Գերմանիա՝ գյուտարարների երկիր - «Հետազոտություններ» մոդուլ

ԽԱՂ՝ ԳՅՈՒՏԱՐԱՐԻ ՈԳԻՆ

Ճի՞շտ է, թե՞ սխալ։ Նույնիսկ այնպիսի մեծ գյուտարարները, ինչպիսիք են Կարլ Բենցը, Վիլհելմ Ռենտգենը և շատ ուրիշներ, ստիպված են իրենց կյանքում փոքր ու մեծ որոշումներ կայացնել։ Խաղա նրանց հետ միասին և գտիր ճիշտ որոշումները։

ԽԱՂ՝ ԳԱՂԱՓԱՐՆԵՐԻ ԳԵՆԵՐԱՏՈՐ

Ո՞վ ավելի շատ գաղափարներ կհավաքի։ Ո՞վ ամենաարագը կհասնի նպատակին։ Ամեն անգամ շիկացման լամպի վրա սեղմելիս դու մեկ գաղափար կստանաս։ Որքան շատ գաղափարներ գեներացնես, այնքան ավելի արագ կհավաքվի գյուտերի ու գյուտարարների քո հավաքածուն։


    Գյուտեր

      ՊԱՏՐԱՍՏՎԱԾ Է ԳԵՐՄԱՆԻԱՅՈՒՄ

      Գերմանիան վաղուց ի վեր եղել է գյուտարարների և կոնստրուկտորների երկիր։ Ծանոթացիր գերմանական քաղաքներում արված 14 գյուտերին՝ Համբուրգից մինչև Մյունխեն։

      Համբուրգ, 1969

      Գրեթե բոլորն իրենց մոտ ունեն այն՝ մեկ կամ մի քանի չիպային քարտ։ Համբուրգցի ռադիոտեխնիկ Յուրգեն Դեթլոֆը առաջին մարդն է, ում մտքով անցել է, որ քարտերի վրա կարելի է տեղեկատվություն պահել։ 1969-ին նա գրանցում է ինտեգրված միկրոսխեմայով պլաստիկ քարտի արտոնագիրը։
      Իմացիր ավելին

      © pixabay.com
      Hamburg
      Չիպային քարտ

      Ռոստոկ (Դեսաու), 1939

      Heinkel He 178-ը աշխարհում առաջին տուրբոռեակտիվ շարժիչով ինքնաթիռն է, որը շատ ավելի արագ է, քան պրոպելլերային ինքնաթիռները։ Դրա շարժիչը՝ այսպես կոչված, ռեակտիվ տուրբինը, մշակել է ֆիզիկոս Հանս Յոախիմ Փաբստ ֆոն Օհայնը։ Այսօր ռեակտիվ ինքնաթիռները տարեկան 5 միլիարդ ուղևոր են տեղափոխում։

      © „Ohain USAF He 178 page61“
      Rostock
      Ռեակտիվ շարժիչ

      Բեռլին, 1935

      1935 թ.-ին երիտասարդ ինժեներ Կոնրադ Ցուզեն Բեռլինում գտնվող իր ծնողների բնակարանում հավաքում է առաջին ծրագրավորվող համակարգիչը։ Միայն երրորդ փորձից է նրան հաջողվում աշխատող սարք ստեղծել, որը նա կոչում է Z3։ Պատի պահարանի չափսի այս մեքենան դառնում է աշխարհում առաջին համակարգիչը։
      Իմացիր ավելին

      © CC BY-SA 3.0
      Berlin
      Համակարգիչ

      Լայպցիգ, 1650

      1605 թվականին այն ժամանակվա գերմանական Ստրասբուրգ քաղաքում լույս է տեսնում առաջին շաբաթաթերթը՝ «Relation»-ը։ Որոշ ժամանակ անց թերթեր սկսում են լույս տեսնել ամենուր։ Եվրոպայում այդ ժամանակ ընթանում էր Երեսնամյա պատերազմը, և բոլորն ուզում էին ավելի շուտ իմանալ, թե ինչ իրավիճակ է ռազմաճակատում։ 1650 թվականի հուլիսի 1-ին լայպցիգցի հրատարակիչ Թիմոթեուս Ռիչը թագավորից թույլտվություն է ստանում հրատարակելու մի թերթ, որը պետք է լույս տեսներ շաբաթը վեց անգամ։ Հենց սա էլ համարվում է աշխարհում առաջին օրաթերթը։

      © Stiftung Saarländischer Kulturbesitz / Sammlung Deutsches Zeitungsmuseum
      Leipzig
      Առաջին օրաթերթը

