အင်တာနက်ပေါ်တွင် တိုက်ခန်းရှာဖွေရေးအတွက် ဝဘ်ဆိုက်များစွာ ရှိသည်၊ ဥပမာ။ မျှဝေနေထိုင်သောတိုက်ခန်း (အတိုကောက် WG) တွင်လည်း အခန်းငှားနိုင်သည်။ ၎င်းတိုက်ခန်းမျိုးတွင် အခြားသူများနှင့် တိုက်ခန်းတစ်ခုကို မျှဝေနေထိုင်ရပါသည်။ ဥပမာအားဖြင့် wg-gesucht.de (flatmate လိုချင်တယ်။) ဝဘ်ဆိုက်တွင် မျှဝေနေထိုင်သောတိုက်ခန်း မှ အခန်းလွတ်များကို ရှာနိုင်သည်။ ကြားဖြတ်ငှားသော တိုက်ခန်းများ လည်း ရှိသည်။ ၎င်းတိုက်ခန်းများကိုမူ အချိန်အကန့်အသတ်ဖြင့်သာ ငှားရမ်းနိုင်ပါသည်။

သတင်းစာအများစုတွင် များသောအားဖြင့် သောကြာနေ့ သို့မဟုတ် စနေနေ့များတွင် တိုက်ခန်းများကို ကြော်ငြာသည်။ ကြော်ငြာများကို သတင်းစာ၀က်ဘ်ဆိုဒ်များတွင်လည်း တွေ့နိုင်သည်။ သင်နေထိုင်သည့်မြို့ သို့မဟုတ် စည်ပင်သာယာရေးရုံးတွင်လည်း တိုက်ခန်းငှားရန် မေးမြန်းနိုင်ပါသည်။ အိမ်ခြံမြေအကျိုးဆောင် တစ်ဦးမှလည်း တိုက်ခန်းရှာဖွေရာတွင် သင့်ကိုကူညီပေးနိုင်သည်၊ အိမ်ခြံမြေအကျိုးဆောင် မှ တိုက်ခန်းရှာတွေ့ပါက ဝန်ဆောင်ခပေးချေရပါမည်။ ပုံမှန်အားဖြင့်၊ အိမ်ခြံမြေအေးဂျင့်တစ်ဦးသည် ကော်မရှင်အနေဖြင့် အိမ်လခ (၂) လ မှ (၃) လ ငှားရမ်းခကို ရရှိသည်။

ကြော်ငြာများတွင် အများအားဖြင့် တိုက်ခန်းငှားခ မည်မျှပေးရသည်ကို ဖော်ပြလေ့ရှိသည်။ သို့သော် ၎င်းမှာ အိမ်ငှားခသီးသန့် မျှသာ ဖြစ်သည်။ အခြားကုန်ကျစရိတ်များလည်း ရှိပါသည်။ ဥပမာအားဖြင့်၊ ရေဖိုး၊ သန့်ရှင်းရေးခ နှင့် အမှိုက်သိမ်းခများကို ပေးဆောင်ရသည်။ အပူပေးစက် နှင့် လျှပ်စစ်မီးသည် အခြားကုန်ကျစရိတ်များ ၏တစ်စိတ်တစ်ပိုင်း ဖြစ်နိုင်သော်လည်း၊ ကွဲပြားမှုရှိနိုင်ပါသည်။ အခြားကုန်ကျစရိတ်များတွင် မည်သည့်စရိတ်များ ပါ၀င်သည် နှင့် မည်သည့် အပိုပေးဆောင်ရမည့်အရာများ ရှိသည်ကို အိမ်ရှင်ထံ မေးနိုင်သည်။

အိမ်ငှားခသီးသန့် နှင့် အခြားစရိတ်များကိုပေါင်း၍ အပြီးအစီးငှားရမ်းခ ဟု ခေါ်သည်။ လအစတွင် အိမ်ရှင်အမျိုးသား သို့မဟုတ် အမျိုးသမီးထံ အပြီးအစီးငှားရမ်းခ အပြည့်ကို လွှဲရပါမည်။

ငှားရမ်းသောတိုက်ခန်းများတွင် ပုံမှန်အားဖြင့် ပရိဘောဂမရှိပါ။ သို့သော် မီးဖိုချောင်ရှိတတ်ပါသည်။ ရေခဲသေတ္တာကဲ့သို့သော ရွှေ့ပြောင်းမရသည့်၊ တိုက်ခန်းတွင်ကျန်ရှိနေသည့် ယခင်အိမ်ငှားသူ၏ ပစ္စည်းများအတွက် ပေးချေရတတ်သည်။ ပစ္စည်းအမ်းယူခ ဟု ခေါ်ပါသည်။

အိမ်ရှင်ဖက်မှ စရန်ငွေပေးရန် တောင်းဆိုတတ်ပါသည်။ ၎င်းမှာ အများဆုံး အိမ်ငှားခ (၃) လစာအထိ ဖြစ်နိုင်သည်။ သင်ပြောင်းရွှေ့သောအခါတွင် စပေါ်ငွေ ပြန်လည်ရရှိပါမည်။ တိုက်ခန်းငှားခ စျေးကြီးမကြီးစစ်လိုပါက အိမ်ငှားအညွှန်းတွင် ကြည့်နိုင်ပါသည်။ ထိုစာမျက်နှာတွင် မြို့တိုင်းအတွက် ပျမ်းမျှ အိမ်ငှားခကို တွေ့လိမ့်ပါသည်။ အင်တာနက်ပေါ်တွင် ‘အိမ်ငှားအညွှန်း’ ဟု ရှာ၍ သင်၏မြို့အမည်ကို ရိုက်ထည့်ပါ။

