လူဝင်မှုကြီးကြပ်ရေးရုံးမှ သင်တန်းတက်ရောက်ရန် ခွင့်ပြုချက် နှင့် သင်တန်းကျောင်းများစာရင်း (ဘာသာစကားကျောင်းများ ကို ဆိုလိုပါသည်) ရရှိပါမည်။ အနီးအနား ပတ်ဝန်းကျင်မှ ဘာသာစကားကျောင်းတစ်ခုကို ရှာဖွေပြီး ထိုကျောင်းတွင် စာရင်းသွင်းနိုင်ပါသည်။ ပေါင်းစည်းရေးသင်တန်းကို ဘာသာစကားကျောင်း အချို့တွင်သာ အွန်လိုင်း တက်ရောက်နိုင်ပါသည်။

အရေးကြီးသောလိပ်စာများ ကဏ္ဍအောက်တွင် ပေါင်းစည်းရေးသင်တန်းလက်ခံသည့် သင်တန်းကျောင်း အားလုံး၏လိပ်စာများ တွေ့နိုင်ပါသည်။ အနီးအနား ပတ်ဝန်းကျင်မှ သင်တန်းကျောင်းများ ကို ရှာဖွေနိုင်သည်။ လိပ်စာ သို့မဟုတ် တယ်လီဖုန်းနံပါတ် ကဲ့သို့သော အချက်အလက်များကို မြေပုံပေါ်တွင် တွေ့ရပါမည်။

စာရင်းသွင်းပြီးပါက၊ သင်တန်းကျောင်းတွင် ဝင်ခွင့်အရည်အချင်းစစ် နေရာချစာမေးပွဲ ဖြေဆိုရပါမည်။ ရလာဒ်အရ သင့်တော်သောသင်တန်းကို နေရာချပေးပါမည်။ သင်တန်းကြေးမှာ ပုံမှန်အားဖြင့် သင်တန်းချိန်တစ်ခုလျှင် (၂.၂၉) ယူရို ဖြစ်သည်။ သင်တန်းသားတိုင်း သင်တန်းကြေးပေးရန်မလိုပါ။ နောက်ထပ်အချက်အလက်များကို ရွှေ့ပြောင်းနေထိုင်မှုနှင့် ဒုက္ခသည်များဆိုင်ရာဖက်ဒရယ်ပြည်ထောင်စုရုံးမှ ရယူနိုင်ပါသည်။ ပေါင်းစည်းမှုသင်တန်းတွင် ဘာသာစကားသင်တန်း နှင့် နေထိုင်မှုလမ်းညွှန်သင်တန်း တို့ ပါဝင်သည်။

ပုံမှန်ဘာသာစကားသင်တန်းတစ်ခုတွင် သင်တန်းချိန် (၆၀၀) ရှိသည်။ ဈေးဝယ်ခြင်း၊ နေထိုင်မှု၊ ကလေးအတွက်သိသင့်သည်များ၊ မီဒီယာ၊ အပန်းဖြေခြင်း၊ ကျောင်း နှင့် အလုပ် သို့မဟုတ် ဆရာဝန်ပြခြင်း စသည့် နေ့စဉ်လူနေမှုဘဝအကြောင်းအရာများကို သင်ယူနိုင်သည်။

သင်တန်းပြီးဆုံးပါက သင်တန်းဆင်းစာမေးပွဲ (ရွှေ့ပြောင်းနေထိုင်သူများအတွက် ဂျာမန်စာမေးပွဲ) ကို ဖြေဆိုရပါမည်။ “ပေါင်းစည်းရေးသင်တန်းဆင်းလက်မှတ်” ကို စာမေးပွဲပြီးနောက် ရရှိပါမည်။ A2 သို့မဟုတ် B1 အဆင့်တွင် ဂျာမန်ဘာသာစကားကို ပြော၊ ဖတ်၊ ရေးနိုင်ပါမည်။ အလုပ်ရှင်အများစုမှာ သင့်တွင် ထိုလက်မှတ်များရှိမရှိ သိလိုပါသည်။ လူဝင်မှုကြီးကြပ်ရေးရုံးကဲ့သို့သော ရုံးများတွင်လည်း ၎င်းလတ်မှတ်များ ရံဖန်ရံခါ လိုအပ်ပါသည်။ အကယ်၍ နိုင်ငံသားလျှောက်လိုပါက၊ ဆိုလိုသည်မှာ ဂျာမန်နိုင်ငံသား ဖြစ်လိုပါက၊ ပေါင်းစည်းရေးသင်တန်းဆင်း လက်မှတ် မှာ အထောက်အကူဖြစ်ပါသည်။