      ՎՈՒՊԵՐԹԱԼ-ԷԼԲԵՐՖԵԼԴ, 1897

      1897 թ․-ի օգոստոսի 10-ին քիմիկոս Ֆելիքս Հոֆմանը Բայեր ընկերության լաբորատորիայում առաջին անգամ ստանում է մաքուր ացետիլսալիցիլաթթու (ASS)։ Նոր դեղամիջոցը Ասպիրին անվան տակ դառնում է աշխարհում ամենահայտնի դեղորայքը։ Ամեն տարի արտադրվում է ավելի քան 50 000 տոննա ասպիրին։ Եթե այս հաբերից շղթա պատրաստենք, ապա դրա երկարությունը հավասար կլինի Երկրից մինչև Լուսին և դեպի հետ հեռավորությանը։
      Իմացիր ավելին

      © picture alliance/akg
      Wuppertal
      Ասպիրին

      Բոնն – Բադ Գոդեսբերգ, 1915

      1915-ին «Ագներ» սրճարանը (գերմ.՝ Agner) հատկապես սիրված է ուսանողների շրջանում։ Որպես աղանդեր այնտեղ սերուցքով բալ է մատուցվում։ Հանկարծ շվաբացի հրուշակագործ Յոզեֆ Քելերի մոտ մի փայլուն միտք է ծագում։ «Քաղցր Յոզեֆը» (այսպես էին նրան կոչում) պարզ աղանդերը վերածում է անկրկնելի տորթի։ Դրա համար նա օգտագործում է տորթի խմոր, շոկոլադե տաշեղներ և շվարցվալդյան բալի լիկյոր։ «Շվարցվալդյան բալի տորթ» անվան տակ նրա գլուխգործոցը հայտնի է դառնում ամբողջ աշխարհում։

      © pixabay.com
      Bonn
      Շվարցվալդյան բալի տորթ

      Գյոթինգեն, 1999

      1999 թվականին Շտեֆան Հելլը Գյոթինգենում ստեղծում է STED մանրադիտակը։ Նոր տեխնոլոգիան հնարավորություն է տալիս դիտելու կենդանի կառուցվածքները նանո մասնիկների մակարդակում։ 2014 թվականին նա իր գյուտի համար ստանում է Նոբելյան մրցանակ։
      Իմացիր ավելին

      Ֆիլմ՝: Շտեֆան Հելլ, STED մանրադիտակ
      Göttingen
      STED մանրադիտակ

      Մանհայմ, 1886

      Առաջին «ժամանակակից» ավտոմեքենան ունի երեք անիվ։ 1886 թվականի հունվարի 29-ին Կարլ Բենցը գրանցում է ներքին այրման շարժիչով համալրված իր ավտոմեքենան։ Առաջին երկարատև ուղևորությունը կատարում է նրա կինը՝ Բերտան։ 1888-ի օգոստոսի սկզբին նա իր երկու որդիների հետ միասին անցնում է 100 կիլոմետրից ավել ճանապարհը՝ Մանհայմից մինչև Պֆորցհայմ և հետ։ Բենզին նա գնում է ճանապարհին՝ դեղատնից։
      Իմացիր ավելին

      © Mercedes-Benz Classic
      Mannheim
      Ավտոմեքենա

      Մայնց, մոտ 1450 թ․

      Յոհաննես Գենսֆլայշը, ով նաև հայտնի է որպես Գութենբերգ անվամբ, համարվում է ժամանակակից գրատպության մեթոդի և տպագրական մամլիչի գյուտարարը։ 1450 թվականից հետո նրա գյուտը իրական հեղափոխություն է առաջացնում Եվրոպայում, քանի որ նոր մեթոդը հնարավորություն է ստեղծում գրքերի զանգվածային տպագրության համար։ Գրատպությունը երկրորդ հազարամյակի կարևորագույն գյուտերից մեկն է և հանգեցնում է սոցիալական, տնտեսական և քաղաքական կյանքի էական փոփոխությունների։

      © Wikipedia
      Mainz
      Գրատպություն

      Վալդախթալ-Թումլինգեն, 1958

      Ավելի քան 1100 արտոնագիր ստացած, մասնագիտությամբ փականագործ և ձեռնարկատեր Արթուր Ֆիշերը Գերմանիայի ամենահաջողակ գյուտարարն է։ Նրա ամենահայտնի գյուտը պլաստմասե դյուբելն է։ Այն օգտագործման մեջ ավելի արագ, պարզ և հուսալի է, քան իր նախորդները, ուստի այն լայնորեն օգտագործվում է ամբողջ աշխարհում։

