Kaupapa “Schulen: Partner der Zukunft (PASCH)”

Ko “Ngā Kura: Hei Hoa Mahitahi Āpōpō" (PASCH) he kaupapa i whakamānuhia i te Pēpuere 2008 e te Tari Tāwāhi o Tiamana. Ka hanga haere ka whakapakari hoki te PASCH i te kōtuinga o te ao mō neke atu i te 1,800 ngā kura PASCH e whai pānga ana ki Tiamana. E tautoko ana te rōpū Goethe-Institut i ngā kura PASCH e 550 kei ngā whakahaere mātauranga ki ngā whenua 100 neke atu.

He mea whakahaere te PASCH e te Tari Matua Tāwāhi ka whakatinanahia hoki e te Manatū mō Ngā Kura Tāwāhi (ZfA), rātou ko te rōpū Goethe-Institut, ko te Ratonga Tauwhitiwhiti Mātauranga Wānanga o Tiamana me te Ratonga Tauwhitiwhiti Mātauranga o te Komiti Tū o ngā Minita Mātauranga me Ngā Take Ahurea o te Länder ki roto o Tiamana.

Kei te whakapakarihia te kōtuinga o ngā kura Tiamana kei tāwāhi me ngā kura e tuku nei i ngā Tiwhikete Reo Tiamana. Ka mutu, kei te kaha haere te mahi tahi ki ngā kura e tau ai te reo Tiamana hei reo tāwāhi ki ngā whakahaere mātauranga ā-motu ki whenua kē. Tāpiri ki tēnei, he tuku wāhi hoki mō ngā karahipi whai akoranga ki Tiamana, he tuku wāhi hoki mō te tauwhitiwhiti ā-kura me ngā hōtaka mahi takirua.

Ngā Whāinga o te PASCH

He mea mahi te kaupapa nei hei whakaara i te rangatahi kia huri mai te aro ki Tiamana o ēnei rā, ki te ahurea Tiamana me te reo Tiamana hoki. Kei te hanga haerehia he kōtuinga kura hoahoa mō Tiamana; ka noho mai ngā kura hei hapori ākonga o te ao mā te mahi tahi me te whakawhitiwhiti mahi. 

E whakahaere ana te PASCH i ngā akoranga whakangungu mō ngā ākonga me ngā kaiako hei whakawhiwhi tohu mō rātou, ka pakari ake ai ngā pūkenga o te rangatahi ki te whai akoranga ki Tiamana, hei tohu hoki mō te wā e whai mahi pūkenga ai rātou. I tua atu e whai ana tēnei kia tuia ngā here ki Tiamana ki te akiaki hoki i ngā kura, ngā kaiako me ngā ākonga ki te whakawhitiwhiti kōrero, ki te mahi tahi hoki. Ka mutu, e tūhono ana hoki te PASCH ki ētahi atu kaupapa ture ahurea, mātauranga tāwāhi hoki pēnei i te ratonga tūao “Kulturweit”.

Te tūranga me ngā mahi a te rōpū Goethe-Institut

Ka āwhina te rōpū Goethe-Institut i ngā kura maha atu i te 550 kia uru mai te akoako reo Tiamana ki roto i ā rātou marautanga. E tuku ana ki ngā kaiako he whakangungutanga whakaako reo, ā, e tuku ana hoki ki ngā kura he rauemi pāpāho hou mō te whakaako, te akoako me te ahurea ā-iwi. I runga hoki i te āhua o tēnei kaupapa, kua tuku atu hoki te rōpū Goethe-Institut i ētahi kaiako tino mātau ki te tautoko i ngā kura hoahoa huri noa te ao. Ka whakahaeretia ngā hōtaka rangatahi ki Tiamana tonu mō ngā ākonga mai i ngā kura hoahoa, e pakari ake ai ō rātou pūkenga reo, ō rātou mātauranga ā-iwi hoki, e kite kanohi ai hoki ki Tiamana me tōna ahurea.

Kei te ipurangi www.pasch-net.de e toru ōna wehenga:

• Wehenga whānui
• Wehenga kaiako
• Wehenga ākonga

Te wehenga whānui

Kei te wehenga whānui he kōrero mō ngā rōpū whai pānga me ā rātou mahi. Kei roto nei ko ngā kaupapa mahi o roto i te anga o te kaupapa PASCH, ngā pakituhi a ngā kaimahi kei te ao e mahi ana, ngā akoranga rangatahi PASCH kei Tiamana, ā, he wāhi huihui e rapu hoa kura tāwāhi ai ngā kura. He mapi hangarau o te ao hei titiro whānui ki ngā kōtuinga hoa kura, ka whakaatuna hoki e ngā kura e whai pānga ana he kōrero mō rātou anō.

Te wehenga kaiako

Kei tēnei wehenga, he whakaaro āwhina i te kaiako ki te whakamahi i te PASCH-net ki roto i ā rātou whakaakoranga reo Tiamana, ki te tango ake hoki i ngā rauemi whakaako, he kōrero hoki mō te huarahi whakaako. Kei te papa akoranga o PASCH nei e āhei ai te kaiako ki te whakarite i ō rātou ake akomanga ā-ipurangi ka whakamahi noa rānei i ngā akoranga kei reira.

Kei roto i te hapori, e whakawhitiwhiti rauemi ai ngā kaiako ka rapu hoa mahi rānei mō ō rātou whakaarotanga kaupapa mahi. Nā te hapori, te papa akoranga me ngā pakituhi, e whakatinana kaupapa tūao ai ngā kaiako pēnei i te nūpepa kura ā-rohe ā-ipurangi ko ngā whakaputanga pāho ipurangi rānei.

Kei te papa akoranga o PASCH, e tukuna ana mā te PASCH-net he akoranga whakangungu ā-ipurangi anō mō ngā kaiako. Kei te akoranga ā-ipurangi o PASCH-net-Führerschein, ako ai ngā kaiako i ngā hua o te whārangi ipurangi nei mō te whakaako reo Tiamana, pēnei i ngā hapori, te papa akoranga me te nūpepa kura o PASCH-Global. Kei te akoranga ā-ipurangi o Moodle-Führerschein ka ako rātou pēhea ai te whakamahi i te papa akoranga o PASCH i hangā rā ki te hōtaka rorohiko Moodle, mō te akoranga kura mō te akoranga whakangungu kaiako rānei.

Totoro mai ki: lernplattform@pasch-net.de

Te wehenga ākonga

Ka whakawhitiwhiti kōrero, whakaaro hoki ngā ākonga reo Tiamana kei ngā kura PASCH ki ētahi atu ākonga kei te hapori. Ka taea hoki te tuku ake o ngā tuhinga, whakaahua me ngā pikitia whakaata, te whakatū rōpū me te uru ki ngā rōpū kōrero.

Ko ngā whakataetae me ngā kaupapa mahi hoki e aro mai ai te ākonga. Ko ngā tuhinga taumata rerekē ka kōrero mō Tiamana, tae atu ki ngā ara mahi ākonga ki reira.

He kaupapa kōrero, he mahinga he kēmu reo mō te ākonga reo Tiamana. 

Ko te hunga pīrangi uru mai ki ngā hapori ki te papa akoranga rānei o PASCH-net me rēhita rawa tuatahi ka urutomo mai mā te wāhi īmēra me te kuputomo. Totoro mai ki: service@pasch-net.de