ဂျာမနီတွင် နေ့ကလေးထိန်းကျောင်းများ (Kita) ၌ ကလေးအများအပြား တက်ရောက်ကြသည်။ ကျောင်းတွင် အခြားကလေးများ နှင့် အတူကစားပြီး မိတ်ဆွေအသစ် ဖွဲ့လေ့ရှိသည်။ ကလေးကို သင်နှင့်အတူ အိမ်တွင်ထားနိုင်သည်။ သို့သော် နေ့ကလေးထိန်းကျောင်းများ တွင် အားသာချက် များစွာ ရှိသည်။ ကျောင်းတွင် ဂျာမန်စာ နှင့် အခြားအရာများကို သင်ယူနိုင်သည်။

မြို့များနှင့် ရပ်ရွာများတွင် မြို့အကြီးအသေးပေါ် မူတည်၍ နေ့ကလေးထိန်းကျောင်း အများအပြားရှိသည်။ ထို့အပြင် ဘုရားကျောင်းမှ နေ့ကလေးထိန်းကျောင်းများ သို့မဟုတ် အခြားသော အဖွဲ့အစည်းများဖြင့်လည်ပတ်သည့် နေ့ကလေးထိန်းကျောင်းများ လည်း ရှိပါသည်။ ဥပမာ - Caritas. ပုဂ္ဂလိက နေ့ကလေးထိန်းကျောင်းများ နှင့် မိဘများအတူထူထောင်ထားသည့် ကလေးထိန်းအဖွဲ့ များလည်း ရှိပါသည်။ မိဘများ၏ကလေးထိန်းအဖွဲ့များ ကို မိဘများက တည်ထောင်ခဲ့သည်။ အချို့သော နေ့ကလေးထိန်းကျောင်းများ တွင် ဘာသာစကားနှစ်မျိုး ပြောသည်။ ဥပမာ ဂျာမန် နှင့် စပိန်။ ကလေးများ တစ်နေ့လုံးနေနိုင်သည့် နေ့ကလေးထိန်းကျောင်းများ လည်း ရှိပါသည်။

နေ့ကလေးထိန်းကျောင်း အများစုမှာ အကုန်အကျ များသည်။ ပုဂ္ဂလိက နေ့ကလေးထိန်းကျောင်း များမှာ အစိုးရကျောင်းများထက် ပိုကုန်ကျလေ့ရှိသည်။ ကုန်ကျစရိတ်များမှာ ပြည်နယ်များ တွင် မတူညီပါ။ ကုန်ကျစရိတ်မှာလည်း လူတိုင်းအတွက် မတူညီပါ။ အချက် အမျိုးမျိုးပေါ် မူတည်ပါသည်။ သင်၏ဝင်ငွေ မည်မျှရှိသနည်း။ ကလေးအသက်ဘယ်လောက်ရှိပါသနည်း။ ထို့အပြင် ကလေးကို နေ့ကလေးထိန်းကျောင်း တွင် တနေ့ နာရီဘယ်လောက်ကြာ ထားမည်နည်း။ အချို့သော ဖက်ဒရယ်ပြည်နယ်များ နှင့် မြို့ကြီးများတွင် နေ့ကလေးထိန်းကျောင်း မှာ အခမဲ့ဖြစ်သည်။ ၎င်းမှာ တခါတရံ မူကြို အတွက်သာ နှင့် တခါတရံ နေ့ကလေးထိန်းကျောင်း အားလုံးအတွက် အကျုံးဝင်သည်။ ကလေးအများစုသည် နေ့ကလေးထိန်းကျောင်း တွင် အစားအသောက် နှင့် သောက်စရာ များကို ရရှိသည်။ ထို့အတွက် လစဉ်ကြေးပေးဆောင်ရမည်ဖြစ်ပါသည်။ ဝင်ငွေနည်းပါက ထောက်ပံ့မှုရနိုင်သည်။ အလုပ်ရှာဖွေရေးစင်တာ သို့မဟုတ် လူမှုဝန်ထမ်းရုံး တွင် မေးမြန်းနိုင်ပါသည်။

