Постојат различни банки и штедилници. Некои имаат филијали каде што можете да разговарате со службеници. Други се директни банки, достапни само преку интернет. За сметката најчесто се плаќа мала провизија. Сепак, за ученици и студенти сметките најчесто се бесплатни.

Банките и штедилниците нудат камата на Вашите депозити. На тековната сметка каматата е многу мала. Ако сакате да заштедите, можете да отворите штедна сметка или сметка за дневна заштеда, каде што ќе добиете повисока камата.

Сакате да отворите банкарска сметка? Постојат различни видови сметки. Една обична банкарска сметка се нарекува тековна сметка (Girokonto). Понекогаш банката можеби нема да сака да Ви отвори тековна сметка, на пример, ако имате ниски приходи. Во таков случај, банката е обврзана да Ви понуди основна сметка (Basiskonto). Со оваа сметка можете да ги извршувате најважните финансиски трансакции: да префрлувате пари, да плаќате со картичка, да уплатувате и подигнувате пари. Најчесто, ова е сметка за позитивен баланс (Guthaben-Konto), што значи дека можете да трошите само онолку пари колку што имате на располагање.

Со сметка со дозволено пречекорување (Dispositionskredit или Dispo), можете да подигнете пари дури и кога немате средства на Вашата сметка. Банката Ви позајмува пари до одредена сума. Сепак, не треба само да ја вратите таа сума на банката, туку и да платите камата. Каматите обично се многу високи.

За да отворите сметка, може да посетите филијала. Потребно е да покажете документ за идентификација (лична карта или пасош).

Во многу банки можете да отворите сметка и онлајн или по пошта. За тоа можете да го користите Postident-постапката: ќе добиете документи од банката или штедилницата. Со тие документи и Вашиот личен документ или пасош одите во пошта. Таму ќе ја потврдат Вашата идентификација. Понекогаш за отворање на сметката потребна Ви е и потврда за пријавено живеалиште.

Повеќето работи со банката можете да ги завршите преку интернет. Тоа се нарекува електронско банкарство. Само мал број луѓе сè уште одат во филијала. Многу луѓе користат апликација на мобилниот телефон. Кога ќе отворате сметка, кажете дека сакате да користите електронско банкарство или домашно банкарство.

Со тоа можете брзо и лесно да правите трансакции, на пример, кога сакате да платите сметки. За тоа Ви се потребни само информациите за сметката: Кој треба да ги добие парите? Која е IBAN? За редовни трансакции, како што е киријата, можете да поставите траен налог.

Од 2014 година, во повеќето европски земји постои SEPA-платежен систем. Со него можете лесно да префрлувате евра. За тоа Ви се потребни IBAN и BIC. Тоа се редови од броеви и букви. IBAN и BIC можете да ги најдете, на пример, на Вашата платежна картичка.

Сакате да купувате преку интернет? Постојат различни начини на плаќање: Можете да добиете фактура и да го префрлите износот. Можете да платите со дебитна или кредитна картичка. Исто така, постојат платежни услуги како PayPal или Klarna. Многу луѓе во Германија имаат PayPal-сметка. Со неа можете лесно да испраќате пари на пријатели и познаници.

Постојат различни видови платеќни картички: жиро-картичка, кредитна картичка или дебитна картичка (на пример: MasterCard, Visa). Жиро-картичката претходно се нарекуваше EC-картичка, и многу луѓе сè уште го користат тој термин. Трошоците за овие картички варираат во зависност од банката. Една од нив обично е бесплатна. Банката или штедилницата најчесто Ви ја испраќа картичката по пошта. Треба да ја потпишете картичката. Неколку дена подоцна ќе добиете по пошта таен број за Вашата картичка, таканаречен ПИН-код. Овој број треба да го запомните.

Со жиро-картичка, дебитна или кредитна картичка, можете да подигнете пари од сите банкомати. За тоа секогаш Ви е потребен ПИН-кодот. Некои банки и банкомати наплаќаат провизија, а други се бесплатни. Понекогаш можете да подигнете пари и на касите во супермаркетите.

Можете да плаќате со жиро-картичката во продавници и ресторани. Често е можно плаќање и со дебитна или кредитна картичка. Внимавајте: Во Германија не секогаш е можно да се плаќа со картичка. Некои ресторани, кафулиња или помали продавници прифаќаат само готовина.

Дали ја изгубивте Вашата картичка или истата Ви беше украдена? Блокирајте ја картичката што е можно побрзо. Јавете се на бројот за итно блокирање: 116116.

Вашиот работодавец Ви исплаќа плата. Често се договара бруто годишна плата. Но, ова не е сумата што ќе ја добиете на вашата сметка. Од оваа сума се одземаат парите за задолжителното социјално осигурување. Покрај тоа, државата ќе земе данок на доход од Вашата плата. Нетото плата е она што останува по сите одбитоци. Вашиот работодавец ја префрла оваа сума секој месец на Вашата сметка. Внимавајте дали парите ќе Ви бидат доволни за животот. Вам Ви требаат доволно средства за кирија, храна, слободни активности и многу други работи. Прочитајте ги информациите во нашиот инфотекст „Осигурувања“ и „Вработување“.

Во Германија постои даночна обврска. Тоа значи: Сите лица кои работат, плаќаат данок на доход. Тоа е данокот на платата. Ќе добиете даночен број од финансиската управа и даночен ID од Федералната централна даночна управа. Тоа е 11-цифрен број. Исто така, имате и електронска даночна картичка (ELStAM). Таа директно ќе биде спроведена од финансиската управа до Вашиот работодавец.

Дали сте вработен(a)? Тогаш Вашиот работодавец ја исплаќа даночната обврска за доходот до даночната управа. Вие не треба да правите ништо. Имате своја фирма? И самостојните работници мораат да плаќаат данок на доход. Тоа е малку по комплицирано. Самостојните работници прават авансна уплата на даночната управа. За секоја година прават даночна пријава. Потоа мораат да доплатат пари или ќе ги добијат парите назад.

Висината на данокот на доход зависи од платата. Кој заработува повеќе, плаќа повеќе. Кој заработува помалку, плаќа помалку. И даночната класа е важна за тоа. На пример, оние што се оженети или имаат деца, плаќаат помалку даноци.

Ако сте член на црква, плаќате и црковен данок. Компаниите плаќаат данок на дејноста на градот или општината.

И работниците секоја година поднесуваат даночна пријава. Со тоа им кажуваат на финансиската управа колку пари примиле. Исто така, наведуваат и кои трошоци ги имале. Работниците често добиваат пари назад од финансиската управа по поднесувањето на даночната пријава. Можете сами да ја поднесете даночната пријава, на пример преку порталот ELSTER на финансиската управа. Можете да побарате помош од даночен советник, но тоа чини пари.

Во Германија постојат многу различни осигурувања. Некои се задолжителни, додека други се доброволни. Едно важно осигурување е пензиското осигурување. За да имате доволно пари кога ќе остарите, постои законска пензија. Сепак, таа често не е доволна. Приватното осигурување за старост е најчесто корисно. Повеќе информации може да најдете во нашиот информативен текст „Осигурувања“.

Чувајте ги важните документи поврзани со Вашите финансии на безбедно место. Исто така, чувајте ги документите за потврда на Вашиот идентитет, како на пример, уверението за социјално осигурување или Вашиот пасош. Ова важи и за лични исправи, како што се извод од матична книга на родени или извод од матична книга на вебчани. Добро е да ги чувате и Вашите свидетелства.