လတ်ဆတ်သောစားသောက်ကုန်များ ဝယ်ချင်ပါသလား။ ၎င်းတို့အတွက် တစ်ပတ်လျှင် တစ်ကြိမ် သို့မဟုတ် နှစ်ကြိမ် ဖွင့်သော အပတ်စဉ်စျေး နေရာများစွာတွင် ရှိသည်။ ဖွင့်ချိန်မှာ များသောအားဖြင့် စနေနေ့များတွင် ဖြစ်သည်။ အပတ်စဉ်စျေး တွင် လတ်ဆတ်သော သစ်သီးများ၊ ဟင်းသီးဟင်းရွက်များနှင့် ဒေသဆိုင်ရာ အထူးထုတ်ကုန်များကို ဝယ်ယူနိုင်ပါသည်။ လတ်ဆတ်သော အသားများ နှင့် ဝက်အူချောင်းများကို စူပါမားကက် သို့မဟုတ် အသားဆိုင်များတွင် ရနိုင်သည် (ဂျာမနီတောင်ပိုင်းတွင် ၎င်းတို့ကို Metzgereien ဟုခေါ်သည်)။ မုန့်ဖုတ်ဆိုင်များတွင် လတ်ဆတ်သော ပေါင်မုန့်များကို ဝယ်ယူနိုင်သည်။

မြို့ငယ်များတွင် မုန့်ဆိုင်များ၊ အသားဆိုင်များ နှင့် အခြားဆိုင်ငယ်များကို စောစောပိတ်လေ့ရှိသည် သို့မဟုတ် တစ်ရက်လျှင် နာရီအနည်းငယ်သာဖွင့်သည်။ အပတ်စဉ်စျေးများ သည် များသောအားဖြင့် နံနက်စောစော မှ နေ့လည်ပိုင်းအထိ ဖြစ်သည်။ ဆိုင်များအားလုံး တနင်္ဂနွေနေ့တွင် ပိတ်ပါသည်။ မုန့်တိုက်များ၊ ရထားဘူတာများ နှင့် ဓာတ်ဆီဆိုင်များရှိ စတိုးဆိုင်များသာ တနင်္ဂနွေ နှင့် အစိုးရရုံးပိတ်ရက်များတွင် ဖွင့်လေ့ရှိသည်။

အနီးဆုံးစူပါမားကတ်က သွားရတာဝေးပါသလား။ ဒါမှမဟုတ် ဈေးဝယ်ဖို့ အိမ်ကနေ မထွက်ချင်ဘူးလား။ အိမ်တိုင်ရာရောက်ပစ္စည်းပို့ပေးသည့် ဝန်ဆောင်မှုကို သုံးနိုင်သည်။ သင့်အိမ်သို့ စ္စည်းများ ပို့ပေးပါလိမ့်မည်။ ‘အစားအသောက်ပို့ဆောင်သည့်ဝန်ဆောင်မှု’ ကို သင်နေထိုင်သည့် မြို့အမည်ဖြင့် အင်တာနက်တွင် ရှာပါ။ အင်တာနက်တွင် ပုံမှန်အားဖြင့် ဖောင်တစ်ခု ဖြည့်ရတတ်ပါသည်။ စူပါမားကတ်အများစုတွင် ပစ္စည်းပို့ဝန်ဆောင်မှု ရှိပါသည်။ ၎င်းဝန်ဆောင်မှုမှာ ဆိုင်တွင်ဈေးဝယ်သည်ထက် ပို၍ ကုန်ကျတတ်ပါသည်။ အဆင်သင့်ချက်ပြုတ်ပြီးသော အစားအစာများကို ပို့ဆောင်ပေးသည့် ဝန်ဆောင်မှုများလည်း ရှိပါသည်။ ၎င်းဆားဗစ်များကို ဖုန်းခေါ်ဆိုနိုင် သို့မဟုတ် အွန်လိုင်းမှ မှာယူနိုင်ပါသည်။

ဂျာမနီတွင် အဖျော်ယမကာဗူးခွံများ၊ ပလတ်စတစ်ပုလင်းများနှင့် ဖန်ပုလင်းဗူးခွံများကို ပြန်အပ်နှံ၍ ငွေပြန်ထုတ်ယူနိုင်ပါသည်။ ဗူးခွံ သို့မဟုတ် ပုလင်းခွံအတွက် ငွေအနည်းငယ်ပို၍ ပေးချေရသည် (များသောအားဖြင့် (၈) ဆင့်မှ (၂၅) ဆင့်ကြား ဖြစ်သည်)။ ဆိုင်သို့ ဗူးခွံလွတ်များ ပြန်သွင်းပါက ပြန်အမ်းငွေ ရရှိပါမည်။

