Goethe-Institut Myanmar

Goethe-Institut Myanmar သည် ၂၀၂၆ ခုနှစ်၊ ဖေဖော်ဝါရီလ ၁၅ ရက်နေ့တွင် စတင်တာဝန်ထမ်းဆောင်ရန်အတွက် အချိန်ပြည့် (တစ်ပတ်လျှင် နာရီ ၄၀) ဖြင့် သတ်မှတ်ကာလစာချုပ်ဖြင့် တာဝန်ထမ်းဆောင်ရန် ဒစ်ဂျစ်တယ်ဆက်သွယ်ရေး လက်ထောက်ရာထူးနေရာအတွက် စိတ်အားထက်သန်သော လူငယ်ပညာရှင်တစ်ဦးကို ခေါ်ယူလျက်ရှိသည်။
ဤရာထူးသည် ဥရောပယဉ်ကျေးမှုနှင့် ပညာရေးဆိုင်ရာအဖွဲ့အစည်း၏ ဒစ်ဂျစ်တယ်ဆက်သွယ်ရေးလုပ်ငန်းများတွင် ပံ့ပိုးကူညီရင်း နိုင်ငံတကာလုပ်ငန်းခွင်ပတ်ဝန်းကျင်တွင် လက်တွေ့အတွေ့အကြုံများရယူနိုင်ရန် အကောင်းဆုံးအခွင့်အလမ်းတစ်ခုဖြစ်ပါသည်။ ကျွန်ုပ်တို့၏ ဒစ်ဂျစ်တယ်ဆက်သွယ်ရေးလုပ်ငန်းများတွင် တီထွင်ဖန်တီးမှုရှိစွာ ပံ့ပိုးကူညီလိုပြီး လှုပ်ရှားတက်ကြွကာ ယဉ်ကျေးမှုမျိုးစုံပေါင်းဆုံရာ ပတ်ဝန်းကျင်တွင် ပညာရှင်တစ်ဦးအနေဖြင့် တိုးတက်လိုသူများကို ကြိုဆိုပါသည်။
အလုပ်တာဝန်များ၊ လိုအပ်ချက်များနှင့် လျှောက်ထားရမည့် လုပ်ငန်းစဉ်များအကြောင်း ပိုမိုလေ့လာရန် အောက်ပါလင့်ခ်ကို နှိပ်ပါ။

ကြည်နူးစရာကောင်းတဲ့ ဆောင်းရာသီညနေခင်းလေးကို Goethe-Institut Myanmar မှာ ကျွန်တော်တို့နဲ့အတူတူ ဖြတ်သန်းဖို့ ဖိတ်ခေါ်လိုက်ပါတယ်။
ဒီပွဲလေးဟာ ဖြစ်တည်မှုတို့ယှက်နွယ်ရာ မိတ်ဖက်အဖွဲ့အစည်းတွေနဲ့ အများပြည်သူအားလုံး ပျော်ရွှင်စွာတွေ့ဆုံကြပြီး ရင်းနှီးနွေးထွေးတဲ့ အသိုက်အဝန်းလေးကို တည်ဆောက်နိုင်ဖို့ ရည်ရွယ်ကျင်းပတာဖြစ်ပါတယ်။ယခုပွဲဟာ မသန်စွမ်း မိတ်ဖက်အဖွဲ့အစည်းဖြစ်တဲ့ Myanmar Deaf chef နဲ့ အဓိက ပူးပေါင်း ကျင်းပသွားမှာ ဖြစ်ပြီး  အခြားသော မသန်စွမ်းမိတ်ဖက်အဖွဲ့အစည်းအချို့ပါဝင်မှာဖြစ်ပါတယ်။ ဒီညနေခင်းပွဲလေးမှာ စုံလင်လှတဲ့ မုန့်မျိုးစုံ နဲ့ Goethe Café က ပါဝင်အားဖြည့်ထားတဲ့ အရသာရှိတဲ့ ဂျာမန်အစားအစာတွေကိုလည်း ဝယ်ယူမြည်းစမ်းနိုင်မှာဖြစ်ပါတယ်။
အထူးအစီအစဉ်အနေနဲ့ မသန်စွမ်းဂီတပညာရှင်များနဲ့ ဖွဲ့စည်းထားတဲ့ The Fingers Band ရဲ့ တီးခတ်ဖျော်ဖြေမှုကိုလည်း နားဆင်ခံစားရမှာပါ။
ဒါ့အပြင် ကလေးများအတွက် ပျော်စရာကောင်းတဲ့ လက်မှုအနုပညာအစီအစဉ်လည်း ပါဝင်မှာဖြစ်ပါတယ်။ မိသားစုလိုက် အတူတကွ ဈေးဝယ်ရင်း၊ ဂီတသံစဉ်တွေကို နားဆင်ရင်း၊ နွေးထွေးတဲ့ ညနေခင်းလေးတစ်ခုကို ဖြတ်သန်းဖို့ အတွက် လာရောက်ခဲ့ဖို့ ဖိတ်ခေါ်ပါတယ်။

