန်ဘာသာစကား A2 Level နှင့်အထက် ကျောင်းသူကျောင်းသားများအတွက် အထူးသင့်တော်ပါတယ်။   ဒါကြောင့် သဘာ၀ပတ်၀န်းကျင်ထိန်းသိမ်းရေးနှင့်သက်ဆိုင်တဲ့ ဂျာမန်‌‌‌ဝေါဟာရအသစ်တွေကို လေ့လာချင်တယ်ဆိုရင် biblio-yangon@goethe.de သို့ အမည်၊  ဖုန်းနံပါတ်၊ မိမိရဲ့ ဂျာမန် level ကိုအီးမေးလ်ပေးပို့ပြီး ခုပဲ စာရင်းပေးလိုက်တော့နော်။

ဂျာမန်ဘာသာစကား သင်ယူနေတဲ့သူတွေ စာဖတ်စွမ်းရည် တိုးတက်လာ‌စေရန်နှင့် စကားလုံး‌ဝေါဟာရများ ပိုကြွယ်၀လာ‌စေရန်  လစဥ်ကျင်းပပြုလုပ်တဲ့ “Reading Club/Leseclub’’ လေး ရောက်ရှိလို့လာပါပြီ။

ဒီလရဲ့ အစီအစဥ်လေးက A1 Level အတွက်ဖြစ်ပြီး  ဆရာမနဲ့အတူတူ (၂) ချိန်စလုံး စာအုပ်တစ်အုပ်တည်းကို ဖတ်ကြမှာဖြစ်ပါတယ်။ ဒါ‌ကြောင့်  (၂) ရက်စလုံး ပါ၀င်ပေးနိုင်မှသာ ထိ‌ရောက်တဲ့ စာဖတ်ခြင်း အလေ့အထကောင်းကို ပိုင်ဆိုင်နိုင်မှာဖြစ်ပါတယ်။  
 
ဒါဆို ၀ါသနာတူသူငယ်ချင်းတွေနဲ့စာတူတူဖတ်ကြရင်း အတွေးအမြင်လေးတွေ ‌‌ ဝေမျှဖို့  ဖိတ်ခေါ်ပါရစေနော်။
စိတ်၀င်စားလို့ ပါ၀င်ချင်တယ်ဆိုရင်တော့ biblio-yangon@goethe.de သို့ အမည်၊  ဖုန်းနံပါတ်၊ မိမိရဲ့ ဂျာမန် level ကိုအီးမေးလ်ပေးပို့ပြီး စာရင်းပေးသွင်းနိုင်ပါတယ်။

"Learning Advisory" Programလို့ ခေါ်တဲ့ "Lernberatung" အစီအစဉ်မှာ သင့်ရဲ့ ဂျာမန်စာလေ့လာမှုနဲ့ ပတ်သက်ပြီး ရင်ဆိုင်နေရတဲ့ အခက်အခဲတွေ၊ ပြဿနာတွေကို Goethe-Institut Myanmar မှ ဆရာ/ဆရာမကနေ ဆွေးနွေးအကြံပြုပေးသွားမှာ ဖြစ်ပါတယ်။ ဒီလရဲ့ ''Lernberatung'' အစီအစဉ်ကတော့ A2-level အတွက်ဖြစ်ပြီး ဂျာမန်ဘာသာစကား လေ့လာနေသူများအတွက် ဖတ်ရှုသင့်တဲ့ စာအုပ်တွေ၊ online resources တွေ၊ ကိုယ့် level နဲ့ ကိုက်ညီမယ့် အကြံပြုချက်တွေကို ဆွေးနွေးအကြံပြုပေးသွားမှာပဲ ဖြစ်ပါတယ်။

စာကြည့်တိုက်သို့လူကိုယ်တိုင်မလာရောက်နိုင်သူတွေအတွက်လည်းပါ၀င်မေးမြန်းလို့ရအောင် virtual online session ကိုလည်း ထည့်သွင်းစီစဉ်ပေးထားပါတယ်။

ဒီအစီအစဉ်လေးမှာ ပါ၀င်ချင်တယ်ဆိုရင်တော့ biblio-yangon@goethe.de သို့ အမည်၊ ဖုန်းနံပါတ်၊ မိမိရဲ့ ဂျာမန် level၊ မိမိမေးလိုသည့် အကြောင်းအရာ နှင့် မိမိတက်ရောက်လိုသည့် session (၈.၀၁.၂၀၂၆ - အွန်လိုင်းမီတင် (သို့) ၂၁.၀၁.၂၀၂၆ (လူကိုယ်တိုင်) စသည်တို့ကိုအီးမေးလ်ပေးပို့ပြီး အခုပဲ စာရင်းပေးလိုက်တော့နော်။