Жарыстар мен шаралар
Әр мұғалім үшін оқушыларды қызықтыру ең маңызды, кейде ең қиын міндет болуы мүмкін. Сізге бұл мақсатқа жету үшін Гёте-Институт Қазақстан мәдени шаралар мен жарыстардың тізімін жинап қойды. Енді сіз оқушыларыңыздың құлшыныстарын арттырып, неміс тілін қуана әрі ынталы түрде үйренулері үшін осы мүмкіндіктерді пайдалана аласыз.
«Why German?» – Неміс тілі курстарына арналған стипендиялар конкурсы
Қазақстандағы Goethe-Institut «Why German?» конкурсы аясында A1–C1 деңгейлеріндегі онлайн және офлайн неміс тілі курстарына стипендиялар ұсынады. Конкурсқа Қазақстандағы жоғары оқу орнына түсуді жоспарлап жүрген немесе бакалавриат, магистратура не докторантура бағдарламаларында оқитын Қазақстан азаматтары қатыса алады.
Қатысу үшін түйіндеме мен мотивациялық хат жіберіп, неміс тілінің мақсаттарыңызға жетуге қалай көмектесетінін айтып беріңіз. Финалистnер өз идеяларын қазылар алқасына таныстырады.
- Өтінім қабылдау мерзімі: 22.11.2026
- aruzhan.beisenbayeva@goethe.de
Жасанды интеллект дәуіріндегі позитивті психология: сән бе, әлде қажеттілік пе?
Проф. д-р хабил. Кристиан Людвиг (Берлин Еркін университеті)
Қазақ тіліне аудармамен ағылшын тіліндегі баяндама
Жоғары білім беру саласында жасанды интеллектті (ЖИ) қолдану мәселесі қызу талқылануда. Бір жағынан, ЖИ оқыту мен білім алуды қолдайтын тиімді құрал ретінде қарастырылса, екінші жағынан, ол білім беру үдерісін түбегейлі өзгертетін трансформациялық күш ретінде сипатталады. Бұл баяндамада аталған мәселелер талқыланып, жасанды интеллект технологиялары кеңінен енгізіліп жатқан білім беру ортасындағы позитивті психологияның рөлі мен әлеуеті қарастырылады.
Позитивті психологияның негізгі тұжырымдамаларына сүйене отырып, баяндама психологиялық әл-ауқат, мотивация, орнықтылық (резильенттілік) және тұлғалық даму сияқты факторлардың цифрлық трансформация жағдайында туындайтын сын-қатерлерді еңсерудегі маңызын көрсетеді. Сонымен қатар, позитивті психологиялық ресурстарды дамыту білім беру үдерісінің қосымша элементі ғана ма, әлде жасанды интеллект дәуірінде тиімді оқыту мен табысты білім алудың негізгі алғышарттарының бірі ме деген сұраққа ерекше назар аударылады.
Нақты мысалдар арқылы позитивті психология тәсілдері мен жасанды интеллект мүмкіндіктерін ұштастырудың оқытуды дараландыруға, оқу мотивациясын арттыруға және студенттер мен оқытушылардың психологиялық әл-ауқатын нығайтуға қалай ықпал ететіні көрсетіледі.
Қорытынды бөлімде болашаққа бағдарланған, адамға бағытталған білім беру ортасын қалыптастырудағы оқытушылар мен жоғары оқу орындарының рөлі талқыланады. Баяндама технологиялық инновациялар мен адами әлеуеттің өзара байланысын жаңаша пайымдауға мүмкіндік беріп, позитивті психологияның жауапты, орнықты және білім беру үдерісіне қатысушылардың әл-ауқатына бағдарланған оқыту мен білім алу жүйесін қалыптастырудағы маңызын айқындайды.
Іс-шара Қазақ ұлттық қыздар педагогикалық университетімен (QyzPU) бірлесіп өткізіледі.
Шетел тілдерін оқытудағы позитивті психология: зерттеулердің қазіргі жағдайы және даму перспективалары
Проф., хабилитацияланған доктор Кристиан Людвиг (Берлин Еркін университеті)
Ағылшын тіліндегі интерактивті дәріс (аудармасыз).
Соңғы онжылдықтарда шет тілдерін оқыту әдістемесінде оқытудың табыстылығы тек білім алушылардың когнитивтік қабілеттеріне ғана емес, сонымен қатар олардың эмоционалдық әл-ауқатына да байланысты екендігі туралы түсінік барған сайын нығайып келеді. Жастар арасындағы психикалық денсаулық дағдарысы тереңдеп, цифрлық коммуникацияның қарқынды дамуы мен үздіксіз ақпарат ағыны бұл жағдайды одан әрі күрделендіріп отырған қазіргі кезеңде білім алушының тұлғасына бағдарланған, қолдау көрсететін білім беру ортасын қалыптастыру ерекше маңызға ие. Баяндамада позитивті психологияның тілдік білім берудегі заманауи сын-қатерлерді түсіну мен еңсерудің тұжырымдамалық негіздерінің бірі ретіндегі әлеуеті қарастырылады.
Баяндаманың бірінші бөлімінде позитивті психологияның даму жолы — оның жалпы психология аясында қалыптасуынан бастап білім беру саласында және шет тілдерін оқытуда қолданылуына дейінгі кезеңдер қамтылады. Осознанность (mindfulness), ағым күйі (flow), психологиялық тұрақтылық (resilience), позитивті эмоциялар және позитивті тұлғааралық қарым-қатынастар сияқты негізгі теориялық тұжырымдамаларға ерекше назар аударылады.
Екінші бөлімде шет тілдерін меңгеру мен позитивті психологияның өзара байланысы қарастырылады. Атап айтқанда, позитивті эмоциялардың білім алушылардың когнитивтік мүмкіндіктерін кеңейтуге, оқыту үдерісіндегі эмоционалдық кедергілерді азайтуға және тұрақты оқу мотивациясын қалыптастыруға қалай ықпал ететіні талқыланады.
Қорытынды бөлімде позитивті психологияны тілдік білім беру саласында одан әрі зерттеу және тәжірибеде қолдану перспективалары айқындалады. Сонымен қатар, цифрландыру үдерісі күшейіп, қазіргі адамның психологиялық жүктемесі артып отырған жағдайда оқытудың тиімділігін арттыруға бағытталған шет тілдерін оқыту тәжірибесіндегі, сондай-ақ оқытушыларды даярлау мен олардың біліктілігін арттыру жүйесіндегі қажетті өзгерістер талқыланады.
Іс-шара Алматы қаласы Білім басқармасының Қалалық білім берудегі жаңа технологиялардың ғылыми-әдістемелік орталығымен бірлесіп өткізіледі.