နေ့ရက်: ၂၀၂၅ ခုနှစ်၊ နိုဝင်ဘာလ ၂၂ ရက် (စနေနေ့)
အချိန်: ညနေ ၂:၀၀ မှ ၆:၀၀ နာရီအထိ
နေရာ: Goethe-Institut Myanmar (စာကြည့်တိုက်ရှေ့နှင့် ဥယျာဉ်နေရာ)
ဝင်ကြေး: အများပြည်သူအားလုံး အခမဲ့ ပါဝင်ဆင်နွှဲနိုင်ပါတယ်။

နယူးဇီလန်သံရုံး(ရန်ကုန်)နှင့် Goethe-Institut တို့မှ “နယူးဇီလန်၊ မြန်မာနှင့် အာဆံယံ‌ဒေသတို့အကြား ရက်ကန်းခတ်ဖလှယ်ခြင်းပြပွဲ” အား ကျင်းပပြုလုပ်မည်ဖြစ်ပါသည်။

နေ့ရက်နှင့် အချိန် (နို၀င်ဘာ ၇ ရက်နေ့မှ ၉ ရက်)
သောကြာနေ့ နှင့် စနေနေ့ - မနက် ၁၀ နာရီ မှ ညနေ ၄ နာရီ
တနင်္ဂနွေ - မနက် ၁၀ နာရီ မှ နေ့လည် ၁ နာရီ
         
အထူးအစီအစဉ်
သောကြာနေ့ - ကျောင်းများအတွက်အစီအစဥ်
စနေနေ့ နေ့လည် ၁ နာရီ - ရက်ကန်းအနုပညာရှင်များနှင့်တွေ့ဆုံခြင်း (i-Creative, Sunflower, Pochi Silk)
 
နေရာ: Goethe-Institut မြန်မာ (ပြပွဲခန်းမ)

နယူးဇီလန်နှင့်မြန်မာ ယဥ်ကျေးမှုပေါင်းစပ်ထားသည့် ရက်ကန်းအနုပညာများကို ကြည့်ရှုလေ့လာနိုင်ပါသည်။

Goethe-Institut မြန်မာနှင့် School of Contemporary Art (SoCA) မှ ပူးပေါင်းပြုလုပ်သည့် Curious Academy Myanmar အစီအစဉ်တွင် ပါ၀င်နိုင်ရန် participant များကို ဖိတ်ခေါ်ပါသည်။
အနုပညာဖန်တီးခြင်းတွင် စူးစမ်းချင်စိတ်ကို အခြေခံထားသော လေ့လာသင်ကြားနည်းများပါ၀င်သည့် အစီအစဥ်တစ်ခုဖြစ်ပြီး ဖန်တီးမှုကြားခံနယ် အသစ်များ၊ တစ်ခုထက်ပိုသော ကြားခံနယ်တို့ကို စူးစမ်းလေ့လာသော အပြန်အလှန်သင်ကြားမှုအစီအစဉ်များ ပါ၀င်မည်ဖြစ်သည်။

၂၀၂၅ ခုနှစ် ဒီဇင်ဘာမှ ၂၀၂၆ ခုနှစ် မတ်လအထိ ကြာမြင့်မည့် အစီအစဉ်တစ်ရပ်ဖြစ်ပြီး Open Call နှင့် ပတ်သက်သည့် အသေးစိတ်အချက်အလက်များကို အောက်ပါ link မှ ၀င်ရောက်ကြည့်ရှုနိုင်ပါသည်။

