သို့သော် အခြားသောရောဂါများစွာအတွက်၊ ဆေးစာ ဖြင့်သာ ဆေးဝယ်၍ ရနိုင်သည်။ ဆေးစာပေါ်တွင် လိုသည့်ဆေးများကို ဖော်ပြထာသည်။ ဆရာဝန်မှသာ ဆေးစာ ထုတ်ပေးရမည်။ ဆေးစာ ကိုပြ၍ ဆေးဆိုင်မှ ဆေးဝယ်နိုင်ပြီး၊ တချို့တဝက်သာ ပေးချေရပါမည်။ ကျန်သည့်ကျသင့်ငွေကို ကျန်းမာရေးအာမခံ မှ ပေးချေပါသည်။

ဆေးဆိုင်များကို ပုံမှန်အားဖြင့် တနင်္လာနေ့မှ သောကြာနေ့အထိ နံနက် (၈) နာရီ မှ ညနေ (၆း၃၀) နာရီအထိ၊ စနေနေ့တွင် နေ့လည် (၁) နာရီအထိ ဖွင့်လှစ်ပါသည်။ မြို့ကြီးများတွင်မူ အချို့သော ဆေးဆိုင်များကို ည (၈) နာရီအထိ ဖွင့်သည်။ စနေ၊ တနင်္ဂနွေ နှင့် ညဘက်များအတွက် အရေးပေါ်ဝန်ဆောင်မှု လည်း ရှိပါသည်။

ကျန်းမာရေးအာမခံမှာ ဂျာမနီတွင်နေသူတိုင်းအတွက် မယူမနေရ ဖြစ်သည်။ သက်ဆိုင်ရာအချက်အလက်ကို “အာမခံများ” ကဏ္ဍ တွင် ဖတ်ရှုပါ။

ဖျားနေပါသလား ဒါမှမဟုတ် ဆေးဘက်ဆိုင်ရာအကူအညီ လိုပါသလား။ ထို့သို့ဆိုပါက အထွေထွေရောဂါကုဆရာဝန် နှင့် ချိန်းဆိုခြင်းသည် အကောင်းဆုံးဖြစ်သည်။ ၎င်းတို့မှ သင်၏ဝေဒနာများ နှင့် ရောဂါများအတွက် ကနဦးမေးခွန်းများကို ဖြေကြားပေးမည်ဖြစ်သည်။ မိသားစုဆရာဝန်များဟုလည်း ခေါ်ကြသည်။ ဆရာဝန်နှင့်ပြသရန် အရေးကြီးပါသည်။ ဆရာဝန်မှသာ ပြန်လည်နေကောင်းကျန်းမာလာစေရန် ကူညီပေးနိုင်သည်။ အထွေထွေဆရာဝန်မှ မကုနိုင်ပါက အထူးကုဆီသို့ ဆက်လက်ညွှန်းပေးပါသည်။

သင့်ကလေး နေမကောင်းဖြစ်နေပါသလား။ ထိုသို့ဆိုပါက ကလေးအထူးကုဆီသို့ သွားရပါမည်။ ပုံမှန်အားဖြင့် တနင်္လာနေ့မှ သောကြာနေ့အထိသာ ဆရာဝန်ပြနိုင်သည်။ စနေ၊ တနင်္ဂနွေ နှင့် ညများတွင် ကျန်းမာရေးပြဿနာများအတွက် ဖုန်းဖြေကြားသည့်ဝန်ဆောင်မှု ရှိပါသည်။

ရက်ချိန်းယူလိုပါက ဆေးခန်းသို့ ဖုံးခေါ်ဆိုနိုင်ပါသည်။ သို့မဟုတ် အွန်လိုင်းတွင် ရက်ချိန်းယူနိုင်သည်။ ဆရာဝန်အများစုထံတွင် ၎င်းစနစ်ရှိပြီး၊ လွယ်ကူအသုံးဝင် သည်။ ဝက်ဘ်ဆိုဒ်သို့သွား၍ ရက်ချိန်းကိုရွေးချယ်နိုင်သည်။ အတည်ပြုချက်ကို လက်ခံရရှိပြီး၊ ဘယ်အချိန်တွင် ဆရာဝန်နှင့် တွေ့နိုင်မည်ကို သိရပါမည်။ ချိန်းဆိုသည့်ရက် သို့ မရောက်မီ သင့်ဆီသို့ အီးမေးလ် သို့မဟုတ် SMS မက်ဆေ့ခ်ျ ဖြင့် သတိပေးချက်တစ်ခု လက်ခံရရှိတတ်သည်။

