Zyra për të huaj gjithashtu ju jep një vërtetim për të drejtën e pjesëmarrjes dhe një listë me ofruesit e kurseve, pra shkollat e gjuhës. Pastaj mund të kërkoni një shkollë gjuhe pranë jush dhe të regjistroheni atje. Disa shkolla gjuhe ofrojnë edhe kurse integrimi online.

Ju mund të gjeni adresat e të gjithë ofruesve të kurseve për integrim edhe te rubrika Adresat e rëndësishme. Atje mund të kërkoni ofrues të kurseve që ndodhen në afersinë tuaj. Rezultatet me informacione, si për shembull adresën ose numërin e telefonit, do t’i shihni më pas në një hartë.

Pas regjistrimit, do të bëni testin e vlerësimit te ofruesi i kursit. Kështu, për ju do të gjendet kursi i duhur. Kostot janë zakonisht 2,29€ për një orë mësimi. Jo të gjithë pjesëmarrësit duhet ta paguajnë kursin. Informacione të tjera mund të merrni te Zyra Federale për Migracion dhe Refugjatë. Kursi i integrimit përbëhet nga një kurs gjuhe dhe një kurs orientimi.

Kursi i zakonshëm i gjuhës ka 600 orë mësimi. Këtu mësohet gjuha me tema të përditshme si blerjet, banimi, fëmijët, mediat, koha e lirë, shkolla dhe puna ose vizitat te mjeku.

Në fund do të bëni provimin përfundimtar ("Testi i gjermanishtes për migrantët"). Pas provimit, ju merrni "Certifikatë të Kursit për Integrim". Ju do të flisni, lexoni dhe shkruani gjermanisht në nivelin A2 ose B1. Shumë punëdhënës  e kërkojnë këtë certifikatë. Gjithashtu, ndonjëherë ju duhet në ndonjë zyrë, si për shembull te zyra për të huaj. Nëse dëshironi të bëheni qytetar gjerman, pra të merrni shtetësinë gjermane, "Certifikata e Kursit për Integrim" është gjithashtu e dobishme.

Pas kursit të gjuhës, do të ndiqni kursin e orientimit. Kursi i orientimit ka 100 orë mësimi. Këtu mësohen shumë gjëra mbi sistemin ligjor gjerman, historinë dhe kulturën. Tema të rëndësishme janë gjithashtu vlerat dhe bashkëjetesa në shoqëri. Në fund do të bëni testin përfundimtar "Jeta në Gjermani".

Nuk e kaluat provimin përfundimtar? Atëherë duhet të merrni edhe 300 orë mësimi shtesë dhe mund të përsërisni edhe një herë provimin.

Për të rinjtë deri në 27 vjeç, ekziston një kurs i veçantë integrimi, kursi i integrimit për të rinjtë. Ai ju ndihmon nëse dëshironi të bëni një kualifikim profesional. Informacione mund të merrni te Zyra Federale për Migracion dhe Refugjatë. Në disa qytete ka edhe kurse të veçanta, si kurse vetëm për gra, kurse për alfabetizim ose kurse me kujdes për fëmijët. Për më shumë informacione drejtoheni në shkollën e gjuhës.

Jeni duke kërkuar punë apo dëshironi ta përmirësoni gjermanishten për vendin tuaj të punës? Para se të ndiqni një kurs gjuhe për profesion, duhet të dini tashmë gjermanisht ose të keni përfunduar kursin e integrimit. Drejtoheni me pyetje në Agjencin për Punë, Qendrën për Punësim ose te punëdhënësi juaj.