Goethe-Institut မြန်မာမှ ဉီးဆောင်ပြုလုပ်သည့် နားထောင်ခြင်း၊ မျှ၀ေခံစားခြင်း၊ ပြန်လည်တည် ဆောက်ခြင်း၊ ပြန်လည်ကုစားခြင်းနှင့် ပြန်လည်တူးဖော်သင်ခန်းစာယူခြင်းတို့ဆီ ဦးတည်သည့် စာနာခြင်းတံတား အစီအစဉ်သည် အဖွဲ့ပေါင်း ၁၃ ဖွဲ့ရှိသည့် ဆွေးနွေး၀ိုင်းအဖွဲ့များကို ဖွဲ့စည်းခဲ့ပြီဖြစ်ပါသည်။ တစ်ဖွဲ့စီတွင် အဖွဲ့၀င် ၈ ဦးမှ ၁၀ ဦးအထိ ပါ၀င်ပြီး မြန်မာနိုင်ငံ အနှံ့အပြားနှင့် ပြည်ပတွင်ရှိသူများလည်းပါ၀င်ပါသည်။ စာနာခြင်းတံတား အစီအစဉ်၏ အစိတ်အပိုင်းတစ်ရပ်ဖြစ်သော အဖွဲ့လိုက်ဆွေးနွေးခြင်းများ လုပ်ဆောင်ရာတွင် ပါ၀င်မည့် အသေးစိတ်အချက်အလက်များကို အဖွဲ့အသီးသီးတွင်ပါ၀င်သည့် co-leads များနှင့် တွေ့ဆုံသည့်အစီအစဉ်တစ်ရပ်ကို အောက်တိုဘာလ ၁၀ ရက်နေ့ က Goethe-Institut Myanmar တွင် Hybrid Format ဖြင့် ပြုလုပ်ခဲ့ပါသည်။ အဖွဲ့အသီးသီး၏ ဆွေးနွေးမှုများကို အောက်တိုဘာလမှ နို၀င်ဘာလကုန်အထိ ပြုလုပ်သွားမည်ဖြစ်ပြီး နောက်ဆက်တွဲအစီအစဉ်များကိုလည်း Goethe-Institut မြန်မာ၏ အင်တာနက်စာမျက်နှာများတွင် ဖော်ပြသွားမည်ဖြစ်ပါသည်။

အကွာအဝေးကြောင့် ဖြစ်ပေါ်လာသော ထပ်တူညီမှုနှင့် ခြားနားမှုများ အစရှိသည်တို့ကို ထင်ဟပ်သည့် အနုပညာလက်ရာများကို တင်ဆက်ပြသရန်ရည်ရွယ်သည့် Within & Beyond: Reimagining Art across Distances အစီအစဉ်ကို စက်တင်ဘာလတွင် စတင်ခဲ့ပြီးဖြစ်ပါသည်။
မြန်မာ၊ ထိုင်း၊ ကမ္ဘောဒီးယား၊ ပြင်သစ်၊ ချက် (စ်) ရီပက်ဘလစ်၊ ပြင်သစ် နှင့် ဆွီဒင်အစရှိသည့် နိုင်ငံများတွင်ရှိနေသော မြန်မာ artist ၈ ဦး၊ မြန်မာ ကျူရေတာ ၃ ဦးတို့ ပါ၀င်သည့် အစီအစဉ်တွင် အနုပညာလက်ရာများကို စီမံကိန်း၏ theme နှင့် artist များ၏ လက်ရာဖန်တီးမှုများအကြား ချိတ်ဆက်ပုံဖော်မည့် အကြောင်းအရာများကို အပြန်အလှန်ဆွေးနွေးသည့် အစီအစဉ်များကို အောက်တိုဘာလ ပထမပတ်အထိ ပြုလုပ်ခဲ့ပြီးဖြစ်ပါသည်။ ယခုအခါ artist များမှ အနုပညာလက်ရာဖန်တီးထုတ်လုပ်နေသည့်ကာလသို့ ရောက်ရှိလာပြီဖြစ်ပြီး နောက်ဆက်တွဲ အစီအစဉ်များကို Goethe-Institut မြန်မာ၏ အင်တာနက်စာမျက်နှာများတွင် ထပ်မံ ဖော်ပြသွားမည်ဖြစ်ပါသည်။