ဆရာဝန်ပြသသည့်အခါ ကျန်းမာရေးအာမခံကုမ္ပဏီ မှကတ်၊ ကျန်းမာရေးအာမခံထားသည့်ကတ် သို့မဟုတ် ကျန်းမာရေးအာမခံကတ် တစ်ခုခု လိုအပ်မည်ဖြစ်သည်။ ပထမဆုံးပြသရာတွင်၊ သင်၏ကိုယ်ရေးကိုယ်တာ အသေးစိတ် အချက်အလက်များကို လျှောက်လွှာတွင် ဖြည့်သွင်းရပါမည်။ နာမည်၊ နေရပ်လိပ်စာ စသည်တို့ဖြည့်ရမည်။ တခါတရံ ဆေးခန်းမှ သင့်တွင် မည်သည့်ရောဂါရှိသည်၊ ပုံမှန်သောက်ရသည့်ဆေး ရှိမရှိ သိလိုပါသည်။

ဖောင်ဖြည့်ပြီးပါက စောင့်ဆိုင်းခန်းတွင် စောင့်ရပါမည်။ သင့်အလှည့်ရောက်ပါက အမည်ကိုခေါ်ပါမည်။ တခါတရံ မိနစ်အနည်းငယ်သာ စောင့်ရတတ်သော်လည်း တခါတရံ တစ်နာရီထက် ပိုကြာနိုင်ပါသည်။

ပြသရာတွင် ဆရာဝန်မှ ရောဂါခံစားရမှုများကို မေးမြန်းပါမည်။ မည်သည့်အချိန်ကတည်းက ဝေဒနာခံစားရသည်၊ ယခုလိုဝေဒနာမျိုး အရင်က ခံစားဖူးပါသလား စသည်တို့ကို မေးပါမည်။ သင်၏ ရောဂါလက္ခဏာများကို အသေးစိတ်ရှင်းပြသင့်ပါသည်။ မေးမြန်းပြီးပါက ရောဂါရှာဖွေစစ်ဆေးပေးပြီး၊ ကုသမှုပေးမည် ဖြစ်သည်။ ဆရာဝန်မှ သင့်တွင် မည်သည့်ရောဂါရှိသည်၊ မည်သည့်အရာများ လုပ်သင့်သည်ကို ရှင်းပြသည်။ ထို့နောက် သင့်အား ဆေးစာ ပေးပြီး၊ ဆေးကို ဆေးဆိုင်တွင် ဝယ်၍ ရနိုင်သည်။ တခါတရံတွင် ပြန်လည်စစ်ဆေးရန်အတွက် ရက်ချိန်းပေးပါလိမ့်မည်။

သင့်တွင် အစိုးရ ကျန်းမာရေးအာမခံ ရှိပါက ဆရာဝန်ပြသမှုအတွက် ငွေ ပေးချေရန် မလိုအပ်ပါ။ အခြားသော ပုဂ္ဂလိကဝန်ဆောင်မှုများအတွက်မူ မိမိဘာသာ ကျသင့်ငွေပေးချေရပါမည်။ ပုဂ္ဂလိက ကျန်းမာရေးအာမခံ ရှိသူများဆိုပါက ပြေစာတစ်စောင် ရရှိမည်။ ကုသမှုအတွက် ဦးစွာ ကိုယ်တိုင် ပေးချေရပြီး ကျန်းမာရေးအာမခံ ကုမ္ပဏီထံမှ ကျသင့်ငွေကို ပြန်လည် လက်ခံရရှိမည်ဖြစ်သည်။

နေမကောင်းဖြစ်၍ အလုပ်မသွားနိုင်ပါက အလုပ်ရှင် သို့ ချက်ချင်းအကြောင်းကြားရမည်။ ဖျားနာနေကြောင်း အလုပ်ရှင် ထံ ဖုန်းဆက်ပါ။ မည်မျှကြာကြာ နေမကောင်းဖြစ်နိုင်သည် ကို အသိပေး ပြောပြပါ။