ဘာသာစကားသင်တန်းပြီးဆုံးပါက နေထိုင်မှုလမ်းညွှန်သင်တန်း တက်ရပါမည်။ ထိုသင်တန်းတွင် စာသင်ချိန်နာရီ (၁၀၀) ရှိသည်။ ဤသင်တန်းတွင် ဂျာမန်တရားစီရင်ရေးစနစ်၊ သမိုင်း နှင့် ယဉ်ကျေးမှုများ အကြောင်း များစွာလေ့လာနိုင်သည်။ အခြားအရေးကြီးသောအကြောင်းအရာများမှာ စံတန်ဖိုးထားမှုများ နှင့် လူမှုအဖွဲ့အစည်းအတွင်း အတူတကွ ပေါင်းစည်းနေထိုင်ခြင်း တို့ ဖြစ်သည်။ သင်တန်းပြီးဆုံးပါက “ဂျာမနီတွင်နေထိုင်ခြင်း” စာမေးပွဲကို ဖြေဆိုရပါမည်။

သင်တန်းဆင်းစာမေးပွဲ မအောင်မြင်ပါက၊ နာရီ (၃၀၀) ပါ သင်တန်းကို ထပ်၍တက်ရောက်နိုင်ပြီး စာမေးပွဲ ထပ်မံဖြေဆိုနိုင်ပါသည်။

အသက် (၂၇) နှစ်နှင့်အောက်ရှိလူငယ်များအတွက် အထူးပေါင်းစည်းရေးသင်တန်း ရှိပါသည်။ ၎င်းသင်တန်းမှာ အသက်မွေးဝမ်းကြောင်းသင်တန်း တက်လိုပါက အထောက်အကူဖြစ်ပါသည်။ အချက်အလက်များကို ရွှေ့ပြောင်းနေထိုင်မှုနှင့် ဒုက္ခသည်များဆိုင်ရာ ဖက်ဒရယ်ပြည်ထောင်စုရုံး မှ ရယူနိုင်သည်။ အချို့မြို့များတွင် အမျိုးသမီးများအတွက် စာတတ်မြောက်ရေးသင်တန်းများ သို့မဟုတ် ကလေးထိန်းသင်တန်းများကဲ့သို့သော အထူးသင်တန်းများလည်း ရှိသည်။ သင်တန်းကျောင်းတွင် စုံစမ်းနိုင်ပါသည်။

သင် အလုပ်ရှာနေပါသလား သို့မဟုတ် သင့်အလုပ်အတွက် ဂျာမန်ဘာသာစကား ကို တိုးတက်ချင်ပါသလား။ ထို့သို့ဆိုပါက အသက်မွေးဝမ်းကြောင်းဆိုင်ရာ ဘာသာစကားသင်တန်းကို တက်ရောက်နိုင်ပါသည်။ သင်တန်းတွင် အလုပ်အတွက် ဂျာမန်ဘာသာစကားကို လေ့လာနိုင်ပါမည်။
လုပ်ငန်းခွင်ဆိုင်ရာဘာသာစကားသင်တန်း မတက်မီ၊ ဂျာမန်ဘာသာစကားကို ပြောဆိုနိုင်ရမည် သို့မဟုတ် ပေါင်းစပ်သင်တန်းကို ပြီးမြောက်ထားရပါမည်။ အလုပ်အကိုင်ရှာဖွေရေးအေဂျင်စီ၊ အလုပ်စင်တာ သို့မဟုတ် အလုပ်ရှင်ထံ မေးမြန်းပါ။