နှစ်အစတွင် ရေဖိုး၊ လျှပ်စစ်မီးခ နှင့် ဓာတ်ငွေ့ခ မည်မျှ ကျသင့်မည်ကို မသိနိုင်ပါ။ ထို့ကြောင့် လစဥ် ကြိုတင်ငွေ ပေးချေရသည်။ နှစ်ကုန်လျှင် ပိုပါက ငွေပြန်ရ သို့မဟုတ် လိုပါက အနည်းငယ် ထပ်ပေးရပါမည်။

အိမ်ငှားခ နှင့် စပေါ်ငွေဆိုင်ရာ အချက်အလက်အားလုံးကို အိမ်ငှားစာချုပ်တွင် တွေ့ရှိနိုင်သည်။ အိမ်ပြောင်းရာတွင် တိုက်ခန်းကို ပြင်ဆင်မွမ်းမံရန် လိုမလို ထည့်သွင်း ဖော်ပြထားပါသည်။ တိုက်ခန်းသစ်တစ်ခုသို့ ပြောင်းရွှေ့သည့်အခါတိုင်း လက်ဆင့်ကမ်းပရိုတိုကောကို လက်မှတ်ရေးထိုးရန် လိုအပ်သည်။ လက်ဆင့်ကမ်းပရိုတိုကော တွင် ဥပမာအားဖြင့်တိုက်ခန်းအတွင်း၌ မည်သည့်အရာ ပျက်ဆီးထားသည်ကို ဖော်ပြသည်။ သို့မှသာ ထိုအရာပျက်စီးမှုမှာ သင်နှင့်မဆိုင်ကြောင်း အိမ်ရှင်မှ သေချာသိနိုင်ပါသည်။ လက်မှတ်မထိုးမီ အိမ်ငှားစာချုပ်နှင့် လက်ဆင့်ကမ်းပရိုတိုကောကို သေချာဖတ်ပါ။

အိမ်ပြောင်းလိုပါက ပုံမှန်အားဖြင့် (၃) လ ကြိုတင်၍ အကြောင်းကြားရပါမည်။ ဤသည်ကို ကြိုတင်အသိပေးကာလဟု ခေါ်သည်။ အိမ်ငှားခနှစ်ဆမပေးရစေရန် ကြိုတင်သတိပေးသည့်ကာလ ကို အမြဲသတိထားပါ။ ထိုကိစ္စအတွက် လကုန်တွင် အိမ်ရှင်ကို စာရေးအကြောင်းကြားရပါမည်။

အိမ်နီးနားချင်းများနှင့် ပဋိပက္ခများ မဖြစ်လိုဘူးမလား။ စည်းကမ်းအချို့ကို လိုက်နာပါ။ ပုံမှန်အားဖြင့် ဆူညံခွင့်မရှိချိန်သည် ည (၁၀) နာရီမှ နံနက် (၇) နာရီအထိ နှင့် မွန်းလွဲ (၁) နာရီမှ (၃) နာရီအထိဖြစ်သည်။ ဆိုလိုသည်မှာ ကျယ်လောင်သောအသံများ မထွက်ရပါ။ တနင်္ဂနွေနှင့် အစိုးရရုံးပိတ်ရက်များတွင် တနေကုန် ဆူညံခွင့်မရှိပါ။

ဂျာမနီတွင် အမှိုက်ပုံးများကို စက္ကူနှင့်ကတ်ထူပြားများ၊ သစ်သီးနှင့် ဟင်းသီးဟင်းရွက်အကျန်များ နှင့် အခြားအမှိုက်များအတွက် ခွဲထားသည်။ အိမ်ရှေ့တွင် အမှိုက်ပုံးများ ရှိတတ်သည်။ အမှိုက်များကို ထိုနေရာတွင် ပစ်နိုင်ပါသည်။ ဖန် သို့မဟုတ် လျှပ်စစ်ပစ္စည်းများကို သီးသန့်စုဆောင်းသည့်နေရာများ သို့မဟုတ် ကွန်တိန်နာများသို့ ယူဆောင်သွားရမည်။ ပလပ်စတစ်၊ သထ္ထုဗူးခွံနှင့် ပါကင်ထုပ်အမှိုက်များကို အဝါရောင်အိတ် သို့မဟုတ် အဝါရောင်ပုံးထဲတွင် စွန့်ပစ်နိုင်သည်။ မြို့များတွင် ပလတ်စတစ် နှင့် ပါကင်ထုပ်အမှိုက်များကို သင့်အနီးအနားရှိ အမှိုက်ပုံးကြီးများတွင် စွန့်ပစ်ရသည်။ နောက်ထပ်အချက်အလက်များကို သင်နေထိုင်ရာမြို့ သို့မဟုတ် စည်ပင်သာယာတွင် ရရှိနိုင်သည်။

အခြားစည်းကမ်းများအားလုံးကို သင့် အိမ်စည်းကမ်း တွင် တွေ့နိုင်သည်။ ဥပမာ - တိုက်ခန်းထဲတွင် ခွေး သို့မဟုတ် ကြောင်မွေးခွင့်ရှိပါသလား။ သို့မဟုတ် အိမ်ရှေ့စင်္ကြံ သို့မဟုတ် လူသွားလမ်းကို သန့်ရှင်းရေးလုပ်ရမည်လား။