ဆရာဝန်ပြဖူးပါသလား။ ဖျားနာသောကြောင့် အလုပ်မလုပ်နိုင်ပါက ဆရာဝန်မှ သင့်အတွက် ဆေးခွင့်ကို ရေးပေးပါမည်။ ၎င်းကို ဆေးလက်မှတ် ဟု ခေါ်သည်။ ဆေးခွင့်တွင် အလုပ်မလုပ်နိုင်ဘူကြောင်း ထောက်ခံထားပြီး၊ နေပြန်ကောင်းလာချိန်အထိ မိမိအိမ်တွင် နေရသည်။ အိမ်တွင် မည်မျှကြာကြာနေသင့်သည် ဆိုသည်ကို ဖော်ပြထားပါသည်။ ၎င်းအတွက် စာရွက်ရမည် မဟုတ်ဘဲ၊ သင်၏အချက်အလက်များကို ဆရာဝန်မှ ကျန်းမာရေးအာမခံ ကုမ္ပဏီ သို့ တိုက်ရိုက်ပေးပို့သည်။ အလုပ်ရှင် မှ ဆေးစာကို အွန်လိုင်းတွင် ကြည့်ရှုနိုင်ပါသည်။

အချို့သော အလုပ်ရှင်များ သည် ဖျားနာသည့် ပထမနေ့မှစ၍ ဆေးစာ ကို လိုချင်သည်။ အများစုမှာ သုံးရက်မြောက်သောနေ့မှစ၍ ဆေးစာ ကို တောင်းပါသည်။ ဆေးစာအတွက် ဆေးခန်းသို့ ဖုန်းခေါ်ဆိုနိုင်သည်။ အသေးစားရောဂါများအတွက် ဆေးခွင့် မှာ ငါးရက်အထိ ဖြစ်နိုင်ပြီး၊ ရက်ကြာကြာဖျားနာပါက ဆရာဝန်ပြသရပါမည်။

ဆရာဝန်အမျိုးအစား များစွာရှိပြီး၊ မတူညီသော ကျွမ်းကျင်မှုနယ်ပယ်များစွာရှိပါသည်။ ထိုဆရာဝန်များကို အထူးကုများဟု ခေါ်သည်။ ဥပမာ အရိုးအကြောအထူးကု ရှိသည်။ အရိုးအဆစ်များနှင့်ပတ်သက်သည့်ရောဂါအားလုံး ကို ကိုင်တွယ်ဖြေရှင်းကြသည်။ ဥပမာ- လက်ကျိုးပါက။ မီးယပ်ဆရာဝန်များသည် အမျိုးသမီးများအတွက်ဖြစ်သည်။ ကိုယ်ဝန်ဆောင်အမျိုးသမီးများကို ပြုစုစောင့်ရှောက်ပေးသည်။ နား၊ နှာခေါင်း၊ လည်ချောင်း အထူးကု နှင့် အခြားသော အထူးကု ဆရာဝန်ကြီးများလည်း ရှိပါသည်။

အထွေထွေရောဂါကုဆရာဝန် သည် သင့်အား မကြာခဏပင် အထူးကုဆရာဝန်ထံသို့ ဆက်ညွှန်းပါလိမ့်မည်။ ထို့အတွက် လွှဲစာကို သင်လက်ခံရရှိမည်။ အထူးကုဆရာဝန်မှ အထွေထွေရောဂါကုဆရာဝန် ထံသို့ သင့်ရောဂါအကြောင်းကို စစ်ဆေးပြီးနောက် အကြောင်းကြားပါမည်။

မည်သည့်အထူးကုထံ သွားရမည် ကို သိပါသလား။ သိပါက တိုက်ရိုက်သွားနိုင်ပါသည်။ လွှဲစာယူရန် မလိုအပ်ပါ။ သွားဆရာဝန်ပြသရန် လွှဲစာ မလိုအပ်ပါ။

