Nxënësit zakonisht ndjekin shkolla shtetërore. Në to nuk paguhen tarifa për shkollim. Ka shpenzime të vogla për fotokopje, materiale ose ekskursione. Në shkolla private duhet të paguhet tarifa shkollore.

Fëmija juaj nuk di ende mirë gjermanisht? Ka nevojë për ndihmë të veçantë për të mësuar gjermanisht? Atëherë kontaktoni direkt me shkollën.

Ekzistojnë lloje të ndryshme shkollash. Në shkollën fillore/primare shkojnë të gjithë fëmijët që nga mosha 6 ose 7 vjeç. Pas klasës së 4-të, fëmijët vazhdojnë në një shkollë të mëtejshme. Shkolla fillore zakonisht jep një rekomandim gjatë vitit të 4-të shkollor për shkollën që mund të ndjekë fëmija juaj. Ekzistojnë shkolla të ndryshme të mëtejshme, në varësi të njësis shtetërore:

Shkolla Hauptschule/Mittelschule (klasa 5 deri në 9 ose 10): Në shkollën Hauptschule ka gjithashtu lëndë praktike si punëdore ose vizatim teknik. Në një shkollë Hauptschule mund të përfundohet me diplomën Hauptschulabschluss ose me diplomën e kualifikuar pas klasës së 9-të. Jo të gjitha njësitë shtetërore kanë shkolla Hauptschule. Shpeshherë ka edhe shkolla Mittelschulen. Në shkollat Mittelschulen nxënësit shpesh marrin shumë përvojë praktike. Këtu mund të merret diploma e shkollës së mesme ose diploma e kualifikuar pas klasës së 9-të. Gjithashtu mund të merret një diplomë e shkollës Mittelschulen pas klasës së 10-të. Më pas mund të mësohet një profesion ose të vazhdohet në një shkollë më të avancuar.

Shkolla Realschule (klasa 5 deri në 10): Një shkollë më e avancuar është shkolla Realschule, ku përfundohet me diplomën Realschulabschluss. Më pas mund të mësohet një profesion ose të vazhdohet në një shkollë më të avancuar.

Gjimnazi (klasa 5 deri në 12/13): Në gjimnaz merret diploma e maturës/ Abitur dhe më pas mund të studiohet në një universitet. Në gjimnaz mësohen shpesh 2–3 gjuhë të huaja, si anglisht dhe frëngjisht. Nxënësit përfundojnë maturën pas klasës së 12-të (G8) ose klasës së 13-të (G9), në varësi të njësis shtetërore.

Shkolla Gesamtschule (klasa 5 deri në 13): Në disa njësi shtetërore ka shkolla të përgjithshme/ Gesamtschulen. Këtu, Hauptschule, Realschule dhe gjimnazi janë në të njëjtën ndërtesë. Mund të merret diploma e Hauptschulabschluss, Realschulabschluss ose matura. Nëse një fëmijë dëshiron të ndërrojë shkollën, për shembull nga shkolla Hauptschule në shkollën Realschule, kjo është më e lehtë. Në shkollat e ndara, kalimi është i mundur, por jo aq i thjeshtë.

Shkolla të veçanta: Në çdo njësi shtetërore ka edhe shkolla dygjuhëshe, shkolla speciale, shkolla profesionale dhe të larta. Informata më të hollësishme mund të gjenden në infografikën tonë.

Në shumicën e shkollave, mësimi përfundon në mesditë ose në fillim të pasdites (në orën 14 ose 15). Pas kësaj, një fëmijë mund të shkojë në kujdesin e pasditës, për shembull në një qendër për fëmijë. Aty mund të qëndrojë gjithë pasditën. I ofrohet ushqim dhe ndihmë për detyrat e shtëpisë. Kujdesin në qendër duhet ta paguani.

Ekzistojnë gjithashtu gjithnjë e më shumë shkolla me orar të plotë. Në këto shkolla, fëmijët qëndrojnë gjatë gjithë ditës, zakonisht deri në orën 16:00 ose 17:00. Aty marrin drekë dhe ndihmë me detyrat e shtëpisë. Shpesh, fëmijët mund të ndjekin kurse të veçanta, si sport, vizatim ose aktrim. Shkollat publike me orar të plotë janë falas. Në shkollat private me orar të plotë duhet të paguani tarifa shkollore.

Fëmijët kanë shumë lëndë në shkollë. Këtu përfshihet edhe edukata fizike. Shpesh ka edhe mësime noti. Në shumicën e shkollave, ofrohet mësim për fenë e krishterë. Por mund të çregjistroheni nga kjo lëndë dhe nuk jeni më i detyruar ta ndiqni. Si alternativë ofrohet etika dhe në disa shkolla mësime për fetë e tjera (si Islami ose feja hebraike).

Nëse fëmija juaj ka vështirësi në një lëndë, mund të marrë mësime private. Ose nga një mësues privat, ose në një qendër për ndihmë mësimore. Mësimi privat është zakonisht më i lirë.

Nxënësit zakonisht bëjnë një udhëtim në grup një herë gjatë vitit shkollor. Ai zgjat zakonisht 3 deri në 5 ditë. Një klasë udhëton së bashku në një qytet ose vend tjetër. Ka gjithashtu ditë ecjeje, ku fëmijët bëjnë një ekskursion së bashku. Fëmijët mësojnë diçka për historinë, kulturën dhe natyrën. Shkollat organizojnë gjithashtu festa shkollore. Aty mund të ketë, për shembull, shfaqje teatrale ose koncerte nga nxënësit.

Çdo shkollë ka përfaqësues të prindërve: këta janë prindër që bashkëpunojnë me shkollën. Disa herë në vit zhvillohen mbledhje me prindër. Prindërit marrin informacione të rëndësishme nga mësuesit dhe mund të njihen mes tyre. Ata mund të caktojnë një takim me një mësues dhe të bisedojnë vetëm me të. Kjo quhet bisedë me prindërit. Prindërit informohen për: Si po shkon fëmija në shkollë? Si janë rezultatet e tij? A ka ndonjë problem?