ဂျာမနီတွင် ဝန်ထမ်းအခွင့်အရေးကို ကာကွယ်ပေးထားပါသည်။ ကုမ္ပဏီသည် ဝန်ထမ်းများ ၏ ကျန်းမာရေး နှင့် လုံခြုံရေးအတွက် အချို့သော စည်းမျဉ်းများကို လိုက်နာရသည်။ ၎င်းတို့ထဲတွင် ဥပမာ- အလုပ်နှင့်သင့်တော်သည့် ဝတ်စားဆင်ယင်မှု၊ ပုံမှန်အနားယူချိန် နှင့် အလုပ်ချိန် တို့ ပါဝင်သည်။ ကုမ္ပဏီကြီးများတွင် အလုပ်သမားကိုယ်စားလှယ်အဖွဲ့၊ အလုပ်သမားကောင်စီ တစ်ခု ရှိပါသည်။ ပြဿနာရှိပါက အလုပ်သမားကောင်စီ ဖြင့် ဆွေးနွေး၍ရပါသည်။ အလုပ်သမားကောင်စီမှ သင်၏ ကြီးကြပ်ရေးမှူး ဖြင့် ဆက်၍စကားပြောပါလိမ့်မည်။

အလုပ်ချိန်သည် သင်၏အလုပ် နှင့် အလုပ်စာချုပ် ပေါ်တွင် မူတည်သည် (“အလုပ်စဝင်ခြင်း” ကဏ္ဍကို ကြည့်ပါ)။ ဥပမာအားဖြင့်၊ ဆေးရုံရှိ သူနာပြုတစ်ဦးဖြစ်ပါက ရံဖန်ရံခါ မနက်ပိုင်း၊ ရံဖန်ရံခါ ညနေပိုင်း သို့မဟုတ် ညဘက်တွင် အလုပ်လုပ်ရပါသည်။

ရုံးပိုင်းတွင်ဆိုပါက ပုံမှန်အလုပ်ချိန်ရှိသည်။ မနက်ပိုင်းမှစပြီး (၈) နာရီ သို့မဟုတ် (၉) နာရီ ကြာ အလုပ်လုပ်ပြီးပါက အလုပ်ပြီးပါသည်။ ရုံးတက်ရန် ကိုယ်တိုင် အဆင်ပြေသလိုသတ်မှတ်၍ရသော အလုပ်ချိန်လည်း ရှိတတ်သည်၊ ဆိုလိုသည်မှာ သင့်တွင် လိုက်လျောညီထွေရှိသော အလုပ်ချိန် ရှိသည်။ ဥပမာအားဖြင့်၊ သင်သည် နံနက် (၈) နာရီ သို့မဟုတ် (၉) နာရီတွင် စတင်ပြီး စောစော သို့မဟုတ် နောက်ကျ၍ အလုပ်ဆင်းနိုင်သည်။ အလုပ်တိုင်းတွင် အနည်းဆုံး ခေတ္တနားချိန် တစ်ကြိမ်ရှိပြီး ၎င်းမှာ များသောအားဖြင့် နေ့လည်စာ မိနစ် (၃၀) သို့မဟုတ် (၆၀) ဖြစ်သည်။ မိမိအိမ်မှအလုပ်လုပ်ရန် ရွေးချယ်ခွင့် ကို ပေးသည့် အလုပ်ရှင်များ ပိုမိုများလာပါသည် ။ ပုံမှန်အားဖြင့် အလုပ်ချိန်မှာ တစ်ပတ်လျှင် (၃၈) မှ (၄၀) နာရီထိ ဖြစ်သည်။ အချိန်ပိုင်းအလုပ်လည်း လုပ်နိုင်သည်။ ဥပမာ (၅၀) ရာခိုင်နှုန်း အချိန်ပိုင်းလုပ်ပါက တစ်ပတ်အလုပ်ချိန် နာရီ (၂၀) ရှိသည်။ ကလေးရှိသူဖြစ်လျှင် သို့မဟုတ် ကိုယ်ပိုင်အလုပ် လုပ်လျှင် အချိန်ပိုင်းအလုပ်ကို ရွေးချယ်နိုင်သည်။ ဂျာမနီတွင် အနိမ့်ဆုံးသတ်မှတ်လစာ ရှိသည်။ အလုပ်ရှင်များသည် ဝန်ထမ်း လစာကို တစ်နာရီလျှင် (၁၂.၄၁) ယူရို (၂၀၂၄ ခုနှစ်စည်းမျဥ်းအရ) ထက်နည်း၍ ပေးခွင့်မရှိပါ။

ဝန်ထမ်း တိုင်းအတွက် သတ်မှတ်ထားသည့် တစ်နှစ်တာ အားလပ်ချိန် ကို အဖြစ်မနေတောင်းရမည် ဖြစ်ပြီး ကြီးကြပ်ရေးမှုး မှ ၎င်းကို သဘောတူရပါမည်။ အားလပ်ရက်များကို တစ်နှစ်တာအတွင်း နှစ်သက်သလို ခွဲဝေနိုင်ပါသည်။ သင်၏အားလပ်ရက်များကို လိုချင်တဲ့အချိန်တိုင်း မကြာခဏယူလို့ရသည်။ သို့သော် ကုမ္ပဏီတွင် အလုပ်များနေပါက ရံဖန်ရံခါ အားလပ်ရက် ယူ၍ မရနိုင်ပါ။ တခါတရံတွင်မူ ကုမ္ပဏီတခုလုံး အားလပ်ရက်ပိတ်သောကြောင့် သင်လည်း အားလပ်ရက် ယူရတတ်ပါသည်။ အားလပ်ရက်အတွင်း လစာ/လုပ်ခ ဆက်၍ ရရှိပါသည်။

နေမကောင်းပါက အလုပ်ရှင် ကို ချက်ချင်းအကြောင်းကြားပြီး ဖျားနာကြောင်း သတင်းပို့ရမည်။ ၎င်းကို နာမကျန်းမှု အသိပေးခြင်း ဟု ခေါ်သည်။ ပုံမှန်အားဖြင့် အလုပ်ရှင်များ မှ ဖျားနာပြီး (၃) ရက် (နေမကောင်းသည့် (၄) ရက်မြောက်နေ့) မှ စ၍သာ ဆေးထောက်ခံစာ တောင်းသည် (“ကျန်းမာရေးကဏ္ဍ” ကို ကြည့်ပါ)။ တခါတရံတွင် အလုပ်ရှင်များ မှ ဆေးထောက်ခံစာ ကို စောစောတောင်းတတ်ပါသည်။ ထိုသို့ဖြစ်ပါက ဆေးလတ်မှတ်အတွက် ဆရာဝန်၏ ဆေးခန်းသို့ သွားနိုင်သည် သို့မဟုတ် ဖုန်းခေါ်ဆိုနိုင်သည်။ အများအားဖြင့် ဖျားနာနေကြောင်းကို ဆရာဝန်ထံသို့ ဖုန်းဖြင့် အကြောင်းကြားနိုင်သည်။ ဆရာဝန်မှ ဖျားနာကြောင်းစာရင်းသွင်းခြင်း ကို ကျန်းမာရေးအာမခံကုမ္မဏီ သို့ ဒစ်ဂျစ်တယ်စနစ်ဖြင့် ဆောင်ရွက်သည်။ ဆေးစာကို အလုပ်ရှင်ဖက်မှ အွန်လိုင်းတွင် ကြည့်ရှုနိုင်သည်။ ၎င်းစနစ်မှာ အစိုးရစနစ် ကျန်းမာရေးအာမခံ ရှိသူများ နှင့် သက်ဆိုင်ပါသည်။ သင့်တွင် ပုဂ္ဂလိကကျန်းမာရေးအာမခံရှိပါက ဆေးထောက်ခံစာ ကို စာရွက်ဖြင့်လိုအပ်ပြီး ကိုယ်တိုင်တင်ပြရပါမည်။

အချို့သော အသက်မွေးဝမ်းကျောင်း လုပ်ငန်းများတွင် ထိခိုက်ဒဏ်ရာရခြင်းမှ ကာကွယ်ရန် အလုပ်ယူနီဖောင်း ၀တ်ဆင်ရမည်။ ဥပမာ - ဆောက်လုပ်ရေးလုပ်ငန်းခွင်များတွင် ထိခိုက်ဒဏ်ရာရခြင်းမှ ကာကွယ်ရန်ဖြစ်ပြီး၊ လေဆိပ်တွင် အလုပ်လုပ်သူဖြစ်လျှင် တို့ဖြစ်သည်။ သို့မဟုတ်ဘဲ ဝန်ထမ်းဖြစ်ကြောင်း ဝယ်သူမှ သိစေရန် ကုမ္ပဏီအမှတ်တံဆိပ်ပါ တီရှပ်အင်္ကျီကို ဝတ်ဆင်ရသည်လည်း ရှိသည်။

ကုမ္ပဏီတွင် အလုပ်မလုပ်နိုင်တော့ပါက သို့မဟုတ် အလုပ်မလုပ်ချင်တော့ပါက အလုပ်ထွက်ရပါမည်။ နှုတ်ထွက်ကြောင်း အကြောင်းကြားစာကို အမြဲတမ်း စာဖြင့် အသိပေးရသည်။ ကြိုတင်အသိပေးအကြောင်းကြားရမည့် သတ်မှတ်ကာလ တစ်ခုရှိသည်။ ၎င်းမှာ ပုံမှန်အားဖြင့် (၃) လ ဖြစ်သည်။ အလုပ်ရှင် မှလည်း သင့်ကို အလုပ်ထုတ်နိုင်သည်။ ၎င်းအတွက် ကြိုတင်အသိပေးကာာလ သည်လည်း ပုံမှန်အားဖြင့် (၃) လဖြစ်သည်။ အစမ်းခန့်ကာလ အတွင်းဆိုပါက ကြိုတင်အသိပေးကာလ မှာ အများအားဖြင့် တိုတောင်းသည်။ (၂) ပတ်မှ (၃) ပတ်ဖြစ်သည်။ အလုပ်ထုတ်ခြင်းကို သဘောမတူပါက ကန့်ကွက်လွှာတင်ရန် အချိန် (၃) ပတ် ရသည်။

အလုပ်မှထုတ်ကြောင်း အသိပေးစာ ရဖူးပါသလား သို့မဟုတ် အလုပ်စာချုပ် သက်တမ်းထပ်၍ မတိုးသည်ကို ကြုံဖူးပါသလား။ ထိုသို့ဆိုပါက အလုပ်ရှာဖွေသူအဖြစ် အလုပ်အကိုင်ရှာဖွေရေး အေဂျင်စီ တွင် အချိန်မီ စာရင်းသွင်းရပါမည်။ ထို့နောက် အလုပ်လက်မဲ့အကျိုးခံစားခွင့် အတွက် လျှောက်ထားနိုင်ပြီး များသောအားဖြင့် လူမှုဖူလုံရေးငွေ လက်ခံရရှိနိုင်ပါသည်။ မည်မျှကြာကြာနှင့် မည်သည့်ပမာဏ ရသည်ဆိုသည်မှာ အချက်များစွာပေါ်တွင် မူတည်ပါသည်။ သင်ကိုယ်တိုင် နှုတ်ထွက်ပါက အလုပ်အကိုင်အေဂျင်စီ မှ ဆိုင်းငံ့ကာလ ရနိုင်သည်။ ဆိုလိုသည်မှာ အလုပ်ထွက်ပြီး ချက်ချင်း အလုပ်လက်မဲ့အကျိုးခံစားခွင့် တစုံတရာကို ရရှိမည်မဟုတ်ပေ။

အကယ်၍ သင်သည် အသက်မွေးဝမ်းကြောင်းသင်တန်း သို့မဟုတ် တက္ကသိုလ်ပညာရေး တစ်ခုပြီးမြောက်ပြီး အချိန်အတန်ကြာ အလုပ်လုပ်ခဲ့လျှင် အရည်အသွေးမြှင့် သင်တန်းများ ဆက်တက်နိုင်သည်။ သင်၏ အသိပညာနှင့် ကျွမ်းကျင်မှုများကို ချဲ့ထွင်နိုင်သည် သို့မဟုတ် မွမ်းမံနိုင်သည်။ ဖက်ဒရယ် အလုပ်အကိုင်အေဂျင်စီ မှ အချက်အလက်များကို ရယူနိုင်ပြီး နောက်ထပ် သင်တန်းများကိုလည်း တက်ရောက်နိုင်ပါသည်။ အစိုးရပညာရေးကျောင်းများမှ များပြားလှသော သင်တန်းများကို ဖွင့်ထားပေးပါသည်။ ကုမ္ပဏီများမှလည်း မကြာခဏဆိုသလို အရည်အသွေးမြှင့်သင်တန်းများ ဖွင့်ထားပေးတတ်သည်။ သင်၏ အလုပ်ရှင် ကို မေးနိုင်ပါသည်။

အလွတ်တန်း တစ်ယောက်အနေဖြင့် အမှီအခိုကင်းစွာ အလုပ်လုပ်ပါသလား။ ထိုသို့ဆိုပါက ဘယ်အချိန်၊ ဘယ်နေရာတွင် ဘယ်လိုအလုပ်လုပ်မည် ဆိုသည်ကို ကိုယ်တိုင် ဆုံးဖြတ်နိုင်ပါသည်။ မိမိအိမ်မှအလုပ်လုပ်၍ရသလို၊ ရုံးခန်းငှား၍ လည်း ဖွင့်နိုင်ပါသည်။

ကုမ္ပဏီတစ်ခုတည်ထောင်ပြီး ဝန်ထမ်းများ ခန့်လိုပါသလား။ ထို့နသို့ဆိုပါက သင်၏အလုပ်အား အခွန်ရုံးတွင် /သို့မဟုတ် ကုန်သွယ်မှုရုံး တွင် မှတ်ပုံတင်ရပါမည်။ မိမိရပိုင်ခွင့်များ နှင့် တာဝန်များကို စဉ်းစားရန်လိုသည်။ (ဤစာပိုဒ်ပါ အခန်းကဏ္ဍများကို ရှာကြည့်ပါ - ဝန်ထမ်းအခွင့်အရေး၊ အလုပ်သမားဥပဒေ၊ အလုပ်ချိန်၊ အားလပ်ရက်နှင့်မကျန်းမာခြင်း နှင့် အလုပ်မှထုတ်ပယ်ခြင်း။

သင့်ကုမ္ပဏီ နှင့် ဝန်ထမ်းများအတွက် အရေးကြီးသော အာမခံများ ကိုလည်း စဉ်းစားပါ။ လုပ်ငန်းစတင်တည်ထောင်ရေး ဝက်ဘ်ဆိုက်တွင် အချက်အလက်များစွာကို ရှာဖွေကြည့်နိုင်သည်။