နေမကောင်း၍ ပင်ပန်းနွမ်းနယ်သည် ဟု ခံစားနေရပါသလား။ ခန္ဓာကိုယ်ကျန်းမာရေးမှာ အလွန်အရေးကြီးပါသည်။ သို့သော် ခန္ဓာကိုယ်တစ်ခုသာ နာမကျန်းဖြစ်နိုင်သည် မဟုတ်ဘဲ၊ စိတ်ကျန်းမာရေး ထိခိုက်မှုလည်း ရှိနိုင်ပါသည်။ တနည်းဆိုရသော် ပြဿနာများ၊ အကျပ်အတည်းများ၊ ဖိစီးမှု၊ ကြောက်ရွံ့မှု သို့မဟုတ် အကြမ်းဖက်ခံရမှု ကဲ့သို့သော အတွေး နှင့် ခံစားချက်တို့မှာ စိတ်ကျန်းမာရေးနှင့် သက်ဆိုင်သည်။ မိမိကျန်းမာရေးကို ဂရုစိုက်ပါ။ ဝမ်းနည်းမှု၊ စိတ်ဖိစီးမှု သို့မဟုတ် စိုးရိမ်ပူပန်မှုများ ရှိပါက အကူအညီရယူပါ။

ကြိုတင်ကာကွယ်စစ်ဆေးမှုဖြင့် ပြင်းထန်သောရောဂါများကို စောစီးစွာသိရှိနိုင်ပြီး ပိုမိုလျင်မြန်စွာကျန်းမာလာစေရန် ကူညီပေးပါသည်။ အချို့သောကြိုတင်ကာကွယ်စစ်ဆေးမှုများ ကို ကျန်းမာရေးအာမခံ မှ ပေးချေပါသည်။ အခြားစစ်ဆေးမှုများကိုမူ သင်ကိုယ်တိုင် ပေးချေရပါမည်။

ကလေးများအတွက် ကြိုတင်ကာကွယ်စစ်ဆေးမှုများလည်း ရှိသည်။ အလွန်အရေးကြီးသော စစ်ဆေးမှုများ ဖြစ်သည်။ ဝက်သက်၊ ကြက်ညှာချောင်းဆိုး နှင့် ပါးချိတ်‌ရောင်နာ ကဲ့သို့သော ကူးစက်ရောဂါများကို ကာကွယ်ဆေးထိုး၍ ကာကွယ်နိုင်သည်။ ကျွန်ုပ်တို့၏ "ကလေးရှိသော မိသားစု” ကဏ္ဍတွင် ဆက်လက် ဖတ်ရှုပါ။

အသက် (၃၅) နှစ်မှစတင်၍ ကျောက်ကပ်နှင့် နှလုံးသွေးကြော ဆိုင်ရာရောဂါများ၊ ဆီးချိုရောဂါ နှင့် ကင်ဆာ တို့ကို စောစီးစွာသိရှိနိုင်စေရန်အတွက် ကြိုတင်စစ်ဆေးမှုများ ပြုလုပ်နိုင်ပါသည်။ အမျိုးသမီးများအတွက် ရင်သားဆိုင်ရာ စမ်းသပ်စစ်ဆေးခြင်းများ ရှိသည်။ ကိုယ်ဝန်ဆောင်မိခင်များ အတွက် ပုံမှန်ကြိုတင်ကာကွယ်စစ်ဆေးမှုများ ရှိပါသည်။

ကျား၊ မ၊ အသက်အရွယ်၊ သို့မဟုတ် မျိုးရိုးရောဂါ ပေါ်မူတည်၍ လိုအပ်သော ကြိုတင်ကာကွယ်စစ်ဆေးမှုများ ရှိသည်။ ကာကွယ်ဆေးထိုးခြင်းမှာ လူကြီးများအတွက်လည်း အရေးကြီးပါသည်။ သင်၏ ဆရာဝန်နှင့် ဆွေးနွေးပါ။

ဂျာမနီနေသူတိုင်း အရေးပေါ် ရဲဌာနနံပါတ် (၁၁၀) နှင့် မီးသတ်ဌာန သို့မဟုတ် အရေးပေါ် ကယ်ဆယ်ရေး (၁၁၂) ကို သိသင့်သည်။ အကူအညီ နှင့် အကြံဥာဏ်များ လိုအပ်ပါက အခြားသော ဖုန်းနံပါတ်များလည်း ရှိပါသည်။ ကျွန်ုပ်တို့၏ “အရေးပေါ်အခြေအနေတွင် ဆောင်ရွက်ရန်” ကဏ္ဍတွင် ဤအကြောင်းအရာကို ဆက်လက်ဖတ်ရှုနိုင်ပါသည်။