Осигурувањето мора да се склучи однапред. Се прави договор и секој месец или еднаш годишно се плаќа одредена сума на пари на осигурителната компанија.

Некои осигурувања се задолжителни во Германија: Морате да ги имате овие осигурувања и постојат одредени правила за нив. Други осигурувања се доброволни: Можете да ги имате ако сакате.

Во Германија постои добра социјална сигурност. Дали имате работодавач? Тогаш плаќате придонеси за социјално осигурување. Повеќе информации за ова можете да најдете во текстот „Започнување со работа“. Парите за осигурување се одбиваат од платата. Не мора сами да ги плаќате сите придонеси, бидејќи Вашиот работодавач плаќа половина од сумата. Големината на придонесот зависи од платата: оној кој заработува повеќе, плаќа повеќе, а оној кој заработува помалку, плаќа помалку. Така и луѓето со ниски примања можат да добијат заштита.

Во социјалното осигурување спаѓаат:

• задолжителното здравствено осигурување,
• задолжителното осигурување за нега,
• задолжителното осигурување од несреќи,
• задолжителното пензиско осигурување,
• задолжителното осигурување за невработеност.

Во овие осигурувања сите луѓе се третираат еднакво. Секој ги добива истите услуги, дури и ако не може да плаќа многу за нив.

Ако сте самовработени, односно имате своја сопствена фирма, тогаш не плаќате во задолжителното социјално осигурување. Треба сами да се осигурате. Луѓето кои се невработени или имаат „мини-работа“ не плаќаат придонеси за социјално осигурување.

Здравственото осигурување е задолжително за сите луѓе во Германија. Тоа ги покрива трошоците кога одите на лекар, кога мора да одите во болница или кога Ви се потребни лекови. Постојат законски и приватни здравствени осигурувања. Лицата кои имаат редовна работа обично се осигурани со законското здравствено осигурување. Во законското здравствено осигурување можете бесплатно да ги осигурате Вашите деца. Ова важи и за Вашиот сопруг или сопруга, ако тој или таа не работи или заработува многу малку.

Самовработените лица можат доброволно да се осигураат во законското здравствено осигурување. Или, пак, тие можат да имаат приватно здравствено осигурување. Исто така, одредени професионални групи со редовна работа имаат приватно здравствено осигурување, на пример, наставниците. Приватното здравствено осигурување е обично корисно само за луѓе кои многу добро заработуваат.

Од здравственото осигурување добивате здравствена картичка. Секогаш треба да ја носите со себе и да ја покажете кога одите на лекар.

Од осигурувањето за невработеност добивате пари ако ја загубите работата и сè уште немате нова работа. Колку долго и колку пари ќе добивате зависи од многу фактори: на пример, колку долго сте работеле претходно и колку сте заработувале. Ова важи само ако имате право на надоместок за невработеност.

И пензиското осигурување е задолжително за вработените лица: Кога ќе остарите и повеќе не можете да работите, пензиското осигурување ќе Ви исплаќа пари за живот.

Вработените лица имаат и осигурување од несреќа. Тоа ги покрива трошоците ако имате несреќа на работа или ако се разболите поради работата.

Осигурувањето за нега исплаќа пари ако Ви е потребна долгорочна нега. Ова најчесто се случува кај многу стари лица. Но, може да се случи и кај млади лица, на пример, поради тешка несреќа.

Сето ова не важи за самовработените лица. Тие не мора да ги имаат овие осигурувања, но можат доброволно да се осигураат.

Ако имате автомобил или мотоцикл, ви треба осигурување за моторни возила (Kfz-Versicherung). Доколку имате несреќа и оштетите друго возило, осигурувањето ќе ги покрие трошоците за поправка или дел од нив.

Најважните од доброволните осигурувања се осигурувањето од одговорност (Haftpflichtversicherung) и осигурувањето за неспособност за работа (Berufsunfähigkeitsversicherung). Дали сте оштетиле нешто што му припаѓа на друг човек? Тоа може да биде многу скапо. Во таков случај, осигурувањето од одговорност ги покрива трошоците. Ова осигурување не чини многу.

Имате куче? Тогаш треба да направите осигурување од одговорност и за Вашето куче.

Осигурувањето за неспособност за работа функционира на следниов начин: Ако се разболите сериозно и не можете повеќе да работите, нема да добивате плата. Тоа е многу тешко. Осигурувањето за неспособност за работа тогаш Ви исплаќа пари секој месец. Ова осигурување е скапо. Оној што плаќал повеќе за осигурувањето, ќе добива повеќе пари. Оној што плаќал помалку, ќе добива помалку.

И осигурувањето на домашен имот (Hausratversicherung) и животното осигурување (Lebensversicherung) можат да бидат корисни. Осигурувањето на домашен имот плаќа ако предметите во Вашиот стан се оштетат, на пример при поплава. Животното осигурување плаќа кога ќе почине осигуреното лице. Парите тогаш ги добиваат, на пример, децата.

Законското пензиско осигурување често не исплаќа многу пари. Затоа постојат и приватни пензиски осигурувања. Дополнително пензиско осигурување е важно ако сакате да живеете удобно кога ќе остарите. Државата поддржува некои од овие осигурувања.

Постојат уште многу други осигурувања. Тие можат да бидат корисни за Вас и Вашата животна ситуација. Но, проверете внимателно кои осигурувања навистина Ви се потребни. Не се потребни сите. Секое осигурување чини пари. На пример, приватното осигурување од несреќа плаќа ако имате несреќа во слободното време. Правното осигурување (Rechtsschutzversicherung) ги покрива трошоците за адвокат.

Исто така, постојат осигурувања за патувања, забни интервенции, очила, кредити или мобилни телефони. Размислете колкав е ризикот. Многу нешта можете да ги платите и самите. Не Ви е секогаш неопходно осигурување.