Сакате да студирате во Германија? Не доаѓате од Европската унија (ЕУ) или Европската економска зона? Тогаш потребна Ви е виза. Визата ја добивате во Германската амбасада (или Германскиот конзулат) во Вашата земја.

Имате завршено образование? Многу компании бараат стручен кадар. Можете да се пријавите за работа. Често е потребно да имате свидетелство за добивање работно место. Свидетелството е официјален документ со информации за Вашето образование или професија. Имате свидетелства од Вашата татковина? Преведете ги и заверете ги. Често истите треба и да ги нострифицирате. На тој начин ќе можете полесно да најдете работа. Повеќе информации можете да прочитате во текстот за барање работа.

Обука може да се прави во многу компании и во речиси сите области. За обука, потребно е да имате барем завршено основно образование. Понекогаш, сепак, потребно е да имате и завршено средно образование или матура (погледнете го текстот за образовниот систем). Без образовен сертификат, многу е тешко да се најде место за обука. Место за обука се наоѓа на ист начин како и работно место. Потребно е да се пријавите. Во текстот за барање работа ќе најдете повеќе информации и совети за пријавување и барање работа.

Во секој град постои и Центар за информации за професии (BIZ). Работниците таму ќе Ви дадат совет и ќе Ви помогнат да најдете место за обука. Ќе го најдете BIZ преку агенцијата за работа во Вашиот град.

Постојат два различни видови професионална обука: училишна обука и дуална обука. Училишната професионална обука се врши само во стручни училишта. За оваа обука потребно е да имате завршено образование, а понекогаш и дополнителни искуства, како на пример пракса.

Дуалната професионална обука се нарекува и обука во компанија. Во Германија, најчесто постои дуална професионална обука. Истата опфаќа теоретски и практичен дел. Практичната обука се прави директно во компанијата, а теоријата се учи во стручни училишта. Исто така, во овие училишта се изучуваат и неколку општи предмети како што се германски јазик, политика или спорт.

Во компанијата се реализира практичната обука. Практично се работи 3 до 4 дена неделно во компанијата, а во стручните училишта се поминуваат 8 до 12 часа неделно. Или пак, неколку недели се работи во компанијата и неколку недели се посетуваат стручни училишта.

По првата половина на обуката, треба да се положи испит за напредок. Студентите (познати како Азуби) ќе покажат што научиле. На крајот од обуката, се полага завршен испит. Потоа, учесниците добиваат свидетелство за обука, кое е важно ако сакаат да најдат работа. Повеќе информации можете да најдете во текстот за барање работа.

Професионалната обука најчесто трае од 2 до 3,5 години. Ова зависи од професијата, но и од образованието. Со матура обуката обично трае пократко. Во текот на обуката, студентите имаат најмалку 24 дена или 4 недели одмор годишно. Но, ова е возможно само кога стручните училишта имаат одмор и се затворени.

Постојат и обуки за професии кои може да се научат за кратко време, како што се професии во областа на чување деца, нега на стари лица, кетеринг или козметика. Овие обуки најчесто се училишни професионални обуки. Училишната професионална обука трае од 1 до 3,5 години. За повеќе информации, консултирајте се со агенцијата за работа во Вашето место на живеење.