      © picture-alliance/ dpa
      Waldachtal
      Պլաստմասե դյուբել

      Հերցոգենաուրախ, 1925

      Ադի Դասլերի մոտ մի գաղափար է հղանում։ Նա ցանկանում է ստեղծել կատարյալ մարզակոշիկներ։ Դեռևս 1928-ին Ամստերդամում կայացած Օլիմպիական խաղերի մասնակիցները կրում են նրա արտադրամասում ստեղծված հատուկ կոշիկները։ 1936 թ.-ին Բեռլինում թեթևաթլետ Յեսսե Օվենսը Դասլերի կոշիկներով նվաճում է չորս ոսկե մեդալ։ Բայց ամենամեծ հաջողությունը գալիս է 1954 թվականի աշխարհի գավաթի լեգենդար եզրափակչից հետո։ Գերմանիան եզրափակչում պարտության է մատնում անպարտելի համարվող Հունգարիայի հավաքականին, իսկ Դասլերի ստեղծած փոխարինվող ելուստներով կոշիկները ամբողջ աշխարհում հայտնի են դառնում ADIDAS ապրանքանիշի ներքո։

      © adidas Group
      Herzogenaurach
      Ֆուտբոլային կոշիկներ

      Վյուրցբուրգ, 1895

      Իր ժամանակի շատ ֆիզիկոսների պես՝ Վյուրցբուրգի համալսարանի ռեկտոր Վիլհելմ Կոնրադ Ռենտգենը նույնպես փորձարկումներ է կատարում իր լաբորատորիայում այսպես կոչված կատոդային ճառագայթներով։ 1895 թվականի նոյեմբերի 8-ին նա հայտնագործում է ճառագայթման նոր տիպ։ Այս հայտնագործությունը հսկայական նշանակություն է ունենում բժշկության համար։ Առաջին անգամ հնարավոր է դառնում տեսնել մարդու մարմնի ներսը՝ առանց այն վնասելու։
      Իմացիր ավելին

      © pixabay.com
      Würzburg
      Ռենտգենյան ճառագայթներ

      Աուգսբուրգ, 1897

      1893 թ․-ին Ռուդոլֆ Դիզելը արտոնագիր է ստանում նոր տեսակի շարժիչի համար, որի նախագիծը նա կարողանում է իրագործել միայն 1897 թ-ին, Աուգսբուրգի մեքենաշինական ընկերության (հետագայում հայտնի որպես MAN) ինժեներների հետ միասին։ Այսօր դիզելային շարժիչները ամբողջ աշխարհում համարվում են որպես հուսալի և դիմացկուն շարժիչներ նավերի, ավտոբուսների և բեռնատար մեքենաների համար։

      © pixabay.com
      Augsburg
      Դիզելային շարժիչ

      Մյունխեն, 1810

      Թերևս ամենահայտնի մյունխենյան «գյուտը» Օկտոբերֆեստն է։ 1810 թ․ թագաժառանգ արքայազն Լուդվիգի հարսանիքի կապակցությամբ կազմակերպված տոնակատարությունը, որի ժամանակ տեղի են ունենում ձիավազքի մրցումներ, ժամանակի ընթացքում դառնում է ամենասիրված տոներից մեկը, որին մասնակցում է տարեկան 6 միլիոն մարդ։

      Այնուամենայնիվ, գիտության բնագավառում Մյունխենն առաջարկելու շատ բան ունի՝ 15 համալսարան և ակադեմիա, Մաքս Պլանկի 11 ինստիտուտ, Ֆրաունհոֆերի 3 ինստիտուտ, Լայբնիցի 4 ինստիտուտ և Նոյհերբերգում գտնվող Հելմհոլտցի կենտրոնը։ Այս բոլոր հաստատություններում իդեալական պայմաններ են ստեղծված կրթական և հետազոտական նպատակների իրականացման համար։

      © picture alliance/Ruth Botzenhardt
      München
      Օկտոբերֆեստ

      ՈՒՍՈՒՄ ԵՎ ՀԵՏԱԶՈՏՈՒԹՅՈՒՆ

      Գերմանիան աշխարհի առաջատար գիտական կենտրոններից մեկն է, որտեղ ուսանելու և հետազոտությամբ զբաղվելու բազմաթիվ հնարավորություններ կան։

      ՑՈՒՑԱՀԱՆԴԵՍ

      Ֆրաունհոֆերի ընկերակցության և Մաքս Պլանկի ընկերակցության հետ համագործակցությամբ՝ Գյոթե-Ինստիտուտը առանձին ցուցահանդես է նվիրում գերմանական գյուտերին և գերմանացի գյուտարարներին։ Այս բաժնում դուք կարող եք գտնել ուսումնական նյութեր, շրջագայության ժամանակացույցը և այլ օգտակար տեղեկություններ։

      ՄԵԴԻԱԴԱՐԱՆ

      Ուզում ես ավելի՞ն իմանալ Գերմանիայում հետազոտությամբ զբաղվելու հնարավորությունների մասին։ Այստեղ դու կգտնես այս թեմայի վերաբերյալ ֆիլմեր ու այլ նյութեր։