Në fshat ose në qytete të vogla nuk keni aq shumë mundësi për kohën e lirë si në qytet. Por jeta është më e qetë. Ka më shumë natyrë dhe më shumë hapësirë. Jeta nuk është aq e zhurmshme dhe natyra e ndotur. Shtëpitë dhe apartamentet shpesh kanë një kopsht. Banimi është më i lirë.

Informacione për mundësitë e kohës së lirë mund t'i gjeni në faqen e internetit të qytetit ose vendbanimit tuaj.

Ju e pëlqeni kulturën? Në shumicën e qyteteve ka muze, ekspozita, kinema, teatro, koncerte dhe aktivitete të tjera. Shumë kinema shfaqin filma ndërkombëtarë në versionin origjinal (OV), shpesh edhe me titra përkthimi. Shumica e qyteteve dhe vendeve kanë një kalendar aktivitetesh në internet. Ju mund të shikoni online për të parë se çfarë ofrohet.

Në bibliotekat e qytetit mund të lexoni libra, të dëgjoni muzikë dhe të shihni filma falas ose përkundrejt një shume modeste. Ju dëshironi të regjistroheni në bibliotekën e qytetit tuaj. Shpesh ju nevojitet një certifikatë regjistrimi për këtë. Gjithashtu mund të merrni libra, filma dhe CD në shtëpi dhe t’ i ktheni në afatin e caktuar. 

Ju pëlqen të kaloni kohë jashtë? Natyra është një vend i mirë për t'u çlodhur. Në çdo qytet ka parqe. Ju mund të ecni, të luani ose të bëni një piknik atje. Në verë, parqet janë gjithmonë plot me njerëz. Njerëzit gjithashtu bëjnë sport atje. Ju mund të vraponi, të luani futboll ose pingpong, ose të bëni një stërvitje. Pothuajse të gjitha parqet janë falas.

Për fëmijët ka shumë kënde lojërash. Në kopshtet botanike mund të shihni bimë të veçanta. Kafshët nga e gjithë bota mund t'i shihni në kopshtet zoologjike. Kopshtet botanike dhe kopshtet zoologjike zakonisht kanë një tarifë. Gjithashtu, në shumë rajone ka liqene, pyje ose male, apo ndoshta ju madje jetoni afër detit. Nëse jetoni në qytet, mund të bëni shëtitje në natyrë. Në verë, për shembull, mund të shkoni në një liqen për të notuar.

„Me shoqëri njeriu ndihet më mirë. Është e bukur të kalosh kohën e lirë së bashku. Ju mund të njihni njerëz dhe të gjeni miq të rinj në Gjermani. Duhet të jeni te hapur dhe të tregoni interes. Përdorni kohën tuaj të lirë duke bërë gjëra të ndryshme. Kini durim. Ndonjëherë ju duhet pak më shumë kohë“.

Në fillim mund t'ju ndihmojë një komunitet me njerëz nga vendi juaj. Këto mund t'i gjeni për shembull në rrjetet sociale. Aty ka shumë grupe për hobi dhe interesa të përbashkëta. Ekzistojnë gjithashtu organizata për migrantë. Pyetni në qendra këshillimi. Shumë qytete kanë takime ose aktivitete ndërkombëtare. Aty mund të njiheni dhe të ndani përvoja me njerëz nga vende të ndryshme.

Keni fëmijë? Atëherë shpesh do të takoni prindër të tjerë, për shembull në kopsht ose në shkollë. Falë fëmijëve tashmë keni një temë të përbashkët. Përshëndetni fqinjët tuaj. Ndonjëherë në lagje ka tregje të vjetra, festa rrugësh ose takime fqinjësh.

Në punën tuaj ka me siguri kolegë të mirë. Mund të flisni me njëri-tjetrin gjatë pushimit të drekës ose të takoheni pas punës, për shembull, për një shëtitje ose një pije. Në këtë mënyrë mund të njiheni më mirë. Shpesh nga këto miqësi lindin marrëdhënie të reja.

Në një kurs gjuhe mund të takoni njerëz që gjithashtu janë të rinj në Gjermani. Ndoshta do të gjeni atje të njohur të rinj ose shokë dhe shoqe të reja. Gjithashtu, gjatë aktiviteteve sportive mund të takoni njerëz. Sporti në grup është zakonisht edhe më argëtues. Në shumë qytete ka grupe që takohen në park gjatë verës dhe bëjnë sport së bashku. Ose mund të bashkoheni në një klub.

Ka shumë shoqata sportive në Gjermani. Aty ju dhe fëmijët tuaj mund të luani futboll, të notoni, të kërceni ose të bëni gjimnastikë. Mund të stërviteni së bashku me të tjerë. Por ka edhe shoqata dhe klube të tjera. Në një shoqatë, njerëzit me të njëjtat interesa dhe qëllime bashkohen. Për shembull, ka shoqata muzikore, klube rinore, klube gatimi ose klube kompjuterike. Ka shoqata për të rritur dhe për të rinj.

Në shumë vende ka shkolla për të rritur (Volkshochschulen). Aty mund të gjeni kryesisht kurse për të rritur, për shembull, kurse gjuhe, kurse kërcimi, kurse kompjuterike ose kurse sportive.

Për prindërit dhe fëmijët shpesh ka oferta falas. Për fëmijët e vegjël, për shembull, në disa vende ka grupe lojërash.

Ashtu si kudo në botë, gjermanët e duan ushqimin e mirë. Ka shumë specialitete. Këto janë pjata që ekzistojnë vetëm në Gjermani ose vetëm në pjesë të caktuara të Gjermanisë. Pothuajse të gjithë në Gjermani e njohin “Weißwurst” dhe “Brezen”. Kjo është një pjatë tipike nga Bavaria. Në veri të Gjermanisë, njerëzit hanë shumë peshk. Por ushqimi në Gjermani është gjithashtu shumë ndërkombëtar. Ka shumë restorante të ndryshme. Në qytetet më të mëdha ka një gamë shumë të gjerë zgjedhjesh. Për shembull, mund të hani ushqime vietnameze, indiane, italiane, turke ose etiopiane.

Njerëzit në Gjermani gjithashtu pëlqejnë të kalojnë kohën me shokë dhe shoqe në kafene me kafe dhe ëmbëlsira. Në verë, ata zakonisht qëndrojnë jashtë.