(၂၀၁၃) ခုနှစ်မှစ၍ အသက်ဆယ့်နှစ်လနှင့်အထက် ကလေးများ နေ့ကလေးထိန်းကျောင်းတွင် နေရာတစ်ခု တရားဝင်ရပိုင်ခွင့် ရှိသည်။ ဆိုလိုသည်မှာ အသက် (၁) နှစ် မှစ၍ မိဘများ ဆန္ဒရှိလျှင် ကလေးကို နေ့ကလေးထိန်းကျောင်း သို့ ပို့နိုင်သည်။ သို့သော် မကြာခဏဆိုသလို ၎င်းမှာ မဖြစ်နိုင်ပါ။ ဂျာမနီတွင် နေ့ကလေးထိန်းကျောင်းများ အလွန်နည်းပြီး၊ မူကြိုဆရာ/ဆရာမများ လည်း အလွန်နည်းပါးပါသည်။ ထို့ကြောင့် သင့်ကလေး ကို နေ့ကလေးထိန်းကျောင်း များစွာတွင် စောစော စာရင်းသွင်းသင့်သည်။ နေရာမရပါက ဥပဒေအရ တရားစွဲနိုင်သည်။ ဆိုလိုသည်မှာ - ၎င်းအတွက် သင် နစ်နာကြေး ရမရ ကို တရားရုံးမှ ဆုံးဖြတ်ပါမည်။ ဥပမာအားဖြင့် - ကလေးထိန်းနေရာမရခြင်းကြောင့် အလုပ်မလုပ်နိုင်ခြင်း သို့မဟုတ် အလုပ်ချိန် နည်းနိုင်ခြင်း တို့ ဖြစ်သည်။ သို့မဟုတ် အခြားကလေးထိန်းစရိတ်မှာ ပိုမိုကုန်ကျခြင်းတို့ ဖြစ်သည်။

သင် နှင့် သင့်အိမ်ထောင်ဖက် နှစ်ဦးစလုံး အလုပ်လုပ်ပြီး သင့်တို့တွင် ကလေးငယ် (လသားအရွယ် မှ ၃ နှစ် အရွယ်အထိ) ရှိပါသလား။ ထိုသို့ဆိုပါက သင့်ကလေးကို နေ့ကလေးထိန်းဌာန သို့ ပို့နိုင်ပါသည်။ နေ့ကလေးထိန်းဌာနများတွင် နေရာ အလွန်နည်းပါးသည်။ မိဘများသည် ၎င်းတို့၏ သားသမီးများ အတွက် ကိုယ်ဝန်ရှိစဉ်ကပင် အမည်စာရင်းသွင်းလေ့ရှိသည်။

သင့်ကလေးကို ကလေးထိန်းနှင့်လည်း အတူ ထားနိုင်သည်။ ထိုစောင့်ရှောက်မှုမှာ ကလေးထိန်း ၏အိမ်တွင် ဖြစ်သည်။ ထိုသူတို့မှာ ကလေးအုပ်စုငယ်များ ကိုသာ ကြည့်ရှုစောင့်ရှောက်ကြပါသည်။

နေ့တိုင်းအတွက် ကလေးထိန်း ဖို့ မလိုအပ်ဘူးလား။ သို့သော် သင့်ကလေးကို အခြားကလေးများနှင့် ပေါင်းသင်းဆက်ဆံ စေချင်ပါသလား။ ထို့အတွက် အတူကစားအဖွဲ့များလည်း ရှိပါသည်။ မိဘများ နှင့် ကလေးများသည် ထိုအဖွဲ့များ သို့ အတူလည်ပတ်နိုင်ပါသည်။ သို့မဟုတ် ကလေးများကို ထိုနေရာတွင် နာရီအနည်းငယ်ကြာ စောင့်ရှောက်ခိုင်းနိုင်သည်။ ကလေးငယ်များအတွက် အခြားသော မိဘ-ကလေး အစီအစဉ်များ လည်း ရှိပါသည်။ ဥပမာ - ကလေးရေကူးခြင်း၊ အတူသီချင်းသီဆိုခြင်း သို့မဟုတ် လေ့ကျင့်ခန်းလုပ်ခြင်း များလည်း ရှိပါသည်။ အခြားမိဘများ နှင့်လည်း သိကျွမ်းနိုင်သည်။

