Mamlaka ya Uhamiaji pia itakupa kibali cha kushiriki pamoja na orodha ya waendeshaji wa kozi, yaani shule za lugha. Kisha unaweza kutafuta shule ya lugha iliyo karibu nawe na kujisajili huko. Baadhi ya shule za lugha pia hutoa kozi za ujumuishaji mtandaoni.

Unaweza pia kupata anwani za waendeshaji wote wa kozi za ujumuishaji chini ya Anwani Muhimu. Hapo unaweza kutafuta waendeshaji walioko karibu nawe moja kwa moja. Matokeo pamoja na maelezo kama vile anwani au nambari ya simu utaweza kuyaona kwenye ramani.

Baada ya kujisajili, utafanya mtihani wa upimaji kiwango katika shule ya lugha. Hii ni kwa ajili ya kuweka utaratibu wa kozi itakayokufaa. Kwa kawaida, gharama kwako ni Euro 2.29 kwa kila saa ya masomo. Si washiriki wote wanaolazimika kulipia kozi hii. Maelezo zaidi utazipata kutoka Wizara ya Shirikisho ya Uhamiaji na Wakimbizi. Kozi ya ujumuishaji inajumlisha kozi ya lugha na kozi ya mwongozo.

Kozi ya kawaida ya lugha ina jumla ya masaa 600 ya masomo. Hapa utajifunza lugha kupitia mada za aushi ya kila siku kama vile ununuzi, mastakimu, watoto, vyombo vya habari, burudani, shule, kazi na miadi ya daktari.

Mwisho wa kozi utafanya mtihani wa mwisho (“Deutschtest für Zuwanderer ”). Baada ya mtihani, utapokea “Cheti cha Kozi ya ujumuishaji”. Utaweza kukizungumza, kukisoma na kukiandika Kijerumani katika kiwango cha A2 au B1. Waajiri wengi huwa wanahitaji kuona cheti hiki. Vile vile katika ofisi za serikali kama Mamlaka ya Uhamiaji, wakati mwingine kinahitajika. Iwapo utahitaji kupata uraia wa Ujerumani, cheti cha Kozi ya ujumuishaji ni kigezo muhimu.

Baada ya kozi ya lugha, utafanya kozi ya mwongozo. Kozi ya mwongozo ina jumla ya masaa 100 ya masomo. Hapa utajifunza mambo mengi kuhusu mfumo wa sheria wa Ujerumani, historia na utamaduni. Mada muhimu pia ni maadili na jinsi ya utangamano katika jamii. Mwisho wa kozi utafanya mtihani wa mwisho unaofahamika kama “Leben in Deutschland”.

Hukufanikiwa katika mtihani wa mwisho? Basi unaweza kupata masaa 300 ya ziada. Na unaweza kuurudia mtihani.

Kwa vijana walio chini ya miaka 27, kuna Kozi Maalum ya Ujumuishaji kwa Vijana. Itakufaa iwapo ungependa kufanya mafunzo ya kazi. Maelezo zaidi utapata kutoka Wizara ya Shirikisho ya Uhamiaji na Wakimbizi. Katika baadhi ya miji, pia kuna kozi maalum kama vile kozi za jinsia ya kike pekee, kozi za kujifunza kusoma na kuandika, au kozi zilizo na huduma za uangalizi wa watoto. Uliza katika shule ya lugha.

Unatafuta ajira au unataka kuboresha Kijerumani chako kwa ajili ya kazi? Basi unaweza kuhudhuria kozi ya lugha kwa ajili ya ajira. Hapa utajifunza Kijerumani cha kazi. Kabla ya kuhudhuria kozi hii, ni lazima uwe tayari unaweza kuzungumza Kijerumani au uwe umekamilisha kozi ya ujumuishaji. Uliza kwa Idara ya Ajira, kituo cha ajira au kwa mwajiri wako.