များသောအားဖြင့် စူပါမားကတ် သို့မဟုတ် အဖျော်ယမကာမျိုးစုံဝယ်ယူနိုင်သည့်ဆိုင်များတွင် ပုလင်း နှင့် ဗူးခွံအလွတ်များ ပြန်သွင်းရန်အတွက် စက်များရှိသည်။ ပြန်သွင်းပြီးလျှင် ပြေစာတရွက် ရရှိပါမည်။ ပြေစာပြပြီးလျှင် ပိုက်ဆံပြန်ရပါမည်။ ပြန်အမ်းငွေစနစ်မရှိသော ဖန်ပုလင်းများကို အမှိုက်ပုံးတွင် ပြန်လည်စွန့်ပစ်ရပါမည်။

ဗီရို၊ ကွန်ပြူတာ သို့မဟုတ် ဖိနပ်တစ်ရံ ဝယ်လိုပါက ကုန်တိုက်တစ်ခု သို့မဟုတ် ၎င်းပစ္စည်းမျိုးသီးသန့်ရောင်းသည့်ဆိုင် သို့ သွားနိုင်သည်။ ကုန်တိုက်များတွင် မတူညီသော ကုန်ပစ္စည်းများစွာရှိပြီး၊ အများအားဖြင့် မြို့ကြီးများတွင် တွေ့ရသည်။ ပစ္စည်းတစ်မျိုးအထူးပြုရောင်းသည့်ဆိုင်များမှာ သီးသန့်ထုတ်ကုန်များကိုသာ ရောင်းချသည်။ ဥပမာအားဖြင့်၊ ပရိဘောဂဆိုင်များ၊ လျှပ်စစ်ပစ္စည်းဆိုင်များ နှင့် ဖိနပ်ဆိုင်များတို့ဖြစ်သည်။ ဆိုင်ဖွင့်ချိန်သည် များသောအားဖြင့် နံနက် ၉း၀၀ မှ ၈း၀၀ နာရီအထိဖြစ်ပြီး တစ်ခါတစ်ရံ ညနေ ၆း၃၀ အထိသာဖြစ်သည်။

ယနေ့ခေတ်တွင် ပစ္စည်းအများစုကို အွန်လိုင်းမှလည်း ဝယ်ယူနိုင်သည်။ ပုံမှန်အားဖြင့် ရက်အနည်းငယ်သာ စောင့်ရပြီး ဝယ်ယူသည့် ပစ္စည်းများကို သင့်အိမ်သို့ ပို့ဆောင်ပေးပါသည်။

ဂျာမနီတွင် တစ်ပတ်ရစ်ပစ္စည်းများ ဥပမာ အဝတ်အထည်၊ လျှပ်စစ်ပစ္စည်းများ၊ ပရိဘောဂများ၊ စာအုပ်များ နှင့် အခြားပစ္စည်းများစွာကိုလည်း စျေးသက်သာစွာ ဝယ်ယူနိုင်ပါသည်။

အထူးသဖြင့် မြို့ကြီးများတွင် စနေနေ့ အဟောင်းစျေးများ ရှိပြီး ယခုအခါ တပတ်ရစ်ဆိုင်များလည်း ပိုများလာပါသည်။ အင်တာနက်ဝဘ်ဆိုက်တွင် သင်နေထိုင်သည့်မြို့ရှိ “အဟောင်းစျေး” သို့မဟုတ် ”တစ်ပတ်ရစ်ဆိုင်” ဟု ရိုက်၍ ရှာဖွေနိုင်ပါသည်။

ဈေးသက်သာသော တစ်ပတ်ရစ်ပစ္စည်းများကို အွန်လိုင်းတွင် မကြာခဏ တွေ့နိုင်သည်။ သို့သော် ပစ္စည်းအရောင်းအားလုံးကို ယုံကြည်စိတ်ချ မရကြောင်း ကျေးဇူးပြု၍ သတိပြုပါ။ နာမည်ကြီးပလက်ဖောင်းများမှာ -

ဂျာမနီတွင် ငွေပေးချေမှုနည်းလမ်းမျိုးစုံ သုံးစွဲပါသည်။ များသောအားဖြင့် ငွေသား သို့မဟုတ် Giro ဘဏ်ကတ် (သို့မဟုတ် EC ကတ်) ဖြင့် မည်သည့်နေရာတွင်မဆို ငွေချေနိုင်ပါသည်။ ဘဏ် သို့မဟုတ် ငွေစုဘဏ်တွင် Giro ဘဏ်အကောင့် တစ်ခုရှိလျှင် Giro ဘဏ်ကတ် သို့မဟုတ် Debit ကတ် ကို ရရှိမည်ဖြစ်ပြီး မကြာခဏဆိုသလို အကြွေးဝယ်ကတ် (MasterCard သို့မဟုတ် Visa Card) တစ်ခုလည်း ရရှိပါမည်။ အချို့သော စူပါမားကတ်များ၊ ကုန်တိုက်များ နှင့် သီးသန့်ထုတ်ကုန်အရောင်းဆိုင်များတွင် အကြွေးဝယ်ကတ်ဖြင့် ငွေပေးချေနိုင်ပါသည်။ မိုဘိုင်းငွေပေးချေမှု (ဥပမာ- သင့်စမတ်ဖုန်းဖြင့် ငွေပေးချေခြင်း) သည်လည်း ဂျာမနီတွင် အသုံးများသည်။

အင်တာနက်ပေါ်တွင် သင်သည် အကြွေးဝယ်ကတ် နှင့် Debit ကတ် ဖြင့်သာမက တိုက်ရိုက်ငွေပေးချေမှု သို့မဟုတ် ငွေတောင်းခံလွှာ ဖြင့်လည်း ပေးချေနိုင်ပါသည်။ တိုက်ရိုက်ငွေပေးချေမှု ပြုလိုပါက၊ သင်၏အကောင့်အသေးစိတ်အချက်အလက်များကို အွန်လိုင်းတွင် ထည့်သွင်းရပါမည်။ ရောင်းသူမှ ကျသင့်ငွေကို သင့်အကောင့်မှ ဖြတ်ယူသွားပါမည်။ ငွေတောင်းခံလွှာစနစ်ဖြင့် ငွေချေပါက သင်၏ ဘဏ်အကောင့်မှ ငွေလွှဲရပါသည်။ အခြားငွေပေးချေမှုနည်းလမ်းများ ဥပမာ PayPal လည်း ရှိပါသည်။ ဘဏ္ဍာရေးနှင့် အခွန် ဟူသော ကဏ္ဍတွင်လည်း နောက်ထပ်အချက်အလက်များကို ဖတ်ရှုနိုင်သည်။

ဂျာမနီရှိ ဆိုင်အများစုတွင် ကုန်ပစ္စည်းအားလုံးအတွက် ပုံသေစျေးနှုန်းများရှိသည်။ တစ်ခါတစ်ရံတွင် စျေး နှင့် ပစ္စည်းအမျိုးအစားသီးသန့်ရောင်းသည့်ဆိုင်များတွင် အများအပြား ဝယ်ယူပါက ဈေးဆစ်နိုင်သည်။ ၎င်းမှာ ပုံမှန်ပြုလုပ်လေ့ရှိသည့် ပုံစံတော့ မဟုတ်ပါ။

ပစ္စည်းတစ်ခုခုဝယ်ပြီး ပျက်စီးသွားပါသလား။ ထိုသို့ဆိုပါက ကုန်ပစ္စည်းအသစ်များအတွက် အာမခံ (၂) နှစ် ရှိ၍၊ ပစ္စည်းအသစ်လဲ၍ ရနိုင်သည်။ သို့မဟုတ် ပျက်စီးသွားသော ထုတ်ကုန်ကို ပြန်ပေးနိုင်ပြီး၊ ငွေပြန်ရနိုင်ပါသည်။ ထိုသို့မဟုတ်ဘဲ လျှော့စျေးလည်း ရနိုင်ပါသည်။ တစ်ပတ်ရစ်ပစ္စည်းအတွက် အာမခံမှာ (၁၂) လဖြစ်သည်။ တခါတရံမှာ ကုန်ပစ္စည်း အာမခံချက် လည်းရှိတတ်ပါသည်။ ဥပမာ အာမခံကာလအတွင်း တီဗီပျက်သွားပါက ၎င်းကို အခမဲ့ ပြုပြင်ပေးမည်ဖြစ်သည်။ သို့မဟုတ် အသစ်တစ်လုံး ရနိုင်သည်။ အာမခံကာလသည် ပထမဆုံးဝယ်ယူသည့်နေ့မှစ၍ (၁၂ မှ ၂၄) လထိ ဖြစ်သည်။

အကယ်၍ မှာယူပြီးပစ္စည်းကို မကြိုက်ပါက၊ မသုံးရသေးပါက အခြားပစ္စည်းတစ်ခုနှင့် လဲလှယ်နိုင်ပါသည်။ အများအားဖြင့် ပစ္စည်းပြန်ပေး၍လည်း ရနိုင်ပြီး၊ ပိုက်ဆံပြန်ရပါမည်။ ပစ္စည်းလဲခြင်း သို့မဟုတ် ငွေပြန်အမ်းခြင်းသည် အများအားဖြင့် (၁၄) ရက်အတွင်း ဖြစ်နိုင်သည်။ ပြေစာ သို့မဟုတ် ငွေတောင်းခံလွှာ ကို ပြသရပါမည်။ အထူးလျှော့စျေးဖြင့် ရောင်းထားသည်များမှာ မကြာခဏ လဲ၍မရတတ်ပါ။