လာမည့် နို၀င်ဘာလမှာ Sundowner Musical Gathering တစ်ဖန်ပြန်လာခဲ့ပြီဖြစ်ပါသည်။ အောက်တိုဘာလရဲ့ ညနေခင်းတစ်ခုကို တေးဂီတများကို နားဆင်ရင်း ကုန်ဆုံးဖို့ ဖိတ်ခေါ်လိုက်ပါသည်။ ဖျော်ဖြေမည့် အနုပညာရှင်များနှင့် အသေးစိတ်အချက်အလက်များကို လူမှုကွန်ယက်စာမျက်နှာများတွင် ကြေငြာပေးသွားမည်ဖြစ်ပါသည်။

“Stronger Together: Collective Recovery and Creative Care in Crisis”
အောက်တိုဘာ ၁၀ မှ ၁၂၊ ၂၀၂၅ | Goethe-Institut မြန်မာပွဲခန်းမ

Goethe-Institut မြန်မာ မှ “Stronger Together: Collective Recovery and Creative Care in Crisis” ခေါင်းစဉ်ဖြင့်    ကမ္ဘာ့ စိတ်ကျန်းမာရေးနေ့များ (World Mental Health Days) ၂၀၂၅ အစီအစဉ်ကို အောင်မြင်စွာ ကျင်းပပြီးခဲ့ပါတယ်။
သုံးရက်တာ အစီအစဉ်အတွင်းတွင် စိတ်ကျန်းမာရေး၊ ဖန်တီးမှုနှင့် စိတ်ခံစားမှုကြံ့ခိုင်မှု (Emotional Resilience) ကို အခြေခံ၍ အနုပညာပညာရပ်များမှတဆင့် စူးစမ်းလေ့လာကာ နားလည်မှု၊ ပူးပေါင်းဆက်ဆံမှုနှင့် စုပေါင်းစောင့်ရှောက်မှု (Collective Care) အပေါ် တန်ဖိုးထားဆောင်ရွက်ခဲ့ကြပါတယ်။
အစီအစဉ်တွင် Akshata Parekh (FAHI)၊ AoC Cohort 4 နှင့် Alumni Facilitators၊ Ma Su Htwe တို့မှ ဦးဆောင်ကျင်းပသည့် အလုပ်ရုံဆွေးနွေးပွဲများနှင့် ဆွေးနွေးပွဲများအပြင် FAHI၊ FIN Myanmar၊ Doh Eain၊ Young City Shapers၊ Kalasa Art Space၊ Heal With Art by Ma Su Htwe၊ British Council Myanmar နှင့် Institut Français de Birmanie (IFB) တို့ကလည်း မိတ်ဖက်အဖွဲ့အစည်းအနေနဲ့ ပူးပေါင်းဆောင်ရွက်ပေးခဲ့ကြပါတယ်။

