စာမေးပွဲအချိန်ဇယားနှင့် ဖြေဆိုရန်စာရင်းပေးသွင်းခြင်း

စာမေးပွဲဖြေဆိုရာတွင် Goethe-Institut တွင် ဂျာမန်ဘာသာစကားသင်တန်း တက်ရောက်နေသူ မဟုတ်သူများလည်း ဖြေဆိုနိုင်ပါသည်။ သင့်အနေနှင့် အသင်သည် စာမေးပွဲအတွက် လိုအပ်သည့် ဘာသာစကားအရည်အသွေးများနှင့် ပြည့်မီသည်ဟု ထင်မြင်ယူဆပါက စာမေးပွဲဖြေဆိုရန် အချိန်မရွေး စာရင်းပေးသွင်းနိုင်ပါသည်။ သို့သော် ကျွန်ုပ်တို့အနေနှင့် သင့်အား ဂျာမန်ဘာသာစကားသင်တန်းတစ်တန်းကို တက်ရောက်ရန် အကြံပြုလိုပါသည်။ အကြောင်းမှာ ဘာသာစကားသင်တန်းများတွင် လိုအပ်သည့် ဘာသာစကားနှင့် စာမေးပွဲအထူးပြု စွမ်းရည်များကို သင်ကြားပို့ချပေးသောကြောင့် စာမေးပွဲဖြေဆိုရာတွင် လွယ်ကူချောမွေ့စေမည်ဖြစ်ပါသည်။
 
အတန်း၀င်ခွင့်စာမေးပွဲများကိုမူ လတစ်လ၏ ဒုတိယမြောက်နှင့် စတုတ္ထမြောက် ဗုဒ္ဓဟူးနေ့တိုင်းတွင် မွန်းလွဲ (၁)နာရီ၌ စစ်ဆေးပေးပါသည်။ အတန်းဝင်ခွင့်စာမေးပွဲဖြေဆိုရန် စာရင်းပေးသွင်းလိုပါက လတိုင်း (၁)ရက်နေ့မှ (၇)ရက်နေ့အတွင်း စာရင်းပေးသွင်းနိုင်ပါသည်။ စာရင်းပေးသွင်းသည့်အခါ စာရင်းသွင်းကြေး ၂၀၀၀၀ (နှစ်သောင်းကျပ်) ကို စရန်ငွေအဖြစ် ပေးသွင်းရပါမည်။ အတန်း၀င်ခွင့်စာမေးပွဲ လာရောက်ဖြေဆိုပြီးသည့်နောက်
ထိုစရန်ငွေကို ကျွန်ုပ်တို့ဖက်မှ အသင့်အား ပြန်လည်ပေးအပ်သွားမည်ဖြစ်ပါသည်။
 
စာမေးပွဲအတွက် စာရင်းပေးသွင်းရန် သင်ကိုယ်တိုင် ကျောင်းသားရေးရာဌာနသို့ လာရောက်ရပါမည်။ စာမေးပွဲဖြေဆိုပြီးနောက် ရက်အနည်းငယ်အကြာတွင် ကျွန်ုပ်တို့သည် အသင့်အား စာမေးပွဲရလဒ်ကို အကြောင်းကြားပေးပါမည်။ ထိုသို့အကြောင်းကြားပေးပြီး (၅)ရက်အကြာတွင် ကျွန်ုပ်တို့ထံသို့ လာရောက်၍ စာမေးပွဲအောင်လက်မှတ်ကို ထုတ်ယူနိုင်ပါသည်။ ဤတွင် သင်၏ မှတ်ပုံတင် သို့မဟုတ် နိုင်ငံကူးလက်မှတ်ကို ယူဆောင်လာခဲ့ရပါမည်။

၂ကိုရိုနာကပ်ရောဂါကာလအတွင်း Goethe-Institut ရှိစာမေးပွဲများနှင့် သက်ဆိုင်သောအချက်အလက်များ

သက်ဆိုင်ရာ ဌာနများ၏ ညွှန်ကြားချက်များအရ Goethe-Institut မြန်မာတွင် နောက်ထပ်အသိပေးကြေငြာချက်မရှိသေးခင်အထိ စာမေးပွဲဖြေဆိုခြင်းများကို ပြုလုပ်မည်မဟုတ်သေးပါ။ Visa လျှောက်ရန်အတွက် စာမေးပွဲအောင်မြင်ကြောင်း တရားဝင်လက်မှတ်ကို အရေးတကြီးလိုအပ်ခဲ့ပါက ကျွန်ုပ်တို့ကို အီးမေးလ် သို့မဟုတ် ဖုန်းဖြင့်ဆက်သွယ်နိုင်ပါသည်။