Në Gjermani, shumë fëmijë frekuentojnë një qendër ditore për fëmijë (Kita). Atje ata luajnë me fëmijë të tjerë dhe gjejnë shokë dhe shoqe. Fëmija juaj mund të qëndrojë edhe në shtëpi. Por një Kita ka shumë përparësi. Aty mëson gjermanisht dhe gjëra të tjera.

Qytetet dhe komunat kanë disa qendra Kitas, varësisht nga madhësia. Ka gjithashtu Kitas të kishës ose të organizatave të tjera, si për shembull Caritas. Disa Kitas janë private dhe iniciativa prindërore. Një iniciativë prindërore është themeluar nga prindërit. Disa Kitas janë dygjuhëshe. Aty fliten dy gjuhë, për shembull gjermanisht dhe spanjisht. Ka gjithashtu Kitas ku fëmijët kalojnë gjithë ditën jashtë.

Në shumicën e qendrave Kita paguhet diçka. Kitat private shpesh kushtojnë më shumë se ato të drejtuara nga shteti. Kostot ndryshojnë varsisht prej vendit. Dhe jo të gjithë duhet të paguajnë të njëjtën shumë. Kjo varet nga disa gjëra: Sa fitoni ju? Sa vjeç është fëmija juaj? Dhe sa orë qëndron fëmija në Kita? Në disa njësi shtetërore dhe qytete, kujdesi për fëmijët është falas. Kjo ndodh ndonjëherë për të gjitha vendet e kujdesit, ndonjëherë vetëm për kopshtet.

Shumica e fëmijëve marrin ushqim dhe pije në Kita. Për këtë ju duhet të paguani një shumë mujore. Nëse keni pak të ardhura, keni mbështetje financiare. Ju mund të pyetni në qendrën e punës (Job-Center) ose në zyrën sociale (Sozialamt).

Që nga viti 2013, fëmijët mbi 12 muaj kanë të drejtën ligjore për një vend në Kita. Kjo do të thotë: Çdo fëmijë mbi 1 vit mund të ndjekë një Kita, nëse prindërit e dëshirojnë këtë. Fatkeqësisht, kjo shpesh nuk është e mundur.
Ka shumë pak vende në Kita dhe shumë pak edukatorë në Gjermani. Ju duhet të bëni regjistrimin shumë më herët. Ju duhet ta regjistroni fëmijën tuaj në disa Kitas.
Nëse nuk merrni një vend, mund t`i gjykoni. Kjo do të thotë: Një gjykatë vendos nëse ju duhet të merrni kompensim financiar. Për shembull, nëse nuk mund të punoni ose punoni më pak për shkak të mungesës së një vendi në kujdesin për fëmijë. Ose sepse kujdesi tjetër kushton më shumë.

Ju dhe partneri/partnerja juaj punoni dhe keni një fëmijë të vogël (disa muajsh deri në 3 vjeç)? Atëherë mund ta çoni fëmijën tuaj në një çerdhe. Ka shumë pak vende në çerdhe. Prindërit shpesh i regjistrojnë fëmijët që gjatë shtatzënisë.

Fëmija juaj mund të qëndrojë edhe tek një kujdestar/e privat. Kujdesi është në shtëpinë e kujdestarit/es dhe zakonisht ka vetëm një grup të vogël fëmijësh.

Ju nuk keni nevojë për kujdes për çdo ditë? Por dëshironi që fëmija juaj të ketë kontakt me fëmijë të tjerë? Ka edhe grupe lojërash. Prindërit dhe fëmijët mund t'i frekuentojnë këto grupe së bashku. Ose fëmijët kujdesen aty vetëm për disa orë. Ka gjithashtu oferta të tjera për prindër dhe fëmijë të vegjël, si për shembull not për foshnjat, këngë të përbashkëta ose aktivitete fizike. Atje mund të njihni prindër të tjerë.

Nga mosha 3 vjeç deri në fillimin e shkollës, fëmijët shkojnë në kopsht. Atje mund të luajnë, këndojnë, vizatojnë dhe krijojnë punime artizanale. Shumica e kopshteve kanë një kopsht të madh. Në shumë kopshte, edukatorët dhe edukatoret shkojnë gjatë verës me fëmijët në natyrë ose bëjnë ekskursione të tjera.

Në moshën 5 vjeçe më së vonti, të gjithë fëmijët duhet të ndjekin një kopsht. Është një përgatitje e rëndësishme për shkollën. Në shumë kopshte ka kurse mbështetëse për mësimin e gjuhës. Ato ndihmojnë fëmijët që ende nuk flasin mirë gjermanisht. Ndonjëherë, edhe për fëmijët gjermanë, gjuha gjermane është sfiduese. Edukatorët organizojnë lojëra gjuhësore me fëmijët, u lexojnë libra dhe tregojnë histori.

Kopshte ka edhe në vendet më të vogla. Regjistroni fëmijën tuaj herët në kopsht. Edhe këtu nuk ka shumë vende të lira.
Në kopsht, fëmija juaj gjen shokë dhe shoqe, mëson gjermanisht dhe e njeh shpejt vendin e ri.

Disa kopshte janë të hapura vetëm deri në mesditë (nga ora 7:00 ose 8:00 deri në 12:00 ose 13:00). Kopshte të tjera janë të hapura gjatë gjithë ditës (nga ora 7:00 ose 8:00 deri në 16:00 ose 17:00).

Fëmijët nga mosha 6 ose 7 vjeç duhet të shkojnë në shkollë. Ekziston detyrimi shkollor. Mund të lexoni më shumë për këtë në tekstin tonë informues „Sistemi shkollor“. Nëse punoni, fëmija juaj mund të ndjekë një shkollë me orar të plotë ose pas shkollës të shkojë në një qendër kujdesi pasdite ose në një qendër për kujdes mesditor. Zakonisht, fëmija juaj mund të hajë edhe drekë atje. Në qendrën pasdite, fëmija juaj mund të qëndrojë deri në orën 16:00 ose 17:00. Kujdesi mesditor zakonisht nuk zgjat kaq shumë.