ကျေးလက် သို့မဟုတ် မြို့ငယ်များတွင် အပန်းဖြေစရာ များများစားစား မရှိပါ။ သို့သော် နေထိုင်မှုဘဝမှာ ပို၍ငြိမ်းချမ်းသည်။ သဘာဝရှုခင်း ပိုများပြီ၊ နေရာ ကျယ်ကျယ်လွင့်လွင့် ရှိပါသည်။ ဆူညံသံလည်းမရှိဘဲ သန့်ရှင်း ပါသည်။ တိုက်ခန်းများ နှင့် အိမ်များတွင် အများအားဖြင့် ဥယျာဉ်တစ်ခု ပါရှိတတ်သည်။ နေထိုင်မှုစရိတ် လည်း သက်သာပါသည်။

သင်နေထိုင်ရာမြို့/ ဒေသ၏ ဝက်ဘ်ဆိုဒ်တွင် အပန်းဖြေကြည့်ရှုဖွယ်ရာများ အကြောင်း ရှာဖွေဖတ်ရှု နိုင်ပါသည်။

ယဉ်ကျေးမှုလက်ရာများ ကြည့်ရှုရသည်ကို နှစ်သက်ပါသလား။ မြို့ကြီးအများစုတွင် ပြတိုက်များ၊ ပြပွဲများ၊ ရုပ်ရှင်ရုံများ၊ ပြဇာတ်များ၊ ဖျော်ဖြေပွဲများ နှင့် အခြားပွဲလမ်းများရှိသည်။ ရုပ်ရှင်ရုံများစွာသည် နိုင်ငံတကာရုပ်ရှင်များကို မူရင်းဘာသာ ဗားရှင်း (OV) ဖြင့် စာတန်းထိုး၍ ပြသလေ့ရှိသည်။ မြို့ကြီးများ နှင့် မြို့အများစုတွင် ပွဲအစီအစဥ်များအတွက် အင်တာနက်ပြက္ခဒိန် ရှိသည်။ မည်သည့်ပွဲအစီအစဥ်များ ရှိသည်ကို အွန်လိုင်းတွင် ကြည့်နိုင်သည်။

စာကြည့်တိုက်များ သို့မဟုတ် အများပြည်သူများအတွက် ဖွင့်လှစ်ထားသော စာအုပ်ဆိုင်များတွင် စာဖတ်ခြင်း၊ သီချင်းနားထောင်ခြင်း နှင့် ရုပ်ရှင်ကြည့်ခြင်းများကို အခမဲ့ သို့မဟုတ် ငှားရမ်းခအနည်းငယ်ဖြင့် ကြည့်ရှုနိုင်သည်။ နေထိုင်ရာမြို့မှ စာကြည့်တိုက်တွင် စာရင်းသွင်းရန် လိုအပ်ပါသည်။ နေထိုင်ကြောင်းမှတ်ပုံတင်စာရွက် ကို ပြသရလေ့ရှိသည်။ စာအုပ်များ၊ ရုပ်ရှင်ကားများ နှင့် စီဒီများကိုလည်း ငှားရမ်းနိုင်သည်။ အိမ်သို့ ယူသွားနိုင်ပြီး ပြန်ပို့ပေးရပါမည်။

အပြင်ထွက်လည်ရသည်ကို နှစ်သက်ပါသလား။ သဘာဝပတ်ဝန်းကျင် မှာ အပန်းဖြေရန် နေရာကောင်းတစ်ခု ဖြစ်သည်။ မြို့တိုင်းတွင် ပန်းခြံများရှိသည်။ လမ်းလျှောက်ခြင်း၊ ဆော့ကစားခြင်း သို့မဟုတ် ပျော်ပွဲစားထွက်ခြင်းများ ပြုလုပ်နိုင်သည်။ နွေရာသီတွင် ပန်းခြံများ၌ လူရှုပ်လေ့ရှိသည်။ အားကစားလုပ်သူများလည်း ရှိသည်။ ဥပမာအားဖြင့် သင်သည် အနှေးပြေးခြင်း၊ ဘောလုံးကစားခြင်း သို့မဟုတ် စားပွဲတင်တင်းနစ်ကစားခြင်း သို့မဟုတ် ကိုယ်လက်ကြံ့ခိုင်ရေး လေ့ကျင့်ခန်း လုပ်နိုင်သည်။ ပန်းခြံအားလုံးနီးပါးမှာ ဝင်ခွင့် အခမဲ့ ဖြစ်သည်။