ကလေးများသည် အသက် (၃) နှစ်မှ ကျောင်းစတက်သည်အထိ မူကြို တက်သည်။ ကစားခြင်း၊ သီချင်းဆိုခြင်း၊ ပန်းချီဆွဲခြင်း၊ လက်မှုပစ္စည်းဖန်တီးခြင်း များ လုပ်နိုင်သည်။ မူကြိုကျောင်း အများစုတွင် ပန်းခြံကြီးတစ်ခု ရှိသည်။ မူကြိုကျောင်း အများစု တွင် ဆရာ/ဆရာမများ မှ ကလေးများ ကို နွေရာသီတွင် တောထဲသို့ သို့မဟုတ် အခြားလေ့လာရေးခရီးများ သို့ ခေါ်သွားတတ်ကြသည်။

ကလေးများအားလုံး အသက် (၅) နှစ်အထိသာ မူကြို ကို တက်သင့်သည်။ ၎င်းမှာ ကျောင်းအတွက် အရေးကြီးသော ပြင်ဆင်မှုတစ်ခုဖြစ်သည်။ မူကြိုကျောင်း များစွာမှာ ဘာသာစကားတတ်မြောက်မှု ကို ပံ့ပိုးပေးသည်။ ဂျာမန်စကား မပြောတတ်သေးသော ကလေးများ ကို ကောင်းစွာ ကူညီပေးသည်။ ဂျာမန်ဘာသာမှာ တခါတရံ ဂျာမန်ကလေးများ အတွက်ပင် ခက်ခဲပါသည်။ ဥပမာအားဖြင့်၊ ဆရာ/ဆရာမများ သည် ကလေးများနှင့် ဘာသာစကားဂိမ်းများ ကစားခြင်း၊ စာဖတ်ပြခြင်း၊ ပုံပြောပြခြင်း များ ပြုလုပ်လေ့ရှိသည်။

မြို့ငယ်လေးများတွင်လည်း မူကြိုကျောင်းများ ရှိသည်။ သို့သော် နေရာများစွာမရှိသောကြောင့် သင့်ကလေးကို စောစော စာရင်းသွင်းသင့်ပါသည်။ မူကြို တွင် သင့်ကလေးသည် သူငယ်ချင်းများရရှိပြီး ဂျာမန်စကားပြောကာ နိုင်ငံသစ်အကြောင်း အမြန်သိလာပါမည်။

အချို့ မူကြိုကျောင်းများ မှာ နေ့လယ် ထိသာ ဖွင့်တတ်သည်။ မနက် (၇) နာရီ သို့မဟုတ် (၈) နာရီမှ နေ့လည် (၁၂) နာရီ (သို့) (၁) နာရီ အထိသာ ဖွင့်လှစ်ပါသည်။ အခြားသော တနေကုန်ဖွင့်သည့် မူကြိုများ လည်း ရှိသည်။ နေ့စဥ်ဖွင့်ချိန် မနက် (၇) နာရီ သို့မဟုတ် (၈) နာရီ မှ ညနေ ၄ နာရီ သို့မဟုတ် ညနေ ၅ နာရီအထိ ဖြစ်သည်။

အသက်(၆) နှစ် သို့မဟုတ် (၇) နှစ် အရွယ် ကလေးများ မှာ ကျောင်းတက်ရမည်ဖြစ်သည်။ ကျောင်းမှာ မတက်မနေရ ဖြစ်သည်။ ထိုအကြောင်းကို “ကျောင်းစနစ်” ကဏ္ဍတွင် ပိုမိုဖတ်ရှုနိုင်ပါသည်။ သင် အလုပ် လုပ်ပါက ကလေးကို တနေကုန်ကျောင်း သို့မဟုတ် ကျောင်းဆင်းချိန်နောက်ပိုင်း ကလေးစောင့်ရှောက်မှု သို့မဟုတ် နေ့လယ်ပိုင်းကလေးစောင့်ရှောက်မှု သို့ ပို့နိုင်သည်။ သင့်ကလေး ထိုနေရာတွင် များသောအားဖြင့် နေ့လယ်စာစားနိုင်သည်။ ကျောင်းဆင်းချိန်နောက်ပိုင်း ကလေးစောင့်ရှောက်မှုစင်တာ တွင် သင့်ကလေးကို ညနေ (၄) နာရီ သို့မဟုတ် (၅) နာရီ အထိ ထားနိုင်သည်။ နေ့လယ်ပိုင်းကလေးစောင့်ရှောက်မှု မှာ အများအားဖြင့် အချိန်ကြာကြာထား၍ မရပါ။