Goethe-Institut မြန်မာ မှ Academy of Care (AoC) Cohort 4 သင်တန်းအစီအစဉ် ကို အောင်မြင်စွာ ပြီးမြောက်ခဲ့ပါတယ်။ ဤသင်တန်းတွင် မြန်မာနိုင်ငံအနှံ့မှ နယ်ပယ်အမျိုးမျိုးမှ ပညာရှင်များ ပူးပေါင်းပါဝင်ပြီး ဖန်တီးမှုအခြေပြုနှင့် လူမှုအခြေပြုပျိုးထောင်ရေးဆိုင်ရာ စိတ်ကျန်းမာရေး လှုပ်ရှားမှုများ ကို တိုးတက်အောင် ဆောင်ရွက်နိုင်ရေး ရည်ရွယ်ထားပါတယ်။
၂.၅ လကြာအတွင်း, သင်တန်းသားများသည် Creative Arts နှင့် Trauma-Informed Practices များကို လေ့လာသင်ကြားခဲ့ပြီး World Mental Health Day 2025 အခမ်းအနားနှင့် အသိုင်းအဝိုင်းဆိုင်ရာ Creative Care Public Workshops များတွင်လည်း လက်တွေ့ကျကျ ဦးဆောင်ဆောင်ရွက်ခဲ့ကြပါတယ်။ ယခုအခါတွင် သင်တန်းသားများသည် Seed Funding Project Phase သို့ ဝင်ရောက်လာပြီး သင်ယူခဲ့သည့် ဗဟုသုတနဲ့ အတတ်ပညာရပ်များကို လူမှုအသိုင်းအဝိုင်းအတွက် ဖန်တီးမှုအခြေပြုစောင့်ရှောက်မှု (Creative Care)၊ စာနာနားလည်မှု (Empathy) နှင့် ခံနိုင်စွမ်း (Resilience) တို့ တိုးတက်စေဖို့ ဆက်လက်ပံ့ပိုးမြှင့်တင်သွားမှာဖြစ်ပါတယ်။
Academy of Care (AoC) သည် Goethe-Institut မြန်မာ ၏ အဓိကအစီအစဉ်များထဲမှတစ်ခုဖြစ်ပြီး Creative Arts Therapies, Trauma-Informed Care နှင့် Community-Based MHPSS (Mental Health and Psychosocial Support) ကို တိုးတက်အောင်မြင်စေရန် ရည်ရွယ်ထားပါတယ်။ဤပရောဂျက်သည် စွမ်းအင်တိုးမြှင့်ရေး (Capacity Building)၊ ယဉ်ကျေးမှုဖလှယ်မှု (Intercultural Exchange) နှင့် ပူးပေါင်းဆောင်ရွက်မှု (Collaboration) ကို အခြေခံကာ မြန်မာနိုင်ငံအနှံ့ရှိ အသိုင်းအဝိုင်းများအတွက် ပူးပေါင်းပါဝင်မှုရှိသော စောင့်ရှောက်မှုစနစ်များ (Inclusive Care Practices) ကို တိုးတက်အောင် ဖော်ဆောင်နေပါတယ်။

Goethe-Institut မြန်မာတွင် ဂျာမန်စကားကိုစနစ်တကျစတင်သင်ယူပါ။ ကျွန်ုပ်တို့၏ဂျာမန်ဘာသာစကားသင်တန်းများကို  ဥရောပဘာသာစကားဆိုင်ရာစံချိန်စံနှုန်းမူဘောင် (GER) နှင့်အညီ အဆင့် (၆)ဆင့်အပေါ်တွင်အခြေခံထားပါသည်။ ထို့ကြောင့် ကျွန်ုပ်တို့၏သင်တန်းများသည် နိုင်ငံတကာစံချိန်စံနှုန်းနှင့်တိုင်းတာနှိုင်းယှဥ်နိုင်ပါသည်။ Goethe-Institut မြန်မာက နိုဝင်ဘာလ အတွက် (Online , In-person, Hybrid) ဂျာမန်ဘာသာစကားသင်တန်းများဖွင့်လှစ်လျက်ရှိပါသည်။သင်တန်းများကို အချိန်မရွေး နေရာမရွေး အွန်လိုင်းမှ စာရင်းသွင်းခြင်း ပြုလုပ်နိုင်ပါပြီ။ စုံစမ်းမေးမြန်းလိုသည်များရှိပါက info.language.mmr@goethe.de မှတဆင့် အီးမေးလ်ပေးပို့ဆက်သွယ်နိုင်ပါသည်။

သင့်ရဲ့ဂျာမန်ဘာသာစကားအရည်အသွေးကိုသက်သေပြရန် ကမ္ဘာတဝှမ်းကအသိအမှတ်ပြုသောအောင်လက်မှတ်တစ်ခုလိုအပ်နေပါသလား။?

Goethe-Institut ၏ဘာသာစကားအောင်လက်မှတ်သည် ဂျာမန်ဘာသာစကားစွမ်းရည်ကိုမှတ်ကျောက်တင်ရန် ကမ္ဘာတဝှမ်းကအသိမှတ်ပြုသည့်အောင်လက်မှတ်ဖြစ်ပါသည်။ Goethe-Institut မြန်မာက နိုဝင်ဘာလ အတွက် Goethe-Zertifikat စာမေးပွဲများကို ကျင်းပမည်ဖြစ်ပါသည်။ စာမေးပွဲများကို အချိန်မရွေး၊ နေရာမရွေး အွန်လိုင်းမှ စာရင်းသွင်းခြင်း ပြုလုပ်နိုင်ပါပြီ။  စုံစမ်းမေးမြန်းလိုသည်များရှိပါက info.exam.mmr@goethe.de မှတဆင့် အီးမေးလ်ပေးပို့ဆက်သွယ်နိုင်ပါသည်။ 

စာကြည့်တိုက်မှာ ပုံမှန်ကျင်းပလေ့ရှိတဲ့ Boardgame Day လေးကို နို၀င်ဘာလမှာတော့ အသစ်အဆန်းအနေဖြင့် သဘာ၀ပတ်၀န်းကျင်ဆိုင်ရာဂိမ်းလေးကို ‌ရွေးချယ်ပေးထားပါတယ်။

ဒီဂိမ်းလေးမှာတော့ အမှိုက်အမျိုးအစားတွေ ဘယ်လိုခွဲခြားစွန့်ပစ်ရမလဲ၊ ပစ္စည်း‌ဟောင်းလေးတွေကို ဘယ်လိုပြန်လည်အသုံးပြုနိုင်မလဲနှင့် ကာဗွန်ထုတ်လုပ်မှုလျော့ချဖို့ ဘယ်လိုနည်းလမ်းတွေနဲ့ စွမ်းအင်တွေကိုသုံးကြမလဲဆိုတာကို ချစ်စရာမြေပုံလေးအတိုင်း အံစာတုံးခေါက်ရင်း တူတူခန့်မှန်းဖြေဆိုရမှာဖြစ်ပါတယ်။ ဒီ Boardgame လေးမှာ ဂိမ်းကစားသူတွေ  သဘာဝပတ်ဝန်းကျင်ထိန်းသိမ်းရေးနဲ့ပတ်သက်တဲ့ အသိပညာတွေကို ပျော်ရွှင်စွာလေ့လာနိုင်အောင် စိတ်၀င်စားဖွယ် ဒီဇိုင်းဆွဲပေးထားတာဖြစ်ပါတယ်။
 
ဒီဂိမ်းလေးက ဂျာမန်ဘာသာစကား A2 Level နှင့်အထက် ကျောင်းသူကျောင်းသားများအတွက် အထူးသင့်တော်ပါတယ်။   ဒါကြောင့် သဘာ၀ပတ်၀န်းကျင်ထိန်းသိမ်းရေးနှင့်သက်ဆိုင်တဲ့ ဂျာမန်‌‌‌ဝေါဟာရအသစ်တွေကို လေ့လာချင်တယ်ဆိုရင် biblio-yangon@goethe.de သို့ အမည်၊  ဖုန်းနံပါတ်၊ မိမိရဲ့ ဂျာမန် level ကိုအီးမေးလ်ပေးပို့ပြီး ခုပဲ စာရင်းပေးလိုက်တော့နော်။

လူငယ်တွေရဲ့ အတွေးအမြင်တွေကို ဖလှယ်ရင်း ဗဟုသုတအသစ်တွေကို ရရှိစေမယ့် ကျွန်ုပ်တို့စာကြည့်တိုက်၏ Youth Dialogue Lab မှ ပြန်လည်ကြိုဆိုပါတယ်။ ဒီတစ်ခေါက်မှာတော့ SDG 4 and SDG 10 ကိုအခြေခံပြီး မတူညီကွဲပြားမှုများအကြား အတားအဆီးသတ်မှတ်ချက်များကို အတူတကွကျော်လွှားကြပြီး စာနာစိတ်နှင့် တာ၀န်ယူစိတ်၊ တာ၀န်ခံတတ်စိတ်‌မျှ‌‌ဝေနိုင်စေဖို့ တွေးခေါ်ချိတ်ဆက် လူငယ်စကားဝိုင်း ဆိုတဲ့ခေါင်းစဥ်ဖြင့် လူငယ်စကား၀ိုင်းကိုဆောင်ရွက်မှာဖြစ်ပါတယ်။ ကမ္ဘာအနှံ့မှ မတူညီကွဲပြားပြီး အရောင်အသွေးစုံလင်တဲ့ လူမှုအသိုင်းအ၀ိုင်းတွေနဲ့ ကောင်းမွန်စွာ
ပြောဆိုဆက်သွယ်နိုင်စေဖို့ လူငယ်တွေမှာ global mindsets ရှိဖို့ အထူးလိုအပ်ပါတယ်။ ဒါမှသာ နိုင်ငံတကာယဥ်ကျေးမှုတွေကို အချင်းချင်း အပြန်အလှန်သိနားလည်မှာဖြစ်သလို ပိုမိုကောင်းမွန်သော ပတ်၀န်းကျင်ကိုဖော်ဆောင်နိုင်မှာ  ဖြစ်ပါတယ်။ စိတ်တူကိုယ်တူ လူငယ်တွေအချင်းချင်း ပိုမိုချိတ်ဆက်မိပြီး SDG goals များကိုလည်း တစ်ဖက်တစ်လမ်းမှ ဖြည့်စွမ်း‌ပေးနိုင်မှာပါ။ ဒါကြောင့် ခေတ်နောက်ကျ မကျန်ခဲ့ရအောင် Global Citizen တစ်ယောက်အဖြစ် သင့်ကိုယ်သင် ပြောင်းလဲဖို့ ခုပဲ Youth Dialogue Lab ကို ပါ၀င်လိုက်ပါ။

၀င်ကြေး အခမဲ့ဖြစ်ပါတယ်။ လူဦးရေကန့်သတ်ထားတာမို့စာရင်းပေးသွင်းချင်တယ်ဆိုရင်တော့♦အမည်  ♦ အသက် ♦ဖုန်းနံပါတ်တို့ကို  biblio-yangon@goethe.de  မှတစ်ဆင့်အီးမေးလ်ပေးပို့ပြီးစာရင်းပေးသွင်းနိုင်ပါပြီ။   

ဂျာမန်ဘာသာစကား သင်ယူနေတဲ့သူတွေ စာဖတ်စွမ်းရည် တိုးတက်လာစေရန်နှင့် စကားလုံးဝေါဟာရများ ပိုကြွယ်၀လာစေရန် လစဥ်ကျင်းပပြုလုပ်တဲ့ “Reading Club/Leseclub’’ လေး ရောက်ရှိလို့လာပါပြီ။

ဒီလရဲ့ အစီအစဥ်လေးက B1 Level အတွက်ဖြစ်ပြီး ဆရာမနဲ့အတူတူ(၂) ချိန်စလုံး စာအုပ်တစ်အုပ်တည်းကို ဖတ်ကြမှာဖြစ်ပါတယ်။ ဒါကြောင့် (၂)ရက်စလုံး ပါ၀င်ပေးနိုင်မှသာ ထိရောက်တဲ့ စာဖတ်ခြင်း အလေ့အထကောင်းကို ပိုင်ဆိုင်နိုင်မှာဖြစ်ပါတယ်။ ဒါဆို ၀ါသနာတူသူငယ်ချင်းတွေနဲ့စာတူတူဖတ်ကြရင်း အတွေးအမြင်လေးတွေ ဝေမျှဖို့ ဖိတ်ခေါ်ပါရစေနော်။

စိတ်၀င်စားလို့ ပါ၀င်ချင်တယ်ဆိုရင်တော့ biblio-yangon@goethe.de သို့အမည်၊ ဖုန်းနံပါတ်၊ မိမိရဲ့ ဂျာမန် levelကို အီးမေးလ်ပေးပို့ပြီး စာရင်းပေးသွင်းနိုင်ပါတယ်။

Tamara Bach, Zoran Drvenkar, Lena Hach, Nils Mohl, Karl Schlögel und Michael Stavarič တို့ရဲ့ လက်ရာများအပါအ၀င် အခြားသောမီဒီယာအသစ်များ ကျွန်ုပ်တို့ရဲ့ ဂျာမန်အွန်လိုင်းစာကြည့်တိုက် “ONLEIHE” တွင် ရောက်ရှိနေပြီ ဖြစ်ကြောင်း သတင်းကောင်းလေး ပေးချင်ပါတယ်။ အခုပဲ ကျွန်ုပ်တို့ရဲ့ “ONLEIHE” မှာ အခမဲ့ငှားရမ်းဖတ်ရှုလိုက်ပါ။