ကလေးများအတွက် ကစားကွင်းများစွာရှိသည်။ ရုက္ခဗေဒဥယျာဉ်များတွင် ထူးခြားသောအပင်များကို တွေ့နိုင်သည်။ တိရစ္ဆာန်ရုံတွင် ကမ္ဘာတစ်ဝှမ်းမှ တိရိစ္ဆာန်များကို သွားရောက်ကြည့်ရှုနိုင်ပါသည်။ ရုက္ခဗေဒ ဥယျာဉ်များ နှင့် တိရစ္ဆာန်ရုံများသည် အများအားဖြင့် ဝင်ခွင့် ပေးရတတ်သည်။ ‌နေရာများစွာတွင် ရေကန်များ၊ သစ်တောများ နှင့် တောင်တန်းများလည်း ရှိသည်။ ပင်လယ်အနီးအနားတွင်ပင် နေထိုင်နိုင်သည်။ မြို့ထဲတွင်နေပါက သဘာဝပတ်ဝန်းကျင် ရှိရာသို့ အပျော်ခရီးထွက်နိုင်သည်။ ဥပမာ နွေရာသီတွင် ရေကန်သို့ သွား၍ ရေကူးနိုင်ပါသည်။

သူငယ်ချင်းများရှိပါက ဂျာမနီတွင်နေထိုင်ရသည်မှာ အဆင်ပြေပြီး၊ အားလပ်ချိန်ကို အတူတူကုန်ဆုံးရသည်မှာလည်း ပျော်စရာကောင်းပါသည်။ ဂျာမနီတွင် နေထိုင်သူများနှင့် သိကျွမ်းပါက မိတ်ဆွေသစ်များ ရရှိနိုင်သည်။ မိမိဖက်မှ ပွင့်ပွင့်လင်းလင်း ဆက်ဆံပြီး မိတ်ဆွေဖွဲ့ရန် စိတ်ဝင်စားမှုရှိကြောင်း ပြသပါ။ အားလပ်ချိန်တွင် အများနှင့်အတူ အချိန်ပေး၍ အားလပ်ရက်လှုပ်ရှားမှုများလုပ်ပါ။ သည်းခံ၍စောင့်ပါ။ မိတ်ဆွေသစ်ရရန် ရံဖန်ရံခါ အချိန်အနည်းငယ် ကြာတတ်ပါသည်။

အစပိုင်းတွင် သင့်နိုင်ငံ၏အသိုင်းအဝိုင်းမှ သင့်အား ကူညီနိုင်သည်။ ဥပမာဆိုပါက ထိုအသိုင်းအဝိုင်းများ ကို လူမှုကွန်ရက်များတွင် တွေ့ရတတ်သည်။ ဝါသနာတူ နှင့် စိတ်ဝင်စားမှုတူသည့်အဖွဲ့များလည်း ရှိသည်။ ရွှေ့ပြောင်းနေထိုင်သူများအတွက် အဖွဲ့အစည်းများ လည်း ရှိသည်။ အကြံဉာဏ်ပေးရေးစင်တာမှာ မေးနိုင်ပါသည်။ မြို့အတော်များများတွင် နိုင်ငံတကာတွေ့ဆုံမှုများ သို့မဟုတ် တွေ့ဆုံပွဲများ ရှိသည်။ ထိုပွဲများတွင် နိုင်ငံအသီးသီးမှ လူများနှင့် အကြံဥာဏ်များ ဖလှယ်နိုင်ပါသည်။

သင့်တွင် ကလေးရှိပါသလား။ ရှိပါက အခြားမိဘများ ဥပမာ မူကြိုကျောင်း သို့မဟုတ် စာသင်ကျောင်းတွင် မကြာခဏ တွေ့ဆုံရလိမ့်မည်။ ကလေးများမှတဆင့် ယေဘူယျအကြောင်းအရာများ ပြောဆိုရန်ရှိပြီးဖြစ်သည်။ အိမ်နီးချင်းများကိုလည်း နှုတ်ဆက်ပါ။ အဟောင်းဆိုင်များ၊ လမ်းထဲမှပါတီများ သို့မဟုတ် ရပ်ကွက်အစည်းအဝေးများ ရံဖန်ရံခါ ရှိတတ်ပါသည်။

လုပ်ငန်းခွင်တွင် သဘောကောင်းသော လုပ်ဖော်ကိုင်ဖက်များ ရှိတတ်သည်။ နေ့လယ်စာစားချိန်တွင် စကားပြောနိုင်သည် သို့မဟုတ် အလုပ်ပြီးချိန်တွင် တွေ့နိုင်သည်။ ဥပမာ လမ်းလျှောက်ထွက်ခြင်း သို့မဟုတ် တွေ့ဆုံစားသောက်ခြင်း တို့ လုပ်နိုင်သည်။ ဤသို့ဖြင့် တစ်ယောက်နှင့်တစ်ယောက် ပိုမို သိလာနိုင်ပြီး သူငယ်ချင်းအဖြစ် ရောက်ရှိနိုင်သည်။

ဘာသာစကားသင်တန်းတစ်ခုတက်ပါက ဂျာမနီနိုင်ငံ‌ရောက်စ လူသစ်များနှင့် တွေ့မည်ဖြစ်သည်။ ထိုနေရာတွင်လည်း မိတ်ဆွေသစ်များ သို့မဟုတ် သူငယ်ချင်းသစ်များ ရနိုင်သည်။ အားကစားလုပ်ခြင်းဖြင့်လည်း မိတ်ဆွေသစ် ရနိုင်သည်။ အဖွဲ့လိုက်အားကစားလုပ်ရသည်မှာ ပို၍ပျော်စရာကောင်းသည်။ နွေရာသီ၌ ပန်းခြံတွင်ချိန်းဆိုပြီး အားကစားအတူလုပ်သော အဖွဲ့များ မြို့များစွာတွင်ရှိသည်။ သို့မဟုတ် အသင်း ဝင်၍ ရသည်။

ဂျာမနီတွင် အားကစားကလပ် များစွာရှိသည်။ ထိုနေရာတွင် ဥပမာအားဖြင့်၊ ဘောလုံးကစားခြင်း၊ ရေကူးခြင်း၊ ကခုန်ခြင်း သို့မဟုတ် ကျွမ်းဘားကစားခြင်းတို့ ပြုလုပ်နိုင်သည်။ အခြားသူများနှင့်အတူလည်း အားကစားလေ့ကျင့်နိုင်ပါသည်။ အခြားအသင်းများ နှင့် ကလပ်များလည်း ရှိပါသည်။ အဖွဲ့ ထဲတွင် စိတ်ဝင်စားမှု နှင့် ပန်းတိုင်တူညီသူများ ရှိကြသည်။ ဥပမာအားဖြင့်၊ ဂီတကလပ်များ၊ လူငယ်ကလပ်များ၊ ဟင်းချက်ကလပ်များ သို့မဟုတ် ကွန်ပျူတာကလပ်များ ရှိသည်။ လူကြီးများ နှင့် လူငယ်များအတွက်ပါ အသင်းအဖွဲ့များ ရှိသည်။

နေရာအများစုတွင် သက်ကြီးပညာရေးစင်တာများ ရှိသည်။ ထိုနေရာတွင် အဓိကအားဖြင့် အရွယ်ရောက်ပြီးသူများအတွက် သင်တန်းများ ဥပမာ ဘာသာစကားသင်တန်း၊ ၊ အကသင်တန်း၊ ကွန်ပျူတာသင်တန်း သို့မဟုတ် ဘာသာစကားသင်တန်းများ ကို တွေ့နိုင်သည်။ အရွယ်ရောက်ပြီးသူများအတွက် အားကစား သင်တန်းများလည်းရှိသည်။

မိဘများ နှင့် သားသမီးများအတွက် အခမဲ့သင်တန်းများလည်း ရှိတတ်သည်။ ဥပမာ ကလေးများအတွက်၊ ကစားဖော်အဖွဲ့များ ကို နေရာအတော်များများတွင် တွေ့နိုင်သည်။

ကမ္ဘာပေါ်ရှိလူမျိုးတိုင်းကဲ့သို့ပင် ဂျာမန်လူမျိုးများသည် အစားအသောက်ကောင်းကို နှစ်သက်ကြသည်။ ဂျာမန်ရိုးရာ အစားအသောက်များစွာ ရှိပါသည်။ ဂျာမနီတွင်သာ ရရှိနိုင်သော အစားအစာများဖြစ်သည်။ သို့မဟုတ် ဂျာမနီနိုင်ငံ၏ ဒေသအချို့တွင်သာ ရတတ်သည်။ ဂျာမနီတွင် နေထိုင်သူတိုင်းနီးပါး Weißwurst (အဖြူရောင်ဝက်အူချောင်း) နှင့် Brezen (ဂျာမနီတောင်ပိုင်းမှ ကြွပ်ရွသော အညိုရောင် အပေါ်ယံလွှာ နှင့် လိမ်ထားသောပုံသဏ္ဍာန်ရှိ ပေါင်မုန့်တမျိုး) ကို သိကြသည်။ ၎င်းမှာတောင်ပိုင်း ဘိုင်ရန်းဒေသအစားအစာ ဖြစ်သည်။ ဂျာမနီနိုင်ငံမြောက်ပိုင်းတွင်မူ ငါး စားတတ်ကြသည်။ ဂျာမနီတွင် နိုင်ငံတကာအစားအသောက် စုံလင်လှသည်။ စားသောက်ဆိုင်များစွာလည်း ရှိသည်။ မြို့ကြီးများတွင် ရွေးချယ်စရာ များပြားပါသည်။ ဥပမာအားဖြင့်၊ ဗီယက်နမ်၊ အိန္ဒိယ၊ အီတလီ၊ တူရကီ သို့မဟုတ် အီသီယိုးပီးယား အစားအသောက်များ ရနိုင်သည်။

ဂျာမနီတွင်နေသူများသည် ကော်ဖီသောက်မုန့်စား၍ သူငယ်ချင်းများ နှင့် ကော်ဖီဆိုင်ထိုင်ရသည် ကို နှစ်သက်ကြသည်။ နွေရာသီတွင် လူအများစုမှာ အပြင်တွင် ထိုင်လေ့